MAZMUR 148 - Tanou Moonsoi Timugon

Tana' ti am limbowon, omporo' noyo Tuhan !

¹ Omporo' noyo Tuhan! Omporo' noyo Tuhan, akau ngaangai' suang ru suruga', akau ondo' minayan ra intok masawat.

² Omporo' Iono, akau ngaangai' malaikat Nano, omporo' Iono, akau ngaangai' saujor ru suruga'.

³ Omporo' Iono, akau mato ru orou am bulan; omporo' Iono, akau ngaangai' butitin ondo' murarak!

⁴ Omporo' Iono, okou limbowon ondo' masawat kaga', omporo' Iono, okou timug giu' ra rasawat ru limbowon.

⁵ Moonsoi poyo ngaangai' no mongompor ra inggalan ru Tuhan; sabap ra ngaangai' no binangun intor ra nanusuban Nano.

⁶ Ralalom ru panusuban Nano, inaru' No ngaangai' intokon ra sabuoi-buoi no, am ngaangai' no musiti' masalok gumagaya' ra nangaruan Nano.

⁷ Omporo' noyo Tuhan, akau ngaangai' minayan ra tana' ti, ngaangai' tambuakal ru raat am titikop ru raat ra malandom;

⁸ akau ganit am rasam batu, ais am gaun, am niayuk bagiu' ondo' gumagaya' ra susuban Nano.

⁹ Omporo' Iono, bulur am gunung, puun ru kinawa' am kataunan,

¹⁰ ngaangai' bibiag ra makaup am masigo, ondo' maayo kapoam boborok, am niayuk susuit.

¹¹ Omporo' Iono, akau ngaangai' raja' am ngaangai' bansa', ngaangai' namarinta am ngaangai' mangunguasa',

¹² ngaangai' kamulakan ruandu' am ungkuyon, matutuo am mamulok.

¹³ Ilo ngaangai' no musiti' mongompor ra inggalan ru Tuhan! Matulai poyo Io ka bokon no; maayo poyo kuasa' Nano kaa' ngaangai' soroi ra tana' ti am suruga'.

¹⁴ Kinaikang No ulun Nano, maa' raginio omporon Io ru ngaangai' ulun Nano, ulun ru Israil ondo' tinagaman Nano. Omporo' noyo Tuhan!