MAMPATANOU 7 - Tanou Moonsoi Timugon

Guangon intor ra kaayagan ru ulun

¹ Inggalan moonsoi maamis poyo owou intor ra umau maamis owou ondo' mologo, am moonsoi poyo orou ru patayan intor ra orou naganakan.

² Moonsoi poyo mongoi pagilong ra sambaloi ondo' mangulir intor ra sambaloi ondo' makabunsag, sabap ulun maayag musiti' mangkara' ra patayan ondo' masalok maginaa ritakau ngai'.

³ Moonsoi poyo kangilukan ru guang intor ra makakurit; polosoo' ayuk bulos malaut kaa' guang maansukan.

⁴ Ulun kalo matanda' masalok mangkara' ra katasuan; ulun mapintar masalok mangkara' ra patayan.

⁵ Moonsoi poyo sinawai ru ulun mapintar intor ra inompor ru ulun kolondo' katandaan.

⁶ Kukurit ru ulun kalo matanda' kolondo' arati', koson ra bolos ru ruui ondo' sinolob ra apui.

⁷ Amon ulun mapintar no magabau, ilo no kolondo' katandaan. Amon ru ulun mangapu ra rasua, ilo nampalunsai ra paliso moonsoi.

⁸ Pupus ru rorondo' baal moonsoi poyo intor ra talimpuun nano. Tumaan guang moonsoi poyo intor ra masawat guang.

⁹ Pai' kaluoi sumangit; ondo' ulun kalo matanda' ayuk mampauli ra suli'.

¹⁰ Pai' no igogondo' pangkuot, “Kua nua' baal ra galing i moonsoi poyo ka raino?” Pangkuatan koson raginio kalo matanda'!

¹¹ Moonong ulun ondo' maayag musiti' makakapintaran; baal raginio nogondo' ayuk bonsoi nano koson mangapu ra tungkuson,

¹² am nanampilon koson ra ruit. Pakaansuk noyo ulun ondo' nakapandai ra kapintaran no manindung ra ulun nompolonggom no.

¹³ Guango' noyo baal ondo' binaal ri Aki Kapuuno'. Osoi nua' makabanis ra atan ondo' pinandikong ri Aki Kapuuno'?

¹⁴ Paat ra okou matasu', pakaansuk no; am paat ra okou makakapaganan, karaa' noyo ra katasuan am kapaganan, karuruo no minatong intor ri Aki Kapuuno'. Ulun kalo makapandai ra atan ondo' masauk ra matong no.

¹⁵ Kaayagan kutu kolondo' onong, nakakito aku no ra ngaangai'. Sanganuan ulun ondo' moonsoi no matoi kabalu' pana moonsoi ilo. Sanganuan ondo' ulun malaat no maawar painawo kabalu' pana malaat ilo.

¹⁶ Ginio ra pai' no koonsoi kaga' kapoam kapintar kaga'; kua pamuso ra inan galama'?

¹⁷ Kaa' pai' no kalaat kaga' am kolondo' katandaan kaga'; kua patoi ra kalo poyo bulintok nano?

¹⁸ Inggalur no intor ra karuruo baal ra malaat no. Amon ru mangurumat takau ri Aki Kapuuno', maaru' itakau makasugut.

¹⁹ Kapintaran mampasauk ra nopolonggom nano maikang poyo intor ra mopor ngaulun panguasa' ralalom ru rondo' bandar.

²⁰ Ra tana' ti kolondo' sangulun pana ondo' masalok mambaal ra moonsoi am kalo igondo' nambaal ra kalaatan.

²¹ Pai' lioo' ngaangai' ragu ru ulun. Maaru' lair makaining kou ra ulipon muli magulas rirun,

²² am makapandai kou ra okou niayuk magail magulas ra ulun ru bokon.

²³ Ngaangai' no nakinaman ku noyo maya' ra kapintaran kuno. Gumogot aku koson mokoowot ra kapintaran, kaa' kalo niayuk noowot ku.

²⁴ Atan koson sasangulun no makapandai ra arati' ru kaayagan? Baal raginio malandom kaga' am mapagon kaga' aration.

²⁵ Gumogot aku migigila' am maguyum ra kapandayan koson makaalap ra kapintaran am taam ru kinuatan kuli. Kinamin ku aratio' ra kolondo' katandaan no kalaatan am kolondo' guang no tutuyangon.

²⁶ Nakapandai aku no ra baal ragitio mapait poyo intor ra kapatayan: Guang lumaai ru ruandu' koson ra ralo kapoam landak ondo' nakatampos mamparakop ra ondo' rokopon nano. Ganggol nano koson ra bangkil ondo' nakabangkil ra naigot. Ulun ondo' nambaal ra kasagaan ri Aki Kapuuno' makalabus, kaa' ulun makatula rokopon.

²⁷ Ilai' noyo, ragu ri Ulun Mangkara': Nakapandai aku no ra baal raginio sanganu ka sanganu koson maguyum aku ra taam nano.

²⁸ Naguyum aku niayuk ra taam ra bokon, kaa' kolondo'. Ralalom saribu ngaulun, nakatuum aku ra sangulun ungkuyon ondo' urumaton kuno, kaa' ra ilo ngai' kolondo' ruandu' ondo' urumaton kuno.

²⁹ Gitio ayuk ondo' inigilaan kuno: I Aki Kapuuno' mangaru' ritakau masauk ra mabanis guang, kaa' itakau galama' ti ondo' manumbalik ra ragu.