SAGULION 30 - Tanou Moonsoi Timugon

Barakat ru Tuhan tayar ru ulun Nano ondo' timinalikur ra tula

¹ “Nangani' aku noyo ramuyun ra pilian ru barakat kapoam ulas. Paat ra ngaangai' baal ragitio masauk ramuyun, am mayan kau ra gino ngai' ru bansa'-bansa' ra intok akau pinantutuliar ru Tuhan i Aki Kapuuno' min, am makara' min pilian ondo' taakin kuno ramuyun.

² Amon ru timinampos kau am papag min sumaguli' ra Tuhan i Aki Kapuuno' min, am ra sotopot ru guang akau gumagaya' ra ngaangai' susuban Nano ondo' taakin kuno ramuyun ra orou raiti',

³ am Tuhan i Aki Kapuuno' min pana makaasi' ramuyun. Magibit Io ramuyun sumaguli' intor ra pagun-pagun intok Io nampatutuliar ramuyun, am napasauk ramuyun ra langkaya' saguli'.

⁴ Kabalu' pana pinantutuliar kau noyo ra titikop ru tana', timungon kau saguli' ru Tuhan i Aki Kapuuno' min.

⁵ Ginio ra akau tatangan saguli' ra tana' ondo' inayanan ru kinamatuaan min ragili. Io mampasauk ramuyun ra langkaya' poyo am masuang kau poyo intor ra kinamatuaan min.

⁶ Tuhan i Aki Kapuuno' min manaak ramuyun am papag min ra guang ondo' gumagaya' maa' raginio motogom kau Riso ra sotopot ru guang, am makaayan magulayun giu' ra tana' no.

⁷ Maparatu' io ra ngaangai' ulas no ra pantula' ondo' masisang am mangimbolo' ramuyun.

⁸ Sumaguli' kau gumagaya' ra Tuhan am mapaugar ra ngaangai' susuban Nano ondo' taakin kuno ramuyun ra orou raiti'.

⁹ Tuhan manugut ra ngaangai' kandoi mino. Makaanak am makabibiag kau ra masuang; manangampos umo mino suku' malabaan kau. Tuhan maansayan am mapasauk ramuyun ra langkaya' koson Io napasauk ra kinamatuaan mini ra langkaya'.

¹⁰ Kaa' akau musiti' gumagaya' ra Tuhan i Aki Kapuuno' min am maya' ra ngaangai' ukum Nano ondo' natulisan ralalom ru Kitab ti, ondo' makasuang ra pangilaan Nano. Musiti' kau sumaguli' Riso ra sotopot ru guang.

¹¹ “Susuban ondo' taakin kuno ramuyun ra orou raiti' kalo mapagon kaga' kapoam kalo maalur kaga'.

¹² Intok no sala' ka giu' ra limbowon, am kalo pana mangkuot kau, ‘Osoi kia magaloi ra giu' no am magibit raginio tumuun maa' raginio mokorongog am magagaya' mai?’

¹³ Intok no sala' ka niayuk giu' ra sandaup ru raat. Kalo pana mangkuot kau, ‘Osoi kia lumaup ra raat am magibit raginio ramon maa' raginio mokorongog am magagaya' mai?’

¹⁴ Pai' pangkuot koson raginio sabap susuban no soroi ramuyun. Nakapandai kau noyo am makaindagu raginio; mambaal kau ayuk raginio.

¹⁵ “Paat ra orou raiti' pambaal noyo ra pilian ra ondo' moonsoi am ondo' malaat, ondo' maayag am matoi.

¹⁶ Amon ru gumagaya' kau ra susuban ru Tuhan i Aki Kapuuno' min ondo' taakin kuno ramuyun ra orou raiti', am amon ru motogom am niayuk gumagaya' kau Riso, am mambaal ra ngaangai' ukum Nano, am akau pana langkaya' am masauk ra bansa' ondo' maayo. Mambarakat Tuhan i Aki Kapuuno' min ramuyun giu' ra tana' ondo' kalo boo mabuoi ayanin min.

¹⁷ Kaa' amon ru kalo gumagaya' kau am kalo masaga' rumongog, am polosoon inan min palayawon koson sumamba ra tuhan-tuhan ra bokon,

¹⁸ maaru' pusoon kau. Umur min kalo maawar giu' ra tana' ra sandaup ru Sungoi Jordan, ondo' kalo boo mabuoi am ayanin min. Karaa' noyo! Mapakara' aku toojo ramuyun ra orou raiti' ra intok ragitio.

¹⁹ Raino makapampili' kau ra bayag am matoi, ra barakat ri Aki Kapuuno' am ulas Nano. Mampiau aku ra limbowon am tana' ti koson masauk ra sasi' ra kapatasan min. Pilio' noyo bayag.

²⁰ Tagami' noyo Tuhan i Aki Kapuuno' min, gagaya' noyo am intopot noyo Riso, akau am papag min pana maawar umur giu' ra tana' ondo' binantu' ru Tuhan ra kinamatuaan min, i Abragam, i Isak am i Jakub.”