KASAUKAN 47 - Tanou Moonsoi Timugon

Minuma' i Jakub ra raja' ru Misir

¹ Ibito' boo ri Jusup limo ngaulun pagaka' nano muma' ra raja'. Kono ra raja' i, “Ama' am pagaka'-pagaka' kuno intor ra Kanaan nakasuku' noyo nababaya' ra ngaangai' kambing am domba, sapi' am ngaangai' kuliamos nilono. Raino soroi ilo ra libung ru Gosyin.”

² Pauligo' no boo pagaka'-pagaka' nano ra raja'.

³ Pangkuot raja' no risilo, “Atan kandoi min ti?” Taam ilo, “Akai ti magagalung ra biniag mogondo' ra kinamatuaan maili.

⁴ Minatong akai ragiti koson mayan ra pagun ti sabap ra bitilan giu' ra tana' ru Kanaan makalalaa' saboi kolondo' sakot ru limayak kotopon ru biniag maino. Malansan akai mangiou kou ramon mayan ra libung ru Gosyin.”

⁵ Indagu raja' ri Jusup, “Raino ama' am pagaka'-pagaka' muno nakaratong noyo ragiti,

⁶ baalo' min tana' ru Misir ti koson akau ra ampu' raino. Polosoon ilo noyo mayan ra libung ru Gosyin, libung ondo' moonsoi kaga' ra pagun ru Misir ti. Amon ru mokoondo' matasik risilo no, paalungin ku biniag kuno galama'.”

⁷ Pauligo' niayuk ri Jusup ama' nano ra raja'. Pambarakat i Jakub ra raja',

⁸ am pangkuot raja' no riso, “Kula' noyo umur muti?”

⁹ Taam i Jakub, “Umur kutu ra sangulun majajawot ti maatus am talu ngoopor ngambilor noyo. Buoi ru ginio malimanan ra sangkinolor ayuk am masuang kapaganan, sala' ka koson ra kaayagan ru kinamatuaan kuli ra majajawot.”

¹⁰ Anii' ri Jakub raja' no ra barakat pantuliaran am ugar.

¹¹ Paayano' boo ri Jusup ama' am pagaka'-pagaka' nano ra tana' ru Misir. Anii' no ilo ra rapu' iono tana' ondo' moonsoi kaga' mamaar ra bandar Ramisis, koson ra nanusuban ru raja' no.

¹² Tinampasan ri Jusup ra akanon ama' nano, pagaka'-pagaka' nano am ngaangai' sasambaloi ru ama' nano, nakaaya' ondo' mangamulok poyo kaga'.

Bitilan

¹³ Bitilan no liminanja' poyo saboi kolondo' akanon ra ati-ati intok. Ulun-ulun ru Misir am ulun-ulun ru Kanaan mangalaut am kalo makalulu' sabap ra nangaitilan.

¹⁴ Moonong ra ilo mambali ra gandum, luluron ri Jusup ngaangai' ruit no am ibito' ra istana raja'.

¹⁵ Paat nangakayan ra ruit ulun ru Misir am Kanaan, ratong ulun ru Misir ri Jusup am indagu, “Anii' akai ra akanon! Pai' polosoo' akai matoi. Nakayaan akai noyo ra ruit.”

¹⁶ Taam i Jusup, “Amon ru nakai' noyo ruit mino, pataako' biniag mino, aniin takamin ra akanon.”

¹⁷ Pataako' nilo boo biniag nilono ri Jusup am anii' ilo ra akanon pangalig ra kuda, domba, kambing, sapi' am kaladai. Bilor raginio nangani' i Jusup risilo ra akanon koson alig ra ngaangai' biniag nilono.

¹⁸ Bilor ra sumunu' no ratong ilo poyo ri Jusup am indagu, “Tuan, mambala' akai toojo rirun, ruit mai nakai' noyo am biniag mai pana naalap mu noyo. Kolondo' atan-atan pataakon mai rirun, ondo' ayuk am akai galama' am tana' mai.

¹⁹ Pai' polosoo' akai matoi! Pai' polosoo' umo maino malaparan. Balio' akai am tana' maino koson pangalig ra akanon no. Akai masauk ra ulipon ru raja' am umo maino raja' ra ampu'. Anii' akai ra gandum am kalo boo matoi akai, am anii' akai niayuk ra sampug patiason mai ra umo maino!”

²⁰ Balio' ri Jusup ngaangai' tana' ru Misir no tayar ru raja'. Najajalan moonong ulun ru Misir mantalan ra tana' nilono sabap ra bitilan no maaja', am ngaangai' tana' ru Misir no raja' boo ra ampu'.

²¹ Ngaangai' mamagun ru Misir inulipon ri Jusup.

²² Tana' ra kalo binali no iono tana' ru imam-imam. Kalo pana talanon nilo tana' nilono sabap ra mokoondo' ilo ra elaun magulayun intor ra raja' koson pakuan ru kaayagan nilo.

²³ Indagu i Jusup ra mamagun, “Ilai', binali takamin am tana' mino tayar ru raja'. Gitio noyo sampug ondo' patiason min ra umo mino.

²⁴ Paat ra mangkumos pataaki' min sampilimo intor ra ampos no ra raja'. Suwo no alapon min ra sampug am akanon min am sasambaloi mino.”

²⁵ Taam ilo, “Tuan, namayag kou ramon am moonsoi kou kaga' ramon. Masaga' akai sumauk ra ulipon ru raja'.”

²⁶ Ginio ra pambaal i Jusup ra ukum ru tana' ru Misir, iono sampilimo intor ra ampos ru umo nilono musiti' raja' ra ampu'. Saboi raino ukum no lakat ayuk poyo paugaron. Tana' ru imam-imam ayuk sala' ka raja' ra ampu'.

Kitaakon pupus ri Jakub

²⁷ Minayan ulun ru Israil ra pagun ru Misir giu' ra libung ru Gosyin, am liminangkaya' ilo am makaanak ra masuang.

²⁸ Mopor am tulu' ngambilor i Jakub minayan ra Misir, am saboi umur nano maatus apat ngoopor am tulu' ngambilor.

²⁹ Paat ra mamaar noyo io matoi, piawo' no anak nano i Jusup am indagu riso, “Poompoyo' kalindu' muno ra lolot ru karuruo puun ru paa kutu, am pagibot noyo ra kalo mompolobong kou raki' ra pagun ru Misir ti.

³⁰ Masaga' aku lobongon ra intok ru kinamatuaan kuli. Ibito' aku mingkual ra Misir am ongoyo' aku lobongo' ra kalabangan nilai.” Taam boo i Jusup, “Suguton ku ondo' rinagu muno raki', ama'.”

³¹ Indagu i Jakub, “Pagibot noyo ra suguton mu ginio raki'.” Pagibot i Jusup am paringkuanang i Jakub ra nambalangan nano.