SAGULION 3 - Tanou Moonsoi Timugon

Ulun ru Israil nangala ra Raja' Og

¹ “Mongoi takau boo ra ralayo, mongoi ra libung Basan. Minatong Raja' Og intor ra Basan am ngaangai' saujor nano koson mamulunsar ritakau maar ra bandar Idrii.

² Kaa' indagu Tuhan raki', ‘Pai' kalaa' riso. Pataakon Ku io, saujor nano am titikop wilayah nano ramuyun. Pamakuan riso no koson ra pinamakuan muno ri Sigon, raja' ru ulun ru Amori, ondo' namarinta ra Gisybon.’

³ Ginio ra napataak Tuhan ra Raja' Og am mamagun nano ritakau, am pinatoi takau ilo ngaangai'.

⁴ Paat raginio niayuk, ginaau takau ngaangai' bandar ru Raja' Og, suang onom ngoopor bandar, iono titikop libung ru Argob, ondo' pinarinta ru Raja' Og intor ra Basan. Kolondo' rondo' pana ra bandar no kalo gaawon takau.

⁵ Ngaangai' bandar no piniot ra timbok mangasawat, kulobon garabang am tataun pangunsi' ra kulobon garabang. Suai raginio, mokoondo' niayuk masuang pekan ondo' kolondo' timbok.

⁶ Pinuso takau ngaangai' bandar no am pinatoi takau mamagun ra ngaangai' ungkuyon, ruandu' am lalaing koson ra binaal takau giu' ra bandar-bandar longgom ru Raja' Sigon intor ra Gisybon.

⁷ Inalap takau bibiag tinambiag am ginaawan bandar-bandar nilo.

⁸ Paat raginio, libung giu' ra tampilon sirangon ru Sungoi Jordan, intor ra Sungoi Arnon saboi ra Gunung Girmon, ginaau takau noyo intor ra ruo ngaulun raja' ru Amori no. (

⁹ Gunung Girmon sabiton ra Siryon ru ulun intor ra bandar Sidon am sabiton ra Sinir ru ulun ru Amori.)

¹⁰ Ginaau takau titikop wilayah ru Raja' Og intor ra Basan: bandar-bandar giu' ra tana' marata' ra masawat, libung Giliad am Basan, saboi ra bandar Salka am Idrii giu' ra tampilon sirangon.” (

¹¹ Raja' Og iono ulun pupus intor ra bansa' Ripaim. Karanda' nano binaal intor ra batu, pila' no olo'-olo' ruo ngamito am olo'-olo' apat ngamito gawar sumugut ra panuku' rasmi. Saboi raino karanda' no lakat poyo makito giu' ra Raba, bandar ru ulun ru Amon.)

Bansa'-bansa' ondo' liminayun giu' ra libung tampilon ra sirangon ru Sungoi Jordan

¹² “Mopongo tana' raginio masauk ra longgom takau, nangani' aku ra bansa' ru Rubin am Gad ra tana' giu' ra ralayo ru bandar Aroir, maar ra Sungoi Arnon am santayaran intor ra kabuluran Giliad, nakasimpung bandar ra giu' no.

¹³ Tinaakan ku libung Giliad ondo' suwo no ra sampiruo bansa' ru Manasi, am niayuk titikop libung Basan, intok ru Raja' Og namarinta ragili, iono titikop wilayah Argob.” (Basan nauligan ra tana' ru bansa' ru Ripaim.

¹⁴ I Jair, sangulun intor ra bansa' ru Manasi, minayan ra titikop wilayah Argob, iono Basan, saboi ra balitan ru Gisur am Maakga. Ininggalanan no pekan ra giu' no ra inggalan nano galama'. Saboi raino lakat poyo mauligan pekan raginilo ra pekan-pekan Jair.)

¹⁵ “Tinaakan ku libung Giliad ra bansa' ru Makgir intor ra bansa' ru Manasi.

