TINGGANAI RU BANSA' 12 - Tanou Moonsoi Timugon

Jipta am bansa' ru Ipraim

¹ Paat raginio, bansa' ru Ipraim nakatampos koson ra mangayou. Liminaup ilo ra Sungoi Jordan am sumaboi ra Japon. Konilo ri Jipta, “Kua pangayou kau ra ulun ru Amon ra kalo nangkimait ramon? Raino solobon mai akau mababaya' ra suang ru baloi min.”

² Kon ri Jipta, “Aku am mamagun kuno nansangor ra ulun ru Amon. Nampiau aku ramuyun, kaa' kalo minatong kau mangindangan raki' lumabus intor ra ulun ru Amon.

³ Kakito ku ra kalo masaga' kau mangindangan, pinakinibit ku painawo kuno. Minongoi aku pamulunsar risilo, am nanaak Tuhan raki' ra kamanangan risilo. Kua kia raino masaga' kau mamulunsar raki'?”

⁴ I Jipta pana nanimung ra ngaangai' ulun ru Giliad, am namulunsar ra bansa' ru Ipraim am nangala risilo. (Bansa' ru Ipraim minindagu ra ulun ru Giliad ondo' minayan giu' ra wilayah Ipraim am Manasi timinuliar intor ra Ipraim, bansa' nilo.)

⁵ Ulun ru Giliad nampagaau ra intok-intok laupan ru Sungoi Jordan, maa' raginio bansa' ru Ipraim kalo makalaup raginio. Paat sangulun Ipraim kuminam magiru' ra liminaup ra sungoi no, nangkuot ulun ru Giliad riso, “Ulun ru Ipraim kou kia?” Amon taam nano, “Sala',”

⁶ sinusub nilo io mindagu ra, “Syibolit.” Kaa' mindagu ulun no ra “Sibulit” sabap kalo masabit no ra matanda'. Ilo pana namparakop am namatoi riso giu' ra intok laupan ru sungoi no. Paat raginio suang 42,000 ngaulun Ipraim pinatoi.

⁷ Naningganai i Jipta ra Israil buoi onom ngambilor. Kopongo raginio minatoi io am linobong giu' ra kampung nano giu' ra Giliad.

Ibjan, Ilon am Abdon

⁸ Kopongo i Jipta, ulun ru Israil tiningganai ri Ibjan. Intor io ra Bitligim.

⁹ Mokoondo' io talu ngoopor ngaulun anak ungkuyon am talu ngoopor anak ruandu'. Pinaanduan no anak-anak ruandu' nano ra ungkuyon intor ra bansa' ra bokon, am pinagandu' no talu ngoopor ngaulun ruandu' intor ra bansa' ra bokon ra anak-anak ungkuyon nano. Naningganai i Ibjan ra Israil buoi tulu' ngambilor,

¹⁰ am io pana minatoi am linobong giu' ra Bitligim.

¹¹ Kopongo i Ibjan, ulun ru Israil tiningganai ri Ilon intor ra bansa' Jibulon buoi mopor ngambilor.

¹² Io pana minatoi am linobong giu' ra Ayalon giu' ra Wilayah Jibulon.

¹³ Kopongo i Ilon, ulun ru Israil tiningganai ri Abdon anak ri Gilil ondo' intor ra Piraton.

¹⁴ Mokoondo' io apat ngoopor anak ungkuyon am talu ngoopor akupu ra ungkuyon. Mokoondo' io tulu' ngoopor ngainan kaladai sakayin. Naningganai i Abdon ra Israil buoi balu' ngambilor.

¹⁵ Io pana minatoi am linobong giu' ra Piraton giu' ra wilayah Ipraim giu' ra kabuluran Amalik.