MAZMUR 22 - Tanou Moonsoi Timugon

Pakiasian bulintok ra makakapaganan am rimbai ra mongompor

¹ Ra tingganai ru santimungan maririmbai. Sumugut ra rimbai: Tambang bulintok ra susuab ti. Mazmur ri Daut.

² Aki Kapuuno' kuno, iou Aki Kapuuno' kuno, Kua tatango' Mu aku? Mampiau aku Rirun kaa' lakat Kopo maalur, am kalo mangindangan raki'.

³ Orou ti mampiau aku Rirun, iou Aki Kapuuno', kaa' kalo tumaam Kou; bulintok molondom mampiau aku, kaa' lakat guang magalabo.

⁴ Kaa' Okou Raja' Ondo' Matulai kaga', ondo' omporon ri Israil.

⁵ Okou noyo intopoton ru kinamatuaan maili; mangintopot ilo Rirun am mamayag Kou risilo.

⁶ Mampiau ilo Rirun am painggaluron Mu ilo intor ra makalalaa' no; mangintopot ilo Rirun am kalo pansagulian guang nilono.

⁷ Kaa' aku ti ulor am sala' ka ulun, ondo' asasabin am ulalason ru ulun.

⁸ Ngaangai' ulun magilong raki' manganja' raki'; mangundilai am pampisikon nilo ulu.

⁹ Mindagu ilo, “Mangintopot kau ra Tuhan, kaa' bakua pai' Io pamayag ramuyun? Amon ru tagamin kau ru Tuhan, bakua pai' Io pangindangan ramuyun?”

¹⁰ Okou noyo, iou Tuhan, ondo' napaingkual raki' intor tininai' ru ina' kuno, am bulintok ra aku lalagang ayuk poyo, Okou noyo magalung raki'.

¹¹ Intor ra kakaanak, sumingkayut aku Rirun; intor ra aku tininai', Okou noyo i Aki Kapuuno' kuno.

¹² Pai' noyo inggalur intor raki'. Kapaganan mamaar noyo, am kolondo' sangulun pana mangindangan.

¹³ Masuang pantula' liminibung raki'; ilo ngaangai' liminiput raki' koson ra karabau kataunan intor ra pagun Basan.

¹⁴ Gaalon nilo kabang koson ra singa', mansangal am manungaap raki'.

¹⁵ Kolondo' boo lulu' kuno, natatak koson ra timug nasasar. Ngaangai' ru bungul kuno naukuk; guang kuno timinanu' koson ra dian.

¹⁶ Bambalangan kuno mapua' koson ra kaau, am rila' kuno siminokot ra kaar. Tatangon Mu aku ra rasawat ru kaau, koson ra ulun minatoi.

¹⁷ Santimungan ulun mangalaat liminiput raki'; koson ra santimungan uku', liminibung raki'; kumokot ilo ra longon am niayuk kalayam kuno.

¹⁸ Ngaangai' ru bungul kuno makito. Pantula' magilong raki' koson ra ilayan;

¹⁹ tatayaron nilo bayang kuno am magugundi' ilo koson mangaru' osoi kia makaalap ra sukub kuno.

²⁰ Iou Tuhan, pai' noyo inggalur intor raki', katakio' ratangan Muno koson mangindangan raki'.

²¹ Bayago' aku intor ra larom ru ilang; bayago' aku intor ra saam ru uku'.

²² Kolondo' boo ikang kutu, palabuso' aku intor ra sangau ru karabau am intor ra kabang ru singa'.

²³ Potonowon ku ra ngaangai' ulun kuno atan ondo' binaal Muno raki'; am ralalom pantitimungan nilo omporon Tokou.

²⁴ Koompor noyo Io, akau ngaangai' ulun mangintopot ra Tuhan! urumato' min Io, akau ngaangai' papag ri Jakub; sambaa' min Io, akau ngaangai' ulun ru Israil!

²⁵ Kalo asabin No ulun ra inimpayan kapoam mampalilian ra imbolo' nilono; kalo minggalur Io intor risilo, kaa' mangining Io risilo paat makiindangan Riso.

²⁶ Ralalom pantitimungan maayo ru ulun mangintopot Rirun, omporon Tokou sabap ra ngaangai' ondo' binaal Muno; ra talupak ru ngaangai' ulun ondo' sumamba Rirun patutuyon ku taak ondo' binantu' kuli.

²⁷ Ulun balabag mangkan am maasug; ilo ondo' matong ra Tuhan mongompor Riso. Gama' lumangkaya' ilo ra sabubuoi no!

²⁸ Ngaangai' bansa' mangkara' ra Tuhan am sumaguli' Riso; ngaangai' tayar ru bansa' sumamba Riso.

²⁹ Tuhan noyo Raja' am Io namarinta ra ngaangai' bansa'.

³⁰ Ngaangai' ulun malilimbau igugulatur Riso; ngaangai' ulun igugulatur ra saang Nano.

³¹ Papag ra orou matong no niayuk mangandoi ayuk Riso; inggalan ru Tuhan sunuron ru ulun ra papag nilono.

³² Ulun ondo' anakon ra orou ra matong no sunurin; ra namayag Tuhan ra ulun ondo' mangintopot Riso no.