MAZMUR 79 - Tanou Moonsoi TimugonPakiasian koson kalabusan ru bansa' 1 Mazmur ri Asap. Iou Aki Kapuuno', ulun ondo' kalo makaulig Rirun minayan ra tana' Muno. Jinamol nilo Baloi Muno ondo' matulai am manuyas ra Jirusalim. 2 Baangkai ru ulun Muno tinatang nilo koson paakanin ra susuit ondo' maangkan ra baangkai. Baangkai ru ulipon-ulipon Mu pinoloso nilo paakanin ra bibiag masigo. 3 Sasarin nilo raraa' ru ulun Muno koson ra timug; raraa' tumilis ra titikop ru Jirusalim, am kolondo' ulun mompolobong ra ulun minatoi. 4 Ngaangai' bansa' ra paginggaar mangiis ramon; makakurit ilo am magagasab ramon. 5 Iou Tuhan, kula' buoi Muno sumangit ramon? Sangit Muno sumolob kia koson ra apui? 6 Sangiti' noyo bansa'-bansa' ondo' kalo sumamba Rirun; ulun ondo' kalo makiasi' Rirun, 7 sabap ra nampatoi ilo ra ulun Muno am namunsai ra pagun Muno. 8 Pai' akai ukumi' sabap ra tula ru kinamatuaan maili, kaa' pakaasi' no ramon ra mataki', sabap ra akai malawo guang. 9 Indangano' akai no, iou Aki Kapuuno', mamamayag ramon; ralalom ru katulayan Muno galama', bayago' akai no am ampuno' noyo tula mai. 10 Pai' polosoo' bansa'-bansa' ra bokon mangkuot, “Ati i Aki Kapuuno' mini?” Ukumi' noyo bansa'-bansa' raginio ra saang mai sabap ra napasasar ilo ra raraa' ru ulipon-ulipon Muli. 11 Rongogo' noyo pagalabaan ru ulun inaput, am ralalom ru kuasa' Muno ra maayo, palabuso' noyo ulun inukum ra potoyon. 12 Iou Tuhan, balasi' noyo bansa'-bansa' raginio intulu' ruli', sabap ra nagasaban nilo Rirun. 13 Akai pana, ulun Muno, domba-domba Muno, maringkuanang akai Rirun ra sabuoi-buoi no, am mongompor Rirun saboi mansasayat. |
Hakcipta © Bible Society of Malaysia, 2013.
Bible Society of Malaysia