MAZMUR 66 - Tanou Moonsoi Timugon

Rimbai pangamparan am paringkuanangan

¹ Ra tingganai santimungan maririmbai. Rondo' rimbai. Omporo' am indiyo' i Aki Kapuuno', akau ngaangai' ulun!

² Paririmbai kano am katulayo' inggalan Nano; Urumato' am omporo' Io!

³ Indagu kano ri Aki Kapuuno', “Ngaangai' binaal Muno makaimuag toojo! Maayo kaga' kuasa' Muno saboi pantula' kumuku' malaa' ra saang Muno.

⁴ Ngaangai' ulun ra tana' ti sumamba Rirun; marimbai ilo mongompor ra inggalan Muno.”

⁵ Ibok no am ilai' noyo atan ondo' binaal ri Aki Kapuuno', binaal Nano makaimuag ra tatanga' ru ulun.

⁶ Kulawon No raat masauk ra tana' mapua', am kinamatuaan maili nantana' ra liminaup. Giu' no maansukan akai sabap ra binaal Nano.

⁷ Namarintaan Nano matulai ra sabuoi-buoi no, am ngaangai' bansa' alungin No. Pai' sangulun pana tumula' Riso!

⁸ Omporo' noyo i Aki Kapuuno' maino, akau ngaangai' bansa', polosoo' ulun mangkirongog ra pangamparan mino Riso.

⁹ Inalungan No akai maa' raginio kalo imboloon akai, am kalo polosoon No akai kalaan.

¹⁰ Iou Aki Kapuuno', nangkinam Kou ramon, koson ra pirok inisasan ra apui.

¹¹ Pinoloso Mu akai makasulung ra jajaling am simbagatin Mu akai toojo.

¹² Polosoon Mu pantula' manginjang ramon; pansailan maino liur am apui, kaa' raino inibit Mu akai ra intok ondo' langkaya'.

¹³ Magibit aku ra taak ra sinolob ra Baloi Muno; gagayaan ku bantu' kuli Rirun,

¹⁴ bantu' ra rinagu kuli, bulintok ra aku makakapaganan.

¹⁵ Pataakon ku tinambiag ra kinolomok koson patunuon ra altar; pataakon ku taak ioginio sapi' gawayan am kambing, am lisun nano sumimpor ra limbowon.

¹⁶ Ibok no am rongog no, akau ngaangai' ulun ondo' mangurumat ri Aki Kapuuno', tunungon ku atan ondo' binaal Nano raki'.

¹⁷ Mampiau aku makiindangan Riso; marimbai aku mongompor Riso.

¹⁸ Amon polosoon ku tula ralalom ru guang kutu, maaru' kalo iningon aku ru Tuhan.

¹⁹ Kaa' sotopot no nangkirongog noyo i Aki Kapuuno' raki'; iniou No pakiasian kuno.

²⁰ Omporon ku i Aki Kapuuno', sabap ra kalo inimpayan No pakiasian kuno, am kalo langgain No monogom raki'.