SAGULION 32 - Tanou Moonsoi Timugon

¹ “Akau limbowon am tana', rongogo' noyo ragu kutu, rongogo' toojo ragu kutu.

² Pangilaan kuno rumatu' koson ra timug ru rasam, am masauk koson ra bolobou rasawat ru tana'. Ragu ku rumatu' koson ra rasam ondo' manguas ra tatanom mamulok, am koson ra rasam manulabuk ondo' rumatu' ra ralimbou ru sakot.

³ Mongompor aku ra inggalan ru Tuhan, am ulun Nano mapatanou ra Kinaayo Nano.

⁴ “Tuhan manaung ramuyun ondo' mapanggol, Io matanda' am matimpok ralalom ru ngaangai' baal; i Aki Kapuuno' min mampagagaya', kolondo' abau Riso, nambaal Io ra ondo' moonsoi am ondo' motopot.

⁵ Kaa' kalo gumagaya' kau, am kalo maaya' kau masauk ra ulun Nano; akau bansa' ondo' masaga' mamparuung am makatula.

⁶ Koson raginio kia ralan pamakuan min ra Tuhan, akau ngai' ulun sasambungon, am kolondo' pangkaraan? Io noyo Ama' min, Namangun ramuyun, Io noyo napasauk ramuyun ra rondo' bansa'.

⁷ “Karaa' noyo paat ragili, galing i poyo; kitaako' ama' min mantunung raginio ramuyun; kitaako' ulun matutuo mantunung ra tunung ragili.

⁸ Paat ra Io Ondo' Masawat Kaga' nantayar ra tana' ra bansa'-bansa', nangaru' Io ra wilayah intok ayanan nilo, am malaikat koson ra manindung,

⁹ kaa' papag ri Jakub pinili' ru Tuhan tayar Nano galama'.

¹⁰ “Natuum No ilo timinanggau giu' ra tana' kaagisan, tana' kaagisan ondo' masiluk am makauma' ra angin. Nanindung am nagalung Io risilo koson ra Io nagalung ra unor ru mato Nano.

¹¹ Koson ra susuit kanui mangila' ra anak nano mansiab, am ibain ginio ra kawo ondo' miningkal, koson raginio noyo Tuhan nagalung ra Israil maa' raginio kalo maratu'.

¹² Tuhan galama' ondo' naningganai ra ulun Nano, ra kalo inindangan ru tuhan-tuhan ra bokon.

¹³ “Nangiou Io risilo mamarinta ra gunung-gunung, mangakan ilo ra ampos ru tinanom giu' ra umo-umo. Nakaalap ilo ra ruu' maningot ru kataunan giu' ra bulur batu; puun jaitun nilo timinuu' ra malabung giu' ra tana' ondo' makabatu.

¹⁴ Sapi' am kambing nilo nanangampos ra masuang gatas; mokoondo' ilo ra domba, kambing am sapi' ondo' moonsoi kaga', am niayuk gandum, am niayuk wain ondo' moonsoi kaga'.

¹⁵ “Ulun ru Tuhan nasauk ra langkaya', kaa' masaga' gumuor, maasug ilo ra akanon, am molomok ilo. Mangiruan ilo ri Aki Kapuuno', Namangun risilo, am nangimpai ra Mamamayag risilo ondo' mapanggol.

¹⁶ Sumamba ilo ra sinungkalalaing, am nomposolon ra Tuhan, nambaal ilo ra kalaatan, am napasangit Riso.

¹⁷ Napataak ilo ra taak simbalui ra ambiluo-ambiluo malaat, am sala' ka ri Aki Kapuuno', tuhan-tuhan bagu ondo' kalo nauligan ru kinamatuaan nilo, dewa-dewa ondo' kalo igondo' gagayaa' ru Israil.

¹⁸ Nalilianan nilo i Aki Kapuuno', Mamamayag ondo' mapanggol, Nanaak Io risilo ra kaayagan.

¹⁹ “Paat ra nakito ru Tuhan baal raginio, sangit Io, anak Nano ra ungkuyon am ruandu', inimpayan No.

²⁰ ‘Kalo boo masaga' aku mangindangan risilo,’ ragu Nano, ‘Masaga' aku magilong ra atan ondo' masauk risilo, ulun ondo' bambalingatan am kalo gumagaya'.

²¹ Mangkinibit ilo Raki' mangusolon ra ondo' sala' ka Aki Kapuuno', am sumangit ra sinungkalalaing nilo. Ginio ra mangkinibit Aku risilo sumangit ra ondo' sala' ka bansa'. Mangkinibit Aku risilo mangusolon ra bansa' ondo' sasambungon.

²² Sangit Kuno bibilak koson ra apui, am monolob ra ngaangai' rasawat ru tana'. Tumuun apui no ra tana' ru ulun namagatoi, am mangumpo ra bakat ru gunung-gunung.

²³ “ ‘Mapatiu' Aku risilo ra karaat ondo' kalo makakai', am patiwon ngaangai' anak panah Kuno risilo.

²⁴ Matoi ilo sabap ra mansalom am bitilan; matoi ilo sabap ra maruol ondo' makalalaa'. Maparatong aku ra bibiag masigo koson mansaam risilo, am kukuo makatuwo koson maninduk risilo.

²⁵ Pangayawan magibit ra patayan giu' ra ralan mangaayo, kalaanan makalumpa' ra ulun giu' ra baloi-baloi. Ulun mamulok, ungkuyon am ruandu' matoi, lalagang am ulun matutuo niayuk kalo pasuayon.

