SAGULION 26 - Tanou Moonsoi Timugon

Taak intor ra ampos ru tinanom

¹ “Mopongo ra akau mongoi ra tana' ondo' pataakon ru Tuhan i Aki Kapuuno' min am lumayun ra giu' no,

² moonong ulun musiti' mangumung ra ampos kasaa' ru tinanom nano am pasuangon no ra rondo' bakul. Akau pana musiti' magibit raginio ra rondo' intok sambayangan no.

³ Ongoi noyo ra imam ondo' mangandoi paat raginio am indagu noyo riso, ‘Raino mangiou aku ra Tuhan i Aki Kapuuno' kuno ra minatong aku noyo ra tana' ondo' binantu' Nano ra kinamatuaan takau koson taakin ritakau.’

⁴ Alapon ru imam bakul no intor ramuyun am pabantaan no ra saang ru altar ru Tuhan i Aki Kapuuno' min.

⁵ Giu' boo ra saang ru Tuhan i Aki Kapuuno' min, akau musiti' mindagu ra ragu ragitio: ‘Kinamatuaan kuli sangulun Aram ondo' timinanggau. Nagibit io ra sasambaloi nano minongoi ra Misir am minayan ra giu' koson ulun bansa' ru bokon. Paat ra ilo minongoi ra giu' no, sanganu suang nilo, kaa' nasauk ilo boo ra rondo' bansa' ondo' maayo am maikang.

⁶ Malaat pamakuan ru ulun ru Misir ramon am nampajajal ramon mangandoi koson ra ulipon.

⁷ Pampiau akai boo makiindangan ra Tuhan i Aki Kapuuno' ru kinamatuaan mai. Riminongog Tuhan ramon am nakakito ra kaimbalaan, kapaganan am niayuk nangulipanan ramon.

⁸ Ra kuasa' am kaikangan Nano ondo' maayo namayag Io ramon intor ra Misir. Nambaal io ra kaimuagan, am baal makaimuag, am niayuk baal ondo' makalalaa'.

⁹ Nagibit io ramon ragiti am nanaak ramon ra tana' ondo' langkaya' am malabung ti.

¹⁰ Ginio ra, raino ra Tuhan, mapataak aku ra tayar kasaa' intor ra ampos ru tinanom ondo' pinataak Nano raki'.’ “Mopongo raginio pabantaa' bakul no giu' ra saang ru Tuhan am sambayang noyo Riso ra giu' no.

¹¹ Paringkuanang noyo ra tayar ru ngaangai' akanon ondo' tinaakan ramuyun am sasambaloi min ru Tuhan i Aki Kapuuno' min. Kimaiti' noyo ulun ru bansa' ru Liwi am ulun bansa' ru bokon ondo' minayan ra gino ngai' min maya' ra pangiantakan no.

¹² “Moonong bilor, akau musiti' manaak sampiopor ra ampos ru tinanom min ra Tuhan. Kaa' moonong bilor katalu, taaki' noyo sampiopor ra ampos ru tinanom min ra ulun ru Liwi, ulun bansa' ru bokon, anak nailusan ra matuo am napuor, maa' raginio giu' ra moonong bandar min, makaalap ilo ra akanon ondo' makapakuan. Mopongo kau mambaal koson raginio,

¹³ indagu noyo ra Tuhan, ‘Kalo sanganu pana ra sampiopor ondo' musiti' pataakon Rirun natatang ra baloi kuno. Tinaakan ku noyo ngaangai' no ra ulun ru Liwi, ulun bansa' ru bokon, anak nailusan ra matuo am napuor, koson ra nanusuban Muno raki'. Kalo mansang kapoam mampalilian aku ra atan pana nanusuban Muno intor ra taak sampiopor.

¹⁴ Kalo nangakan aku sanganu pana intor ra sampiopor no paat aku mangulir. Kalo nagibit aku raginio intor ra baloi paat aku majamol. Kalo tinaakan ku ginio koson ra taak tayar ru ulun matoi. Sinugut ku noyo susuban Muno, iou Tuhan. Binaal ku noyo ngaangai' nanusuban Muno intor ra taak sampiopor.

¹⁵ Ilai' noyo ragana' intor ra intok Muno ondo' matulai giu' ra suruga' am barakato' noyo ulun Muno Israil; barakato' niayuk tana' ondo' langkaya' am malabung ti, ondo' tinaakan Muno sumugut ra bantu' Muli ra kinamatuaan mai.’ ”

Ulun pinili' ru Tuhan

¹⁶ “Paat ra orou raiti' Tuhan i Aki Kapuuno' mino nanusub ramuyun maa' raginio gumagaya' ra ngaangai' ukum Nano. Ginio ra gagayaa' noyo ukum-ukum no ra matanda' am ra sotopot-topot ru guang am salibuor min.

¹⁷ Paat ra orou raiti' nangiou kau ra Tuhan koson i Aki Kapuuno' min. Nambantu' kau noyo koson gumagaya' Riso, am niayuk gumagaya' ra ngaangai' ukum am susuban Nano.

¹⁸ Paat ra orou raiti' niayuk Tuhan nangapu ramuyun koson ra ulun Nano galama' koson ra binantu' Nano, am nanusub Io ramuyun maa' raginio gumagaya' ra ngaangai' ukum Nano.

¹⁹ Mapasauk Io ramuyun ra mauligan kaga' poyo intor ra ngaangai' bansa' ra bokon ondo' sinauk Nano, am omporon am urumaton kau. Masauk kau ra ulun Nano, koson ondo' binantu' Nano.”