KASAUKAN 33 - Tanou Moonsoi Timugon

Mantuum i Jakub ri Isau

¹ Kakito ri Jakub ra minatong i Isau nababaya' ra apat ngaatus ngaulun. Pantayaro' no anak-anak nano ri Liya, i Ragil am ra karuo ngaulun ulipon parulug nano.

² Pasiguluo' no karuo ngaulun ulipon ruandu' parulug nano nababaya' ra anak nilai, am pasunuo' no boo i Liya nababaya' ra anak-anak nano am i Ragil ri Jusup ra tinaulian toojo no.

³ Sigulu toojo i Jakub risilo ngaangai' am kubu io ra tana' no intulu' saboi makainggaar io ra maayo nano.

⁴ Kaa' pasimbul i Isau rapog ri Jakub, ganggali' no liog ri Jakub am alaki' no io, am pantangi' ilo ruo.

⁵ Pampulolou Isau am kakito no ngaangai' ruandu' nababaya' ra anak nilai, pangkuot io, “Osoi ilo ti minaya' rirun ti?” Taam i Jakub, “Ilo ti anak ondo' pinataak noyo ri Aki Kapuuno' ra ulipon muti.”

⁶ Inggaar boo karuo ngaulun ulipon ruandu' parulug no nababaya' ra anak nilai am igulatur.

⁷ Inggaar niayuk i Liya nababaya' ra anak-anak nano am igulatur. Pupus no, inggaar boo i Jusup am i Ragil am igulatur.

⁸ Pangkuot i Isau, “Atan kia pakuan mu ra sampulalai ondo' nauma' kuni?” Taam i Jakub, “Gitio koson makimasi' aku rirun.”

⁹ Kaa' indagu i Isau, “Ali', masuang noyo raki'. Bulii' noyo rirun no.”

¹⁰ Kon ri Jakub, “Kalo, alapo' noyo! Aka', amon ru apuon mu aku, alapo' noyo taak kuti. Sabap ra magilong aku ra bulos muno, koson ra magilong aku ra bulos ri Aki Kapuuno', sabap ra masamba kou kaga' raki'.

¹¹ Malansan aku ra apuo' noyo taak ondo' inibit kuno rirun. Sabap ra moonsoi kaga' i Aki Kapuuno' raki' am nanaak Io raki' ra ngaangai' no.” Jajali' ri Jakub i Isau saboi nangapu ra taak no.

¹² Indagu boo i Isau, “Tampos takano am ugar takau intor ragiti. Siguluin takamin.”

¹³ Taam i Jakub, “Aka', nakapandai kono ra lalaing-lalaing ti mangalawo, am mangkara' aku poyo ra domba am ngaangai' ru bibiag ondo' lakat poyo tumiti'. Amon ru ulisokon ugar no kabalu' pana songorou ayuk, mamagatoi ilo ngaangai'.

¹⁴ Pagulu kono am sumunu' aku ra liliwaan, mugar ra matataki' mababaya' ra biniag am anak-anak kuno saboi makarampot rirun giu' ra Idom.”

¹⁵ Indagu i Isau, “Amon ru koon poyo ragino tatangin tokou ra kukula' ngaulun intor ra ulun kuno.” Kaa' taam i Jakub, “Kalo pana ginio, makimasi' aku ayuk rirun.”

¹⁶ Orou raginio noyo naginutan ri Isau sumaguli' ra Idom.

¹⁷ Kaa' ongoi i Jakub ra Sukot am panambaloi io ra giu' i am pambaal ra sisindungan ru biniag nano. Ginio ra intok no ininggalanan ra Sukot.

¹⁸ Tatanga' pangkiralanan intor ra Misopotamia, pakasuku' i Jakub ra matanda' ra bandar Sikgim giu' ra pagun Kanaan, am pangkim io ra rondo' umo mamaar ra bandar no.

¹⁹ Binali no tana' raginio intor ra papag ri Gamor, ama' ri Sikgim, am logo no maatus ngampila' ruit pirok.

²⁰ Giu' no, pambaal io ra rondo' altar am inggalani' no “i Aki Kapuuno' ru Israil noyo i Aki Kapuuno'”.