SAGULION 10 - Tanou Moonsoi Timugon

Kainduo ri Musa nangapu ra Mopor Ukum

¹ “Tuhan pana mindagu, ‘Pamahat ra ruo batu tulis koson ragili, am pambaal rondo' kaban intor ra tataun koson pambulian ra batu tulis no. Mopongo raginio ratong noyo Raki' giu' rasawat ru gunung;

² am ra batu tulis raginio manulis Aku ra atan ondo' natulisan Ku noyo ra batu tulis ondo' pinopol muli. Buliin boo batu tulis no giu' ralalom kaban.’

³ Aku pana nambaal boo rondo' kaban intor ra tataun akasia, am nanuyu' ruo batu tulis koson ragili. Nagibit aku ra batu tulis no giu' rasawat ru gunung.

⁴ Giu' ra batu tulis no nanulis Tuhan ra atan ondo' tinulisan Nano ra kasaa'. Nanulis Io ra Mopor Ukum ondo' tinaakan Nali ramuyun paat Io minindagu ramuyun intor ra apui, paat ra orou akau timinimung giu' ra gunung. Nanaak Tuhan raki' ra batu tulis no,

⁵ am tuun aku intor ra gunung. Koson ra nanusuban ru Tuhan, pinabanta' ku batu tulis no giu' ralalom ru kaban ondo' binaal kuli. Binulian batu tulis no giu' ralalom kaban intor ragili saboi raino.” (

⁶ Iniruanan ru ulun ru Israil tulubong ru ulun longgom ru Jaakan, am ongoi ra Mosira. Giu' ra Mosira, pinatayan am nampalabangan ri Arun, am anak nano i Iliajar minalit riso ra Imam.

⁷ Intor ra giu' minongoi ilo ra Gudgod, am ra Jotbata, intok ondo' masuang timug no.

⁸ Giu' rasawat ru gunung, Tuhan nampasauk ra ulun intor ra bansa' ru Liwi koson magalung ra Kaban Nabantuan, am koson mangandoi Riso koson imam, am niayuk koson mindagu ra barakat ralalom ru inggalan Nano. Saboi raino lakat poyo bansa' ru Liwi mambaal ra kandoi raginio.

⁹ Ginio sabap ra bansa' ru Liwi kalo nakaalap ra tana' koson ra bansa'-bansa' ra bokon, sabap ra nangapu ra kaapuan inaru' koson masauk ra imam ru Tuhan koson ra binantu' ru Tuhan i Aki Kapuuno' min.)

¹⁰ “Minayan aku giu' rasawat ru gunung no buoi apat ngoopor ngoorou am apat ngoopor ngorondom koson ra kasaa' i. Rinongog aku ru Tuhan ra igondo' poyo am nangiou Io ra kalo mamuso ramuyun.

¹¹ Kopongo raginio nanusub Io raki' mugar am masauk ra tingganai min, maa' raginio mokoowot kau ra tana' ondo' binantu' Nano ra kinamatuaan min.”

Pulion ri Aki Kapuuno'

¹² “Raino ulun ru Israil kau ngai', rongogo' noyo pulion ru Tuhan i Aki Kapuuno' min intor ramuyun: Urumato' noyo Tuhan am baalo' ngaangai' susuban Nano. Tagami' noyo Io am pangandoi noyo Riso ayuk ra sotopot ru guang;

¹³ gagayaa' noyo ngaangai' ukum Nano. Manaak aku ramuyun ra ukum-ukum raginio ra orou raiti' koson ra kaatangan min.

¹⁴ Limbowon ondo' masawat kaga' pana Tuhan tatangan; tana' ti am ngaangai' ondo' soroi ra rasawat no niayuk Io tatangan.

¹⁵ Kaa' togom ru Tuhan ra kinamatuaan mini maayo kaga' saboi nampili' Io ramuyun intor ra ngaangai' bansa', am akau noyo ulun pinili' Nano.

¹⁶ Ginio ra intor raino, gagaya' noyo ra Tuhan am pai' boo bambalingatan.

¹⁷ Tuhan i Aki Kapuuno' mino makakuasa' ra ngaangai' tuhan ra bokon am ngaangai' kakuasaan. Matulai am makakuasa' Io, am musiti' gagayaan Io. Kalo magimbas am kalo mangapu ra rasua.

¹⁸ Manutun Io maa' raginio anak kolondo' matuo am napuor matimpok pamakuan. Motogom Io ra ulun bansa' ru bokon ondo' minayan mabaya' ra bansa' takau; nanaak Io risilo ra akanon am bayang.

¹⁹ Ginio ra musiti' motogom kau ra ulun bansa' ru bokon no sabap akau galama' nakaili' nasauk ra ulun bansa' ru bokon giu' ra Misir.

²⁰ Urumato' noyo Tuhan i Aki Kapuuno' min am sambayang Riso ayuk. Gagaya' noyo Riso am pagibot noyo ralalom ru inggalan Nano ayuk.

²¹ Omporo' noyo Io sabap Io Aki Kapuuno' min, am ra mato galama', nakito min baal mangaayo am makaimuag ondo' binaal Nano ramuyun.

²² Paat kinamatuaan min minongoi giu' ra Misir, suang nilo tulu' ngoopor ngaulun ayuk, kaa' raino Tuhan i Aki Kapuuno' min napasauk ramuyun koson ra kinasuang ru butitin giu' ra limbowon.”