MAZMUR 89 - Tanou Moonsoi Timugon

Mazmur bulintok ra pagun makakapaganan

¹ Sisindiron ri Itan, ulun Ijragi.

² Iou Tuhan, kalo langgain ku marimbai ra togom Muno ra mantilayun; potonowon ku gagaya' Muno ra sabuoi-buoi no.

³ Nakapandai aku ra togom Muno mantilayun, am gagaya' Muno mapiot koson ra limbowon.

⁴ Minindagu Kou, “Nambaal aku ra nabantuan ra ulun ondo' pinili' Kuno; binantu' Ku noyo ri Daut ulipon Kuno:

⁵ ‘Sabuoi-buoi no panturungan muno ingain Ku, sayat muno mansusugul masauk ra raja'.’ ”

⁶ Ngaangai' suang ru suruga' mongompor ra kaimuagan ondo' binaal muno, am marimbai ra gagaya' Muno, iou Tuhan.

⁷ Kolondo' mokogondo' Rirun, giu' ra limbowon no, iou Tuhan; kolondo' suang ru suruga' pana mokogondo' Rirun.

⁸ Urumaton Kou bulintok ra ulun-ulun matulai mantitimung, am kalaanin toojo ru ngaangai' ondo' nakalibung Rirun.

⁹ Iou Tuhan, i Aki Kapuuno' Ondo' Maayo Kaga' Kuasa', kolondo' noyo makakuasa' koson Rirun; Okou mampagagaya' ra nansalinut baal, iou Tuhan.

¹⁰ Raguin Mu raat ra makakinulun, palinoson Mu kinulun ra masawat simpor.

¹¹ Kuriopolon am potoyon Mu i Ragab; maayo ulun no, am kalaan Mu pantula' Muno ra kaikangan Muno.

¹² Tana' ti am limbowon Okou ra longgom, Tana' ti am niayuk suang nano Okou namangun;

¹³ ralayo am rabugus inangun Mu; Gunung Tabor am Gunung Girmon magigindii mongompor Rirun.

¹⁴ Mapara' piboo gayo ru kuasa' Muno, am mapara' piboo gayo ru kinaikang Muno!

¹⁵ Pamarintaan Muno sumugut ra ukum am katimpakan; togom am gagaya' soroi ra nansalinut binaal Muno.

¹⁶ Pakaansuk noyo ulun ondo' sumamba Rirun ralalom ru rimbai, ulun ondo' naayag ra sinda ra saang Muno, Tuhan.

¹⁷ Monsongorou ilo maansukan, am mongompor Rirun sabap ra kinoonsoi Muno.

¹⁸ Inanian Mu akai ra kamanangan maayo; sabap ra kinoonsoi Muno, pinasauk Mu atan ondo' gogoton mai.

¹⁹ Okou, Tuhan nampili' ra manindung ramon; Okou, i Aki Kapuuno' Ondo' Matulai Kaga', i Aki Kapuuno' ru ulun ru Israil nanaak ramon ra raja'.

Bantu' ri Aki Kapuuno' ri Daut

²⁰ Galing i ralalom rondo' pagilangan, minindagu Kou ra ngaangai' ulipon Muno ondo' gumagaya', “Nangindangan Aku ra sangulun tutumula'; pataakon Ku panturungan Kuno ra ulun ondo' pinili' Kuno intor ra nasuangan ulun.

²¹ Natuum Ku ulipon Kuno, i Daut am pasaukon Ku io ra raja', am riwon Ku io ra umau papasaukan.

²² Kaikangan Kuno magail mabaya' riso, kuasa' Kuno mangikang riso.

²³ Ngaangai' pantula' nano kalo makaanggal riso, ulun malaat pana kalo makagula' riso.

²⁴ Kuriopolon Ku pantula' nano, am potoyon Ku ngaangai' ulun ondo' masisang riso.

²⁵ Tatagamin Ku io am gagayaan Ku io; masalok aniin Ku io ra banang.

