TINGGANAI RU BANSA' 15 - Tanou Moonsoi Timugon

¹ Kukula' buoi raginio, paat mangkumos ra gandum, minongoi i Simson pagilong ra andu' nano. Nagibit io ra sanginan kambing mamulok. Indagu io ra iwan ungkuyon nano, “Masaga' aku mongoi ra lamin ru andu' kuno.” Kaa' nanginggalar iwan ungkuyon nano riso.

² Indagu io ri Simson, “Guang kuli ra totopot kou masisang riso. Ginio ra pinataak ku io ra rangan muno. Kaa' boborok nano mantalur poyo intor riso. Alapo' noyo boborok nano.”

³ Kon ri Simson, “Atan ondo' baalon kuno ra ulun ru Palistin ra raino ti, sala' ka kalasaan kuno.”

⁴ Io pana minongoi pamparakop ra talu ngaatus ngainan taani. Binangkos no iku' ru taani-taani no ra tumaruo. Tuma' ru bangkos no, pinasilot no rondo' pilasut.

⁵ Kopongo raginio sinikitan no pilasut-pilasut no, am labusi' no taani-taani no giu' ra umo ru ulun ru Palistin. Ginio ra ngaangai' gandum ondo' kinumos ra giu' nosolob; am poyo tinanom ra gandum, umo ru anggur am umo jaitun pana nakaaya' nosolob.

⁶ Nangimumui ulun ru Palistin ra osoi nambaal raginio. Binalaan ilo boo ra binaal ri Simson ginio sabap ra iwan ungkuyon nano giu' ra Timna napataak ra andu' ri Simson ra rangan ri Simson. Ginio sabap ra nonolob ulun ru Palistin ra ruandu' no am ngaangai' suang ru baloi ru ama' nano.

⁷ Kon ri Simson risilo, “Koson ragitio kia binaal min? Magibot aku ra kalo rumoro' aku saboi ra makapansuli' aku.”

⁸ Io pana namulunsar ra ngaangai' ulun no ra malaat am namatoi ra masuang intor risilo. Kopongo raginio nansibuni io giu' ra luang batu giu' ra bulur batu giu' ra Itam.

Nangala i Simson ra ulun ru Palistin

⁹ Ratong ulun ru Palistin ra wilayah Jiuda am pangkim ra giu' no. Namulunsar ilo boo ra bandar Ligi.

¹⁰ Pangkuot mamagun ru Jiuda risilo, “Kua pamulunsar kau ramon?” Taam ilo, “Matong akai mamparakop ri Simson am mambalos ra binaal nano.”

¹¹ Ginio ra minongoi talu ngaribu ngaulun Jiuda ra luang batu giu' ra bulur batu giu' ra Itam. Giu' no konilo ri Simson, “Kalo kia nakapandai kou ra nanguasa' ulun ru Palistin ritakau? Kua baalo' mu baal ragitio ramon?” Taam i Simson, “Aku pana mambalos ayuk ra binaal nilo.”

¹² Konilo, “Matong akai koson mamangkil rirun maa' raginio makataak mai okou ra ulun ru Palistin.” Kon ri Simson, “Bantuo' ra kalo mamatoi kau raki'.”

¹³ Taam ilo, “Iou. Masaga' akai ayuk mamangkil rirun am mapataak rirun risilo. Kalo mamatoi akai rirun.” Bangkilo' nilo boo i Simson ra ruo tali ondo' baguon, am nagibit riso intor ra luang batu no.

¹⁴ Paat ilo nakasaboi ra Ligi, nasimbul ulun ru Palistin minuma' ri Simson liliwa' nompogolok riso. Pulali' ri Simson maikang ru kuasa' ru Tuhan, am nangukat io ra tali ondo' pinabangkil ra longon am kalindu' nano, koson ayuk tali no ra banang nosolob.

¹⁵ Katuum boo ri Simson rondo' bungul ru salura ru kaladai ondo' bagu minatoi. Alapo' no bungul no am namakai raginio koson pinamatoi ra saribu ngaulun.

¹⁶ Parimbai boo i Simson, “Nanambungul ru salura ru kaladai, namatoi aku ra saribu ngaulun; nanambungul ru salura ru kaladai, napatuntur aku ra baangkai nilo nasauk rondo' tuntur.”

¹⁷ Patiri' no boo bungul ru salura no. Ginio sabap ra intok no ininggalanan ra Ramat-Ligi.

¹⁸ Kopongo raginio pinaason kaga' i Simson, am pampiau io ra Tuhan, “Nangani' Kou raki' ra kamanangan ondo' maayo ti. Kaa' raino, musiti' aku kia matoi sabap ra pinaason, saboi rokopon ru ulun ru Palistin ondo' kalo makaulig Rirun?”

¹⁹ Ukabo' boo ri Aki Kapuuno' rondo' luang giu' ra Ligi, am ingkual timug intor ra giu'. Inum i Simson, am moonsoi saguli'. Ginio ra taur ru timug no ininggalanan ra Taur ru Timug Akor. Taur ru timug no lakat poyo soroi giu' ra Ligi.

²⁰ Naningganai i Simson ra ulun ru Israil buoi ruo ngoopor ngambilor paat ulun ru Palistin nanguasa' ra pagun no.