MAZMUR 31 - Tanou Moonsoi Timugon

Lumansan ri Aki Kapuuno'

¹ Mazmur ri Daut.

² Sumindung aku Rirun, iou Tuhan, pai' aku polosoo' tauyuon. Okou i Aki Kapuuno' ra matimpok; bayago' aku no.

³ Rongogo' aku! Bayago' aku ra mataki'! Sauk no ra batu silian kuno koson mangampin raki', am manunungka' kuno koson mamayag raki'.

⁴ Okou no kalansanan am manungka' raki'; ilaa' aku no maya' ra bantu' Muli.

⁵ Palabuso' aku no intor ra jajaling ondo' inatang nilo mamatoi raki'; Okou noyo intok kuno sumindung.

⁶ Pataakon ku inan kutu koson alungin Mu. Bayagon Mu aku, iou Tuhan, i Aki Kapuuno' ondo' mampagagaya' toojo.

⁷ Kasisangin Mu ulun sumamba ra sinungkalalaing, kaa' mangintopot aku ra Tuhan.

⁸ Maansukan am magitapap aku ra longon, sabap ra Okou noyo monogom raki'. Makito Mu imbolo' kuno; am mapandayan Mu kapaganan kuno.

⁹ Kalo polosoon Mu aku rokopon ru pantula'; Okou noyo napalabus raki' mugar.

¹⁰ Pakaasi' no raki', iou Tuhan, sabap ra aku ti makakapaganan; mapari' mato kutu ra tangi'; salibuor kuno naimbolo'.

¹¹ Guang mangiluk napariwa' ra bayag kuno, am pantangian ru guang napariwa' ra painawo kuno. Kapaganan kuno nangkinibit ra inan kuno kalo maligag, am niayuk bungul kuno mongopopol.

¹² Ngaangai' pantula' kuno mangiis raki'; ilo ondo' pasambalayan kuno magasab raki'; ilo ondo' makaulig raki' malaa' raki'; magigiru' ilo amon ru makauma' raki' ra ralan.

¹³ Linilianan aku no koson ra minatoi aku no; aku ti koson ra ginsamol.

¹⁴ Masuang maining ku ra ragu intor ra pantula' kuno; ra libung kuno mokoondo' tanou ra malaat kaga'. Maguguum ilo koson makimantula' raki', am mangatang ilo mamatoi raki'.

¹⁵ Kaa' malansan aku Rirun, iou Tuhan; Okou noyo i Aki Kapuuno' kuno.

¹⁶ Masalok Kou magalung raki'; bayago' aku no intor ra pantula' kuno am intor risilo ondo' mangimbolo' raki'.

¹⁷ Gama' ru apuon Mu ulipon Muno; sabap ra togom Muno bayago' aku no.

¹⁸ Mampiau aku Rirun, iou Tuhan; pai' aku polosoo' tauyuon. Polosoo' ayuk ulun malaat tauyuon, am kalinuos nilo tumuun ra intokon ru ulun namagatoi.

¹⁹ Polosoo' noyo ulun-ulun maabau-abau tumambungangang, sabap ra malilimbau ilo am magasab ra ulun ondo' mabanis guang.

²⁰ Mapara' kia boo nalimpak bonsoi Muno ondo' inatang Mu ra ulun ondo' mangurumat Rirun. Moonong ulun magilong ra bonsoi ru binaal Muno ra ulun ondo' siminindung Rirun.

²¹ Pinasibuni Mu ilo ra intok ratangan Muno, ondo' kalo majajou ra paguguuman ru ulun; pinasibuni Mu ilo ra intok mapiot ondo' kalo boo maasaban ilo ru pantula' nilono.

²² Koompor kono Tuhan! Togom Nano makaimuag kaga', paat ra aku liniputan am binulunsar ru pantula'.

²³ Malaa' aku ra indoson ku ru manginggalar Tuhan no raki' ra intok ratangan Nano. Kaa' rinongog No nampiawan kuli, paat ra aku makiindangan Riso.

²⁴ Tagami' noyo Tuhan, akau ngaangai' ru ulun Nano ondo' gumagaya'. Tuhan manindung ra ulun ondo' gumagaya', kaa' mangukum ra ulun malilimbau.

²⁵ Kaikango' am posoroto' guang mino, akau ngaangai' ondo' lumansan ra Tuhan.