¹⁶ Tinaakan ku libung giu' ra lolot ru Giliad am Sungoi Arnon ra bansa' ru Rubin am Gad. Tayar ra tatanga' ru Sungoi Arnon nasauk ra balitan ru libung nilo giu' ra tampilon rabugus. Balitan nilo giu' ra tampilon ralayo iono Sungoi Jabok, ondo' santayaran no nasauk ra balitan ru pagun Arnon.

¹⁷ Giu' ra tampilon kalasaan, libung nilo malangka' saboi ra Sungoi Jordan, intor ra Tasik Galilia giu' ra ralayo saboi ra Raat Matoi giu' ra rabugus, am saboi ra lonson toojo ru Bulur Pisga giu' ra tampilon sirangon.

¹⁸ Paat raginio niayuk nanusub aku risilo, ‘Tuhan i Aki Kapuuno' takau nanaak noyo ritakau ra tana' tampilon ra sirangon ru Sungoi Jordan koson masauk ra intok ayanan min. Raino ukapi' noyo saujor mino ra kinandoi mangayou, am susubo' ilo mongoi ra sandaup ru Sungoi Jordan, maa' raginio sumigulu ilo ra bansa' ru Israil ra bokon koson mangindangan risilo mayan ra tana' raginio.

¹⁹ Anak andu' am bibiag tinambiag mino ayuk mayan ra bandar-bandar ondo' tinaakan ku noyo ramuyun. Nakapandai aku ra masuang bibiag tinambiag mino.

²⁰ Pangindangan noyo ra gino ngai' ulun ru Israil saboi mayan ilo ra tana' ondo' tinaakan ru Tuhan risilo giu' ra tampilon kalasaan ru Sungoi Jordan, am saboi mangiou Tuhan risilo mayan ra giu' ra mamimio, koson ra ondo' binaal Nano ramuyun. Mopongo ginio bagu no iowon kau muli' ra tana' ondo' tinaakan kuno ramuyun.’

²¹ Indagu aku boo ri Josua, ‘Nakito mu noyo ngaangai' ondo' binaal ru Tuhan i Aki Kapuuno' muno ra Raja' Sigon am Raja' Og, ruo ngaulun raja' no; baalon Nano nogondo' ra moonong raja' ondo' pagun no bulunsaron muno.

²² Pai' kalaa' risilo, sabap Tuhan i Aki Kapuuno' muno mangayou ra tayar muno.’ ”

Kalo paumposon i Musa ra Kanaan

²³ “Paat raginio niayuk nakiasi' aku toojo,

²⁴ ‘Iou Tuhan Raja', nakapandai aku ra atan ondo' nanuluan Muno raki' talimpuun ayuk ru baal maayo am makaimuag ondo' baalon Muno. Kolondo' tuhan ra bokon giu' ra limbowon kapoam giu' ra tana' ondo' makapambaal ra baal makaimuag ondo' binaal Muno.

²⁵ Iou Tuhan, iowo' aku noyo lumaup ra Sungoi Jordan am magilong ra tana' ondo' malabung giu' ra sandaup, intok kabuluran ondo' moonsoi am Kagunungan Libanon.’

²⁶ Kaa' akau nangkinibit noyo ra Tuhan siminangit raki' saboi kalo masaga' Io mangiou ra kitaak kuno. Kaa' indagu Io, ‘Sama' noyo, pai' noyo boo sabito' baal raginio!

²⁷ Ongoi noyo ra tampak ru Gunung Pisga am ilai' tampilon ra ralayo am rabugus, tampilon ra sirangon am kalasaan. Ilai' toojo atan ondo' makito muno, sabap ra kalo mokoongoi kou ra sandaup ru Sungoi Jordan.

²⁸ Pataaki' noyo panuluan-panuluan ri Josua. Kaikango' guang nano, sabap ra io noyo maningganai ra ulun mongoi ra sandaup ru sungoi koson mayan ra tana' ondo' nakito muno.’

²⁹ Ginio ra ayan takau ra limayak, giu' ra sandaup ru bandar Bit-Pior.”