SULABOI 4 - Tanou Moonsoi Timugon

Kaimbalaan ru Jirusalim kalupus naratu'

¹ Mas ondo' manguliat nasauk noyo ra maitom-itom; batu-batu ru Baloi ru Tuhan pinalayak giu' ra ralan.

² Ragili kamulakan ungkuyon ru bandar Sion koson ra mas ondo' mokologo, kaa' raino pinamakuan risilo koson ra rarapu' tembikar.

³ Taani ruandu' pana mapandai mampatiti' ra anak nano, kaa' ulun Kuno malaat koson ra susuit unta giu' ra tana' kaagisan.

⁴ Polosoon nilo lalagang nilo paason am maitilan; anak-anak makitaak ra akanon, kaa' kolondo' osoi pana ondo' mangani' ra akanon.

⁵ Ulun ondo' ragili mangakan ra akanon maamis kaga', raino matoi ra maitilan giu' ra ralan; ilo ondo' ragili langkaya', raino mangiul ra ginsamol maguyum ra akanon.

⁶ Bansa' kuno inukum ra maagat poyo intor ra mamagun ru Sodom, ondo' napuso ra sangkuliop ayuk sabap inukum ri Aki Kapuuno'.

⁷ Ragili tingganai-tingganai mai mapasau kaga' koson ra gapas ondo' mapulak kaga'. Ilo maayo inan am maikang, maligag am moonsoi.

⁸ Kaa' raino nakalangan giu' ra ralan am kalo nauligan ru ulun, bulos nilo maitom poyo intor ra sait, kungkung nilo nangulionjot am siminokot ra bungul, koson ra tataun ondo' mapua' kaga'.

⁹ Maimbolo' ilo am matoi ra inuton, sabap totopot kolondo' akanon. Ulun ondo' matoi giu' ra intok pangayawan, moonsoi poyo intor ra ulun ondo' matoi ra maitilan.

¹⁰ Karaat ondo' nakalumpa' ra bansa' kuno totopot makalalaa'; saboi ina' ondo' motogom mangansak kalalaat ra anak galama' koson akanon.

¹¹ Pinaabus ru Tuhan sangit Nano am monolob ra bandar Sion saboi napuso.

¹² Gino ngai' ru raja'-raja' am mamagun ru tana' ti kolondo' sangulun pana ondo' mangintopot ra kulobon garabang ru Jirusalim nasubol ru pantula'.

¹³ Kaa' baal raginio nasauk sabap ra nabi-nabi nano makatula noyo, am imam-imam nano namatoi ra ulun ondo' kolondo' sala.

¹⁴ Tingganai-tingganai ru bandar ru Jirusalim koson ra ulun bolou ondo' minugar ra kangkam-kangkam. Bayang nilo naluitan ru raraa' saboi kolondo' sangulun pana masaga' kumambong risilo.

¹⁵ Kon ru ulun, “Ugar no intor ragiti! Majamol kau, pai' kambong ramon!” Ginio ra tumanggau ilo intor ra rondo' pagun mongoi rondo' pagun, kaa' kalo inuma' ru osoi pana.

¹⁶ Kalo boo mampalio Tuhan risilo; Io galama' nampatutuliar risilo. Kalo boo ilain No imam-imam kapoam makaasi' ra tingganai-tingganai.

¹⁷ Mato mai maagui magilong, mangkuliman ra pangindanganan ondo' kalo rumatong. Malansan akai ra indangan intor ra bansa' ondo' sotopot no kalo makapangani' ra atan-atan.

¹⁸ Masalok pantula' magilong ramon, saboi kalo makaingkual akai ra ralan. Patayan mai mamaar noyo, sabap ra kaayagan mai mapupusan noyo.

¹⁹ Ulun ondo' mangilou ramon maribok poyo intor ra susuit kanui. Nangilou ilo ramon giu' ra bulur-bulur, am magawang ramon giu' ra tana' kaagisan.

²⁰ Rinakop nilo ulun ondo' nangani' ramon ra kaayagan, iono raja' pinili' ru Tuhan; ulun ondo' intopoton mai koson manindung ramon intor ra pantula'.

²¹ Pakakurit no, akau mamagun ru Idom am Us, pakaansuk no, buoi ra akau lakat poyo pakuriton. Akau pana lumpaan ru karaat, am magibaang sabap nagauk kau.

²² Inukum noyo Sion sabap ra tula nano; raino Tuhan kalo boo mompoloso ramon mayan giu' ra intok pamatiran. Kaa' okou, Idom, ukumin ru Tuhan; tula-tula muno patalangon.