MAZMUR 103 - Tanou Moonsoi Timugon

Togom ri Aki Kapuuno'

¹ Mazmur ri Daut. Omporo' noyo Tuhan, alii ra salibuor kuno! Omporo' noyo inggalan Nano ra matulai, alii ra guang kuno!

² Omporo' noyo Tuhan, alii ra salibuor kuno, am pai' liliani' kaansayan Nano.

³ Inampun No ngaangai' tula kuno, am namabas ra nansalinut maruol kuno;

⁴ iniliwan No aku intor ra kapatayan am binarakat no aku ra togom am asi';

⁵ jinala' No aku ra kaayagan mongoonsoi, saboi aku mamulok ayuk am maikang koson ra susuit kanui.

⁶ Saungon ru Tuhan ulun ra inimpayan am baalon Nano maya' ra katimpakan.

⁷ Pabalaan No inatang Nano ri Musa, am binaal Nano ra bansa' ru Israil.

⁸ Tuhan motogom am maupus, maawar orot ru guang, am napanu' ra togom.

⁹ Kalo masalok Io sumangit, am kalo masalok Io mansuli'.

¹⁰ Kalo mangukum Io ritakau pabayaan ra tula takau. Kalo balasin No itakau pabayaan ra kasalaan takau.

¹¹ Kaa' koson ra kinasawat ru limbowon intor ra tana' ti, kinasawat raginio niayuk togom Nano ra ulun ondo' mangurumat Riso.

¹² Koson ra kinaalur ru sirangon intor ra kalasaan, kinaalur raginio niayuk tula takano patirin No.

¹³ Koson ra sangulun ama' makaasi' ra ngaangai' anak nano, ginio niayuk Tuhan makaasi' ra ulun ondo' mangurumat Riso.

¹⁴ Nakapandai Io ati koson itakau binaal, Makara' No ra itakau ti kaau ayuk.

¹⁵ Ulun koson ayuk ra sakot, ondo' tumuu' am mungkalar koson ra busak giu' ra padang.

¹⁶ Bulintok masiob ru angin, bunga' no matatak, kolondo' boo ulun makakito riso.

¹⁷ Kaa' Tuhan magulayun monogom ra ulun ondo' mangurumat Riso, am kaansayan Nano soroi saboi ra sabuoi-buoi no,

¹⁸ ra ilo ondo' gumagaya' ra nabantuan Nano, am gumagaya' ra susuban Nano.

¹⁹ Mambaal Tuhan ra panturungan Nano giu' ra suruga'; Io noyo raja' ondo' manguasa' ra ngaangai' No.

²⁰ Omporo' noyo Tuhan, akau ngaangai' malaikat ondo' maikang am mapanggol, ondo' mangkirongog am mambaal ra susuban Nano!

²¹ Omporo' noyo Tuhan, akau ngaangai' saujor ru suruga', akau ondo' nambaal ra kasagaan Nano!

²² Omporo' noyo Tuhan, ngaangai' binangun ra titikop intok ra pinarinta Nano. Omporo' noyo Tuhan, alii ra salibuor kuno!