²⁶ Aku musiti' no mamuso risilo ngaangai', maa' raginio kolondo' sangulun pana mangkara' risilo.

²⁷ Kaa' kalo mokoloso Ku pantula' ra lumimbau, ra ilo noyo ondo' nangala ra ulun Kuno, atika Aku noyo manutuk ra ulun Kuno.’

²⁸ “Israil rondo' bansa' ondo' kolondo' napandayan; ilo kolondo' noyo toojo ra kapintaran.

²⁹ Kalo nakapandai ilo kua kinala ilo, kalo makarati' ilo ra atan ondo' nasauk noyo.

³⁰ Kua kia saribu ngaulun naala ru sangulun, am mopor ngaribu ngaulun naala ru ruo ngaulun ayuk? Tuhan, Aki Kapuuno' nilo nangiruan noyo risilo; i Aki Kapuuno' nilo ondo' mapanggol napataak noyo risilo ra pantula'.

³¹ Nakapandai pantula' ru Israil ra mangampin risilo malawo, kalo mapanggol koson ri Aki Kapuuno', Manindung ru Israil.

³² Pantula' ru Israil malaat koson ra Sodom am Gomora, koson ra puun ru anggur ondo' mapait am makaanit kawa' nano,

³³ koson ra wain ondo' binaal intor ra tuwo ru kukuo makatuwo.

³⁴ “Mangkara' Tuhan ra binaal ru pantula' ru ulun Nano; maginaa Io ra paat ondo' motopot koson mangukum risilo.

³⁵ Mansuli' Tuhan am mangukum risilo; masaboi paat no ra ilo maratu' am mapuso, orou katutukan nilo mataki' makasaboi.

³⁶ Mamayag Tuhan ra ulun Nano paat ra Io makakito risilo kolondo' ikang. Makaasi' Io ra ulipon Nano, paat ra Io nakakito risilo kalo makalulu'.

³⁷ Tuhan pana nangkuot boo ra ulun Nano, ‘Ati kia tuhan-tuhan ra mangapanggol ondo' inintopot mini?

³⁸ Napataak kau ra wain am taak simbalui ra moonsoi kaga' risilo, nanaak kau risilo manginum ra wain. Raino polosoo' noyo ilo mangindangan ramuyun, polosoo' noyo ilo mamayag ramuyun.

³⁹ “ ‘Aku noyo rorondo' i Aki Kapuuno'; kolondo' bokon ondo' ayuk am Aku. Mamutus Aku ra painawo, am manaak Aku ra painawo, mamilat Aku ra ulun, am mamabas Aku ra ulun; kolondo' sangulun pana makagula' ra baalon Kuno.

⁴⁰ Sabap ra Aku galama', i Aki Kapuuno' ondo' naayag, mangakat Aku ra kalindu' am mampator

⁴¹ ra mangasa' Aku ra ilang Kuno ondo' manguliat, am mapaugar ra pangukuman. Mansuli' Aku ra pantula' Kuno, am mangukum ra ulun ondo' masisang Raki'.

⁴² Anak panah Kuno maluitan ra raraa' nilo, am ilang Kuno mamatoi ra ngaangai' ulun ondo' manggal Raki'. Kolondo' sangulun pana ondo' manggal Raki' no maayag; am ulun napilat am ulun rinakop pana matoi.’

⁴³ “Akau bansa' ngaangai', omporo' noyo ulun ru Tuhan. Mangukum Tuhan ra ngaangai' ulun ondo' mamatoi ra ulun Nano; mansuli' Io ra pantula' Nano, am mangampun ra tula ru ulun Nano.”

⁴⁴ Rinagu ri Musa am i Josua anak ri Nun rimbai no maa' raginio morongog ru ulun ru Israil ginio.

Susuban pupus ri Musa

⁴⁵ Kopongo i Musa nampasaboi ra pangilaan ri Aki Kapuuno' ra ulun raginio,

⁴⁶ indagu io, “Musiti' kau gumagaya' ra ngaangai' susuban ondo' taakin kuno ramuyun ra orou raiti'. Balai' anak-anak min ra ngaangai' no, maa' raginio gumagaya' ilo toojo ra ngaangai' pangilaan ri Aki Kapuuno'.

⁴⁷ Pangilaan ti sala' ka ragu ra kolondo' onong, kaa' pangilaan ti noyo painawo min. Gagayaa' noyo ngaangai' no maa' raginio maawar umur min giu' ra tana' ra sandaup ru Sungoi Jordan, tana' ondo' mataki' min ayanin.”

⁴⁸ Paat ra orou raginio niayuk minindagu Tuhan ri Musa,

⁴⁹ “Ongoi noyo ra Kagunungan Abarim giu' ra tana' Moab, ondo' nantaluma' ra bandar Jiriko. Pagaloi noyo ra Gunung Nibo, am impalo' noyo tana' ru Kanaan ondo' mataki' Kuno pataakon ra ulun ru Israil.

⁵⁰ Matoi kou giu' ra rasawat ru gunung no koson ra pabukat muno i Arun minatoi giu' ra rasawat ru Gunung Gor,

⁵¹ sabap ra akau ruo kalo giminagaya' Raki' giu' ra saang ru ulun ru Israil. Paat okou soroi maar ra taur ru timug Miriba, ondo' mamaar ra bandar Kadis giu' ra tana' kaagisan Jin, kalo nangurumat kou Raki' ra saang ru ulun ru Israil.

⁵² Monontong kou ra tana' no intor ra maalur, kaa' kalo mokoongoi kou ra tana' ondo' taakin Kuno ra ulun ru Israil.”