MAZMUR 94 - Tanou Moonsoi Timugon

I Aki Kapuuno' mangakim ra ngaangai' ulun

¹ Iou Tuhan, Okou noyo i Aki Kapuuno' ondo' mangukum ra ulun makatula; paintalango' noyo sangit Muno!

² Okou noyo akim ru ngaangai' ulun; ingkakat no am balasi' noyo ulun malilimbau, gumondo' ra binaal nilo.

³ Kula' poyo buoi ru ulun mangalaat no maansukan? Kula' poyo buoi ru ulun mangalaat no mambaal koson raginio, iou Tuhan?

⁴ Kula' poyo buoi ru ulun malaat lumimbau, am maansukan ra kalaatan nilo?

⁵ Kinuliagai nilo ulun Muno, iou Tuhan; inimpayan nilo longgom Muno.

⁶ Potoyon nilo ulun napuor am ilo ondo' kolondo' matuo, am niayuk ulun suai ondo' minayan ra pagun mai.

⁷ Mindagu ilo, “Kalo makito akai ru Tuhan; i Aki Kapuuno' ru ulun ru Israil kalo makakito ra binaal mai.”

⁸ Akau ulun kuno, arara' boo ra sambung mino? Sanggilan kia karatian min?

⁹ Sinauk ri Aki Kapuuno' talingo – musiti' makaining Io. Sinauk No mato – musiti' makakito Io.

¹⁰ Sinangitan No ngaangai' bansa' – musiti' ukumin No ilo. Io no mangingila' ra ngaangai' ulun – musiti' masuang napandayan Nano.

¹¹ Mapandayan ru Tuhan atan ondo' pangkaraan ru ulun; mapandayan No ra ngaangai' no kolondo' ampos.

¹² Iou Tuhan, pakaansuk noyo ulun ra inila' Muno, ulun ondo' inila' Muno ra ukum Muno.

¹³ Simoyoon Mu ilo bulintok ra ilo makakapaganan, saboi nangkali ilo ra tulubong koson mapalandak ra ulun malaat.

¹⁴ Tuhan kalo manatang ra ulun Nano; kalo impayin No ulun ondo' nasauk ra longgom Nano.

¹⁵ Katimpakan pabigoron poyo ra makama, am ngaangai' ru ulun mabanis guang manungka' riso.

¹⁶ Osoi kia manungka' raki' tumingkuang ra ulun malaat? Osoi kia manaung raki' tumula' ra ulun malaat?

¹⁷ Amon ru kalo mangindangan Tuhan no raki', makasuku' aku noyo ra pagun ru ulun minatoi.

¹⁸ Bulintok ra aku mangkara' ra maratu' aku, togom Muno, iou Tuhan, mampaguut raki'.

¹⁹ Bulintok ra aku magalabo am maimamang, makimaganja' am mapabansuk Kou ra guang kuno.

²⁰ Kalo lumatok Kou ra akim ondo' kalo matimpok, ondo' mangiou ra baal ru ondo' kalo maya' ra ukum;

²¹ mampapakat ilo tumula' ra ulun moonsoi, am ukumin nilo potoyo' ulun ra kolondo' sala.

²² Kaa' Tuhan manungka' raki'; i Aki Kapuuno' kuno manindung raki'.

²³ Ukumin No ulun malaat sabap ra kinalaat nilono, am mamuso risilo sabap ra tula nilono; Tuhan, i Aki Kapuuno' takau no ondo' mamuso risilo.