MAZMUR 42 - Tanou Moonsoi Timugon

BUUK KARUO ( Mzm. 42—72 ) Pakiasian bulintok minayan ra namatiran

¹ Ra tingganai ru santimungan maririmbai. Sisindiron ru bansa' ri Kora.

² Koson ra tambang moondom ra timug ru sungoi, koson niayuk ra salibuor kuno moondom Rirun, iou Aki Kapuuno'.

³ Moondom aku Rirun, i Aki Kapuuno' ondo' maayag; sanggilan kia aku makasambayang ra saang Muno?

⁴ Orou rondom aku mantangi', lomou ayuk akanon kuno; magail ayuk pantula' kuno mangkuot raki', “Ati kia i Aki Kapuuno' muli?”

⁵ Makuliagai guang kuno amon karaan orou ra nakasail, bulintok ra aku nakapasumbaya' ra ulun masuang minongoi ra Baloi ru Tuhan, am minugar aku ra siminigulu risilo, magilakup am marimbai ra rimbai mongompor.

⁶ Kua pangiluk guang kuno? Kua kia pagalabo aku? Malansan aku ri Aki Kapuuno' am igondo' poyo aku mongompor Riso, i Aki Kapuuno' kuno am mamamayag raki'.

^7-8 Ra intok ru namatiran ti guang kutu nakuliagai, ginio ra mangkara' aku ra Tuhan. Salibuor kuno naabas ra aug ru pangilukan; nasakob aku ru liur kajajawan, koson ra bolos ru bosoi Sungoi Jordan intor ra Gunung Girmon am Gunung Mijar.

⁹ Gama' ru mapakito Tuhan ra togom Nano bulintok matawang; maa' raginio mokopongompor aku Riso bulintok rondom, am makiasi' ri Aki Kapuuno', puun ru kaayagan kuno.

¹⁰ Ri Aki Kapuuno', manungka' raki', mindagu aku, “Kua kia pampalilian Kou raki'? Kua kia tanduusi' ku magiba' ra imbolo', kinibit ru kalaatan ru pantula' kuli?”

¹¹ Mangiluk aku kaga' mangkirongog ra ilo magasab. Magail ilo mangkuot, “Ati kia i Aki Kapuuno' muli?”

¹² Kua kia pangiluk guang kuno? Kua kia pagalabo aku? Malansan aku ri Aki Kapuuno', am igondo' poyo aku mongompor Riso, i Aki Kapuuno' kuno am mamamayag raki'.