SAGULION 16 - Tanou Moonsoi Timugon

Pangiantakan Paska

¹ “Urumato' noyo Tuhan i Aki Kapuuno' min ra mangiantak ra Paska paat ra sila' Abib sabap ra paat sila' raginio, paat ra rondom, akau binayag ru Tuhan i Aki Kapuuno' min intor ra Misir.

² Ongoi noyo ra rondo' intok sambayangan no, am giu' no simbaluyo' noyo sanginan intor ra domba kapoam sapi' min koson bunsag ru Paska tayar mangurumat ra Tuhan i Aki Kapuuno' min.

³ Paat ra akau magakan ra bunsag raginio, pai' pangakan ra ruti' ondo' linatakan ra ragi. Buoi tulu' ngoorou musiti' mangakan ra ruti' ondo' kalo linatakan ra ragi, koson ondo' binaal min ragili paat ra akau nagiru' ra naagou-agou intor ra Misir. Akano' noyo ruti' ondo' kalo linatakan ra ragi – ruti' ondo' sabiton ra ruti' kaimbalaan – maa' raginio buoi ru bayag mino, makara' min orou ra akau nangiruan ra Misir, intok pangimbalaan no.

⁴ Buoi tulu' ngoorou, sangulun pana giu' ra tana' min kalo iowon mambuli ra ragi ralalom ru baloi nano; am kual ru bibiag ondo' sinimbalui paat ra rondom kasaa' no musiti' akanon paat ra rondom raginio niayuk.

^5-6 “Simbaluyo' noyo bibiag tayar ru bunsag Paska giu' ra rondo' intok sambayangan no, am sala' ka ra ati-ati intok ra bokon giu' ra tana' ondo' pataakon ramuyun ru Tuhan i Aki Kapuuno' min. Simbaluyo' noyo bibiag no paat ra mato ru orou tumolop, koson paat ra akau nangiruan ra Misir ragili.

⁷ Ansako' noyo kual no am akano' noyo giu' ra rondo' intok sambayangan no, am uli' noyo ra baloi ra iosusuab ru suabon no.

⁸ Buoi onom ngoorou, musiti' kau mangakan ra ruti' kalo linatakan ra ragi, am paat ra orou katulu' musiti' kau tumimung koson sumambayang ra Tuhan i Aki Kapuuno' min. Pai' pangandoi paat orou raginio.”

Pangiantakan ra mangkumos

⁹ “Untobo' noyo tulu' ngaminggu' tumalimpuun ra orou kasaa' akau mangkumos ra gandum.

¹⁰ Kopongo raginio iantako' Pangiantakan ra mangkumos koson mangurumat ra Tuhan i Aki Kapuuno' min. Panaak noyo Riso ra taak kalo kibayarin, sumugut ra suang ru barakat ondo' pinataakan noyo ramuyun.

¹¹ Pakaansuk noyo ra saang ru Tuhan, mabaya' ra anak-anak mino, mangngandoi mino, ulun ru Liwi, ulun bansa' ru bokon, anak nailusan ra matuo, am napuor ondo' minayan ra bandar-bandar mino. Baalo' noyo baal raginio giu' ra rondo' intok sambayangan no.

¹² Gagaya' noyo ra susuban-susuban ragitio ra matanda'. Karaa' noyo ra inulipon kau giu' ra Misir ragili.”

Pangiantakan ra Mangkalukub ra Raun

¹³ “Mopongo min malapos ngaangai' gandum am mamaga' ra ngaangai' kawa' ru anggur, iantako' noyo Pangiantakan Mangkalukub ra Raun buoi tulu' ngoorou.

¹⁴ Pakaansuk noyo mabaya' ra anak-anak mino, mangngandoi mino, ulun ru Liwi, ulun bansa' ru bokon, anak nailusan ra matuo am napuor ondo' minayan giu' ra bandar-bandar min.

¹⁵ Urumato' noyo Tuhan i Aki Kapuuno' min ra mangiantak ra pangiantakan ragitio buoi tulu' ngoorou giu' ra rondo' intok sambayangan no. Pakaansuk noyo sabap ra nambarakat noyo Tuhan ra kinumos am kandoi min.

¹⁶ “Ngaangai' ungkuyon ru bansa' min musiti' matong koson sumambayang ra Tuhan i Aki Kapuuno' min intalu sambilor, giu' ra rondo' intok sambayangan: paat ra pangiantakan Paska, Pangiantakan ra mangkumos am Pangiantakan Mangkalukub ra Raun. Moonong ungkuyon musiti' magibit ra taak

¹⁷ sumugut ra kaandaran nano am sumugut ra suang ru barakat ondo' pinataak noyo riso ru Tuhan i Aki Kapuuno' min.”

Ralan mapaugar ra katimpakan

¹⁸ “Lantiko' noyo tingganai-tingganai ru bansa' am pagawai-pagawai ra bokon giu' ra moonong bandar ondo' pataakon ramuyun ru Tuhan i Aki Kapuuno' min. Ngaangai' ulun musiti' mangakim ra mamagun ra matimpok.

¹⁹ Kalo iowon kau jajajou kapoam pagimbason paat mapaugar ra pangakiman. Kalo iowon kau mangapu ra rasua sabap rasua mokobolou ra ulun, am poyo ulun mapintar am mabanis guang pana, saboi mamatas ilo ra masala.

²⁰ Akau musiti' magail matimpok am kalo magimbas, maa' raginio makaayan kau ra tana' ondo' pataakon ramuyun ru Tuhan i Aki Kapuuno' min, am magulayun kau mayan ra giu' no.

²¹ “Paat ra akau mambaal ra altar tayar ru Tuhan i Aki Kapuuno' min, pai' potolorogo' lugu' tataun ondo' nasauk ra tatandu' ru Dewi Asyira ra sapapa' ru altar no.

²² Pai' tirongo' lugu' batu tayar ru sumamba ra sinungkalalaing giu' ra intok raginio. Masisang Tuhan i Aki Kapuuno' min ra baal raginio.”