²⁶ Kapilaan Ku kangkou pamarintaan nano intor ra Raat Tanga' saboi ra Sungoi ru Iprat.

²⁷ Mindagu io Raki', ‘Okou noyo Ama' kuno am i Aki Kapuuno' kuno; Okou noyo manindung am mamamayag raki'.’

²⁸ Pasaukon Ku io ra buayoi Kuno ra katuaan, am masauk ra sangulun raja' ondo' matulai kaga' ra tana' ti.

²⁹ Tagamin Ku io toojo, am nabantuan Kuno riso mantilayun ra sabuoi-buoi no.

³⁰ Sangulun ra sayat nano manguasa', am pamarintaan nano mapiot koson ra limbowon.

³¹ Kaa' amon ru sayat nano manggal ra ukum Kuno, am kalo maayag sumugut ra ragu Kuno;

³² am amon ru kalo gagayaan nilo susuban Kuno, am lilianin nilo panusuban Kuno,

³³ ukumin Ku ilo sabap ra tula nilo, am mangkinibit ra ilo maimbolo' sabap ra nasalaan nilo.

³⁴ Kaa' rayusin Ku monogom ri Daut, am suguton Ku ngaangai' bantu' Kuli riso.

³⁵ Kalo luguton Ku bantu' Kuli riso, kapoam mampalugut ra atan-atan ayuk pana bantu' ondo' binaal Kuli riso.

³⁶ Ralalom inggalan Ku ra matulai, igondo' aku ayuk mambaal ra bantu' ra sabuoi-buoi no, kalo magabau Aku ri Daut.

³⁷ Mansusugul papag nano, am alungin Ku pamarintaan nano buoi ru mato ru orou soroi.

³⁸ Karajaan nano mantilayun koson ra bulan, sasi' ra mampagagaya' giu' ra limbowon.”

Sulaboi bulintok ra raja' naala

³⁹ Kaa' sumangit Kou ra raja' pinili' Muno; tinatang am inimpayan Mu io.

⁴⁰ Linugut Mu bantu' Muli ra ulipon Muno, am pinatiran Mu karaun nano ra losok.

⁴¹ Linunsai Mu timbok-timbok ru bandar no, am polosoon batu-batu silian no matuyas.

⁴² Ngaangai' ulun mansail ra giu' no mantakou ra kuliamos nano; ngaangai' ru pinasambalayan nano magasab riso.

⁴³ Pinamanang Mu pantula' nano, ondo' magibit risilo ngaangai' maansukan.

⁴⁴ Binaal Mu saboi kinandoi nilono kolondo' boo onong, am polosoon io maala bulintok ra mangayou.

⁴⁵ Kuasa' nano ra maantak pinolonggo' Mu, am panturungan nano pinatiran Mu ra tana'.

⁴⁶ Sinauk Mu raja' no tumuo ra mataki', am tinauyu' Mu io.

Pakiasian makitaak ra papalabusan

⁴⁷ Iou Tuhan, saboi sanggilan ra Okou mansibuni? Saboi sanggilan kia sangit Muno ra lumuab-luab koson ra apui?

⁴⁸ Karaa' noyo, mapara' piboo kinariwa' ru umur ru ulun; karaa' noyo ra Okou namangun ra ulun koson ilo ondo' maayag ra kalo mantilayun.

⁴⁹ Osoi kia nua' boo maayag am kalo mapandai matoi? Ati kulaan ulun makailiu ra lobong?

⁵⁰ Iou Tuhan, ati boo nua' togom pinatalang Muno ra galing i? Ati boo nua' bantu' Muno ri Daut?

⁵¹ Karaa' noyo Tuhan, ati kulaan ra ulipon Muno tauyuon; ati kulaan ra aku mansaan ra ulas ru bansa'-bansa'.

⁵² Pantula'-pantula' Muno manauyu' ra raja' pinili' Muno, iou Tuhan! Ati ayuk ongoyon ru raja' no, asabin nilo io.

⁵³ Omporo' noyo Tuhan ra sabuoi-buoi no! Amin! Amin!