RIMBAI PANGAMPARAN 1 - Tanou Moonsoi Timugon

¹ Rimbai Pangamparan ru Raja' Salomo.

Rimbai kasaa' Ruandu'

² Alaki' aku no ra bibil muno; laai muno moonsoi poyo ka wain.

³ Maamis kaga' owou muno, inggalan muno koson ra umau maamis owou ondo' pinabuur. Ginio ra ralaa-ralaa malaai rirun.

⁴ Ribaki' noyo, ibito' aku no mabaya' rirun, iou raja' kuno, ibito' aku no ra lamin muno. Okou magibit ra akai maansukan, am mongompor ra laai muno moonsoi poyo ka wain; ginio sabap ra ruandu'-ruandu' malaai rirun.

Ruandu'-ruandu' Ruandu'

⁵ Akau ralaa-ralaa ru Jirusalim, kabalu' pana maitom aku kaa' mantalur aku; kabalu' pana maitom aku koson ra kim ru Kidar, kaa' mantalur aku koson ra tabir giu' ra istana ri Salomo.

⁶ Pai' aku asabi' sabap ra kungkung kutu maitom; maitom aku sabap nakatuug ra mato ru orou. Ngaangai' pabukat kuno siminangit raki', am mampajajal raki' mangandoi ra umo ru anggur; kolondo' bulintok ku magalung ra inan kuno galama'.

⁷ Indagu no, alii ra ambai kuno, ati kia intok muno magalung ra bibiag, ati kia intok pagupuan ru domba bulintok tanga' ru orou? Kua kia uyumo' tokou mangkilolot ra sampanon ru domba longgom ru ulun magagalung ra bokon?

Ungkuyon

⁸ Kalo kia nakapandai kou ra intok nano, alii ra ruandu' ra mantalur kaga'? Bayaa' noyo babaya' ru sampanon bibiag tinambiag, am alungi' noyo ngaangai' anak ru kambing muno mamaar ra kim ru magagalung-magagalung.

⁹ Alii ra kubayau kuno, okou koson ayuk ra kuda barai ondo' makiungkuyon ra kuda gawayan ondo' mampaguyur ra kurita' sakayan ru raja' ru Misir.

¹⁰ Pingas muno nautil-util ra binadakan, liog muno murarak ayuk ondo' ginalungan ra sisigot parmata.

¹¹ Baalin mai okou ra sisigot mas, busakin ra sisigot pirok.

Ruandu'

¹² Bulintok ra raja' kuno giu' ra luyaan nano, maalok maamis owou ru narwastu kuno.

¹³ Ambai kuno koson ra mur ondo' maamis owou, bulintok ra io lumuya' ra kubab kuno.

¹⁴ Ambai kuno koson ra tuu' ru bunga' solonggo giu' ra umo ru anggur giu' ra In-Gidi.

Ungkuyon

¹⁵ Mapara' piboo kinantalur muno, alii ra kalumpusan kuno, mantalur kou kaga'! Mato muno koson ra mato ru susuit asang.

Ruandu'

¹⁶ Mapara' piboo kinaindon muno, alii ra kalumpusan kuno, maindon kou kaga'! Sakot masansam intok tano miluluya';

¹⁷ puun sidar masauk ra lugu' ru baloi tano, am puun sipris sakub nano.