MAZMUR 80 - Tanou Moonsoi Timugon

Pakiasian ra mapatapuli' ra bansa'

¹ Ra tingganai ru santimungan maririmbai. Sumugut ra rimbai: Bunga' Bakung. Mazmur kaintutunan ri Asap.

² Rongogo' akai no, okou Magagalung ra ulun ru Israil; Okou no naningganai ra ulun Muno. Okou no manturung ra tampak ru kirub,

³ intalang No ra bansa' ri Ipraim, Binjamin, am i Manasi! Pabalaa' noyo kuasa' Muno; ratong no am bayago' akai no!

⁴ Patapulio' akai, iou Aki Kapuuno'! Pakaasi' no ramon maa' raginio maayag akai!

⁵ Iou Tuhan i Aki Kapuuno' Ondo' Maayo Kaga' Kuasa', saboi sanggilan Okou sumangit am kalo mangkirongog ra pakiasian ru ulun Muno?

⁶ Manaak Kou ramon ra imbolo' koson ra akanon, am lomou ra masuang koson ra inumon.

⁷ Polosoon Mu bansa'-bansa' ra libung no mangayou sabap ra gogot nilo mampagaau ra pagun mai; pantula'-pantula' magasab ramon.

⁸ Patapulio' akai, iou Aki Kapuuno' Ondo' Maayo Kaga' Kuasa'. Pakaasi' no ramon maa' raginio maayag akai.

⁹ Ibiton Mu ulun Muno ondo' koson ra puun ru anggur mingkual ra Misir; ininggalaran Mu bansa'-bansa' ra bokon, am tinanom Mu puun no ra pagun nilo.

¹⁰ Inulaan Mu io ra tana'; bakat nano rumalalom am sumanai ra titikop ru pagun no.

¹¹ Babara' nano makasindung ra bulur-bulur, am raan-raan nano makasindung ra tataun mangasawat.

¹² Pango-pango nano sumanai ra Raat Tanga', umbus-umbus nano makasuku' ra Sungoi Iprat.

¹³ Kua lunsayo' Mu insor? Ragino ulun mansail no makapantakou ra kawa' ru anggur nano.

¹⁴ Papanjakon ginio ru basing, am bibiag masigo pana mangakan raginio.

¹⁵ Ratong No ramon, iou Aki Kapuuno' Ondo' Maayo Kaga' Kuasa'. Ilai' akai no intor ra suruga'; ratong no am bayago' noyo ulun Muno!

¹⁶ Bayago' noyo ulun Muno ondo' koson ra puun ru anggur tinanom Muli, am tutuu' bagu ondo' sinauk Mu ra mokotog.

¹⁷ Puun no sinuruan am tinagar ru pantula' maino; polosoon noyo ilo maimbolo' ra sangit Muno!

¹⁸ Sindungi' am alungi' noyo ulun ondo' pinili' Muno, bansa' ra sinauk Muno maikang toojo.

¹⁹ Kalo boo masaga' akai manatang Rirun; polosoon noyo akai maayag, am mongompor akai Rirun.

²⁰ Patapulio' akai, iou Tuhan i Aki Kapuuno' Ondo' Maayo Kaga' Kuasa'. Pakaasi' no ramon maa' raginio maayag akai.