ROMA 4 - Tanou Moonsoi Timugon

I Abragam pinobonsoi saguli' ri Aki Kapuuno' sabap ra pangintapatan nali

¹ Amon ru ginio poyo, atan boo paraguon takau intor ra nailian ri Abragam, kinamatuaan takali?

² Amon ru i Abragam pinobonsoi saguli' ri Aki Kapuuno' sabap ra binaal nali, makasasaban io lumimbau. Kaa' sotopot no ra pagilangan ri Aki Kapuuno' kolondo' sasaban io lumimbau.

³ Sabap ra mokoondo' tinulisan noyo ra Buuk Kitab, “I Abragam inapu ri Aki Kapuuno' koson sangulun ondo' mobonsoi saguli' Riso sabap ra pangintapatan nali.”

⁴ Osoi ayuk mangandoi, gajiin am gaji' nano sala' ka karaan ra taak ayuk, kaa' ginio ampos ru kandoi nano.

⁵ Kaa' osoi ayuk kalo lumansan ra kapiratan nano ra Tuhan, kaa' mangintopot ayuk ri Aki Kapuuno' ondo' mangiou ra ulun makatula no kolondo' boo kasalaan, ulun no mobonsoi saguli' ri Aki Kapuuno' sabap ra pangintapatan nali.

⁶ Kon niayuk ru raja' Daut ra io minindagu intor ra kaansukan ru ulun ondo' mobonsoi saguli' ri Aki Kapuuno', kabalu' pana kalo makalansan io ra kapiratan nano ra Tuhan. Kono,

⁷ “Pakaansuk noyo ulun ondo' kasalaan nano inampun noyo ri Aki Kapuuno' am tula nano iniru' No noyo!

⁸ Pakaansuk noyo ulun ondo' tula nano kalo boo karaan ru Tuhan.”

⁹ Ati kulaan, kaansukan ondo' sinabit ru raja' Daut ni palilion ayuk kia ra ulun ondo' sinunatan ayuk, kapoam ra ulun kalo sinunatan poyo? Maaru' karuruo! Sabap ra minindagu akai ra raitii' ni, “Nangintopot i Abragam ri Aki Kapuuno', am sabap ra pangintapatan nano Riso, inapu io ri Aki Kapuuno' koson sangulun ondo' mobonsoi saguli' Riso.”

¹⁰ Sanggilan ginio nasauk? Kalo poyo i Abragam sinunatan kia kapoam ra io sinunatan noyo? Gitio nasauk ra io kalo poyo sinunatan.

¹¹ Tauli i sinunatan io, am sunat ti tatandu' ra apuon io ri Aki Kapuuno' koson ra sangulun ondo' mobonsoi saguli' Riso sabap ra pangintapatan nali. Intor raginio io no koson ra ama' ru ngaangai' ulun ondo' mangintopot, am ondo' inapu koson ulun ondo' mobonsoi saguli' ri Aki Kapuuno', kabalu' pana kalo sinunatan ilo.

¹² I Abragam niayuk koson ra ama' ru ngaangai' ulun sinunatan, sala' ka ra sunat nilo ayuk, kaa' niayuk ra pangintapatan nilai ti mogondo' ra pangintapatan ri Abragam ra io kalo poyo sinunatan.

Bantu' ri Aki Kapuuno' apuon ru ilo ondo' mangintopot Riso

¹³ I Aki Kapuuno' nambantu' ri Abragam am ra papag nali, ra tana' ti ilo no tatangan. Ginio binantu' Nano sala' ka sabap ra giminagaya' i Abragam ra Ukum ri Musa, kaa' sabap ra nangintopot am inapu io ri Aki Kapuuno' koson ra sangulun ondo' mobonsoi saguli' Riso.

¹⁴ Amon ru bantu' ri Aki Kapuuno' pataakon ayuk risilo ondo' gumagaya' ra Ukum ri Musa, kolondo' boo arati' ru mangintopot ri Aki Kapuuno' am bantu' Nano kolondo' toojo onong.

¹⁵ Ukum ri Musa ti mangkinibit ayuk ra sangit am ukum ri Aki Kapuuno'; kaa' amon ru Ukum ri Musa no kalo mauligan, kolondo' niayuk kaanggalan.

¹⁶ Bantu' no inimpuun ra pangintapatan ru ulun ri Aki Kapuuno', maa' raginio bantu' no aruon koson ra taak intor ri Aki Kapuuno' ra ngaangai' papag ri Abragam. Sala' ka ayuk risilo ondo' gumagaya' ra Ukum ri Musa, kaa' niayuk risilo ondo' mangintopot ri Aki Kapuuno' mogondo' ri Abragam ragili. Sabap ra i Abragam koson ra ama' ru itakau ngaangai'.

¹⁷ Koson ra tinulisan noyo ra Buuk Kitab, “Inaru' tokou no masauk ra ama' ru masuang bansa'.” Koson raginio nambantu' i Aki Kapuuno' ri Abragam am nangintopot i Abragam Riso: Io no ondo' mampakaayag ra ulun minatoi am ondo' ralalom ru ragu Nano mampasauk ra atan ondo' kalo poyo igondo' kasauk.

¹⁸ Nangintopot am liminansan ayuk i Abragam ri Aki Kapuuno' kabalu' pana guang nano kolondo' boo kalansanan. Ginio boo ra sinauk io koson ra ama' ru masuang bansa', am koson tinulisan ra Buuk Kitab, “Papag muno masauk ra masuang kaga'.”

¹⁹ Paat ragili pangintapatan ri Abragam raginio kalo liminawo, kabalu' pana nampaguang io ra kolondo' lair boo sayat nano sabap ra inan nano matutuo noyo kaga', umur nali olo'-olo' maatus ngambilor am andu' nano i Sara pana tabanang.

²⁰ Kalo nagalabo i Abragam ra bantu' ri Aki Kapuuno', kaa' nangintopot io ayuk. Am minikang poyo pangintapatan nano am nongompor-ompor io boo ri Aki Kapuuno'.

²¹ Nangintopot io toojo ra atan ondo' binantu' ri Aki Kapuuno' totopot masauk.

²² Ginio ra i Abragam “inapu ri Aki Kapuuno' koson ra ulun ondo' mobonsoi saguli' Riso”, sabap ra pangintapatan nali.

²³ Ragu raginio, “inapu ri Aki Kapuuno' koson ra ulun ondo' mobonsoi saguli' Riso”, tinulisan sala' ka ri Abragam ayuk,

²⁴ kaa' ritakau niayuk. Itakau niayuk apuon ri Aki Kapuuno' koson ra ulun ondo' mobonsoi saguli' Riso, sabap ra mangintopot takau Riso ondo' nampakaayag ri Jisus, Tuhan takau, intor ra kapatayan.

²⁵ Ginio ra i Jisus no pinataak ra potoyon sabap ra tula takau, am binayag Io saguli' koson itakau mobonsoi saguli' ri Aki Kapuuno'.