KASAUKAN 38 - Tanou Moonsoi Timugon

I Jiuda am i Tamar

¹ Olo'-olo' paat raginio iruani' ri Jiuda pagaka'-pagaka' nano am ongoi ayan ri Gira, iono sangulun ungkuyon intor ra bandar Adulam.

² Giu' no nakatuum i Jiuda ra sangulun ruandu' ru Kanaan ondo' ama' nano ininggalanan i Sua. Anduo' ri Jiuda ruandu' no,

³ am paganak ruandu' no ra sangulun anak ungkuyon ininggalanan ru ama' no ri Ir.

⁴ Kaapang poyo andu' nano am paganak sangulun anak ungkuyon ininggalanan ri Onan.

⁵ Paganak io poyo ra sangulun anak ungkuyon ininggalanan ri Syila. Paat ra anak no inanak, i Jiuda soroi giu' ra Kijib.

⁶ I Ir, anak katuaan ri Jiuda no pinagandu' ri Tamar.

⁷ Paliso ri Ir ti malaat kaga' am gitio kalo mapabansuk ra Tuhan, potoyo' io boo ru Tuhan.

⁸ Indagu boo i Jiuda ri Onan boborok ri Ir, “Ongoi ra napuor ru maayo muno am rulug no riso. Suguto' ondo' matanda' baalon muno riso sabap ra boborok kou ru ralaki nali, maa' raginio maayo muli makapapag.”

⁹ Kaa' nakapandai i Onan ra sala' ka io tatangan ra anak raginio ra tauli no. Pogonong boo i Onan sumawo ra napuor ru maayo nano, polosoon no uwa' nano tumiis ra lusar maa' raginio kolondo' papag ru maayo nali.

¹⁰ Atan ondo' binaal nano napasangit ayuk ra Tuhan, am potoyo' io niayuk ru Tuhan.

¹¹ Indagu boo i Jiuda ra anak mangiwan nano i Tamar, “Uli' noyo ra matuo muno am ayan noyo ra giu' koson sangulun napuor saboi masukor anak kuno i Syila.” Rinagu no ginio sabap ra malaa' io maaru' i Syila pana potoyon koson ra ruo ngaulun maayo nali. Uli' boo i Tamar ra baloi ru matuo nano.

¹² Kalo nabuoi raginio patoi andu' ri Jiuda. Kakai' panguliran ri Jiuda, pabaya' io ra rangan nano i Gira ulun ru Adulam no ongoi ra Timna, intok pagungkuran ra bulu ru domba nano.

¹³ Makaulun nambala' ri Tamar ra iwan nano i Jiuda mongoi ra Timna pagungkur ra bulu ru domba nano.

¹⁴ Aligi' no bayang napuor ondo' binayang nano, am silii' no bulos nano ra rondo' rundung. Ongoi io boo panturung ra kulobon garabang ru bandar Inaim, ondo' sasailan mongoi ra Timna. Napandayan ri Tamar ra anak pupusan ri Jiuda iono i Syila nasukor noyo. Kabalu' pana raginio kalo poyo pinagandu' io ru iwan nano ri Syila.

¹⁵ Kakito ri Jiuda i Tamar, indoson no i Tamar sangulun ruandu' mantalan ra inan, sabap ra sinilian bulos nano.

¹⁶ Inggaar i Jiuda riso ra kiing ru ralan am indagu, “Kula' pakianian muno?” Kalo nakapandai i Jiuda ra ruandu' no anak mangiwan nali. Indagu i Tamar, “Atan kia panganian muno raki'?”

¹⁷ Indagu i Jiuda, “Aniin tokou ra sanginan anak kambing kuno.” Indagu i Tamar, “Ba iou, amon ru mangani' kou raki' ra tatandu' jaminan saboi maataran mu kambing no.”

¹⁸ Pangkuot i Jiuda, “Atan kia tatandu' jaminan pakianian muno raki'?” Taam ruandu' no, “Saap tatandu' muno mabaya' ra kalat no am susukur inibit muno.” Anii' ri Jiuda kinitaak ru ruandu' no. Parulug ilo boo am kaapang i Tamar.

¹⁹ Uli' i Tamar ra baloi nano, puaso' no rundung nano am bayango' no sagulio' bayang napuor nano.

²⁰ Kukula' buoi raginio, panusub i Jiuda ra rangan nano i Gira mongoi pangator ra anak kambing no am mamuli' ra kuliamos ondo' tinaakan nali koson tatandu' jaminan, kaa' kalo natuum ri Gira ruandu' i.

²¹ Pangkuot i Gira ra ungkuyon ru bandar Inaim no, “Ati kia ruandu' mantatalan ra inan i, ondo' kaindalaman no manturung ra kiing ru ralan ti?” Taam ilo, “Kolondo' ruandu' mantatalan ra inan soroi ragiti.”

²² Saguli' i Gira ri Jiuda am indagu, “Kalo nauyum ku ruandu' i. Kon ru ungkuyon ra giu' no, kolondo' ruandu' mantatalan ra inan ra giu' no.”

²³ Indagu i Jiuda, “Polosoon noyo kuliamos raginio soroi riso, koson ito kalo mauyu'. Minirot aku noyo mambayar ra ruandu' i, kaa' kalo nauyum mu io.”

²⁴ Olo'-olo' talu ngambulan raginio, mokoondo' sangulun nambala' ri Jiuda, “I Tamar, anak mangiwan muno narulug ra sangulun ungkuyon am raino maapang io.” Panusub i Jiuda, “Paingkualo' io am solobo' io saboi matoi.”

²⁵ Tatanga' io ibiton mingkual, panusub i Tamar ra sangulun mapasaboi ra ragu nano ra iwan nali, “Natinayan aku ru ungkuyon ondo' tatangan ra kuliamos ragitio. Tutuno' noyo osoi tatangan ra kuliamos ragitio, saap tatandu' mabaya' ra kalat nati am niayuk susukur ragitio.”

²⁶ Nauligan ri Jiuda kuliamos raginio am indagu, “Ruandu' no kolondo' sala. Kalo sinugut ku rinagu kuli riso. Sotopot no paganduon ku io am i Syila.” Kalo boo rinulug ri Jiuda ruandu' no.

²⁷ Kasuku' orou i Tamar maganak, napandayan ra anakon nano magapir.

²⁸ Tatanga' ra io maganak noyo, sangulun intor ra anak magapir no napaingkual ra kalindu' nano. Guuto' ru mampaanak no kalindu' no am bongkoso' no ra gantian malia'. Indagu mampaanak no, “Io ti inanak pagulu.”

²⁹ Kaa' bunduko' saguli' ru anak no kalindu' nano am anak ra sangulun no inanak pagulu. Indagu mampaanak no, “Koson raginio okou jumajal ingkual!” Anak ra nakapagulu inanak no ininggalanan i Piris.

³⁰ Kopongo raginio inanak bagu boborok no ondo' makagantian malia' ra kalindu' nano. Ininggalanan io i Jirag.