KASAUKAN 25 - Tanou Moonsoi Timugon

Papag ri Abragam intor ra andu' nano ra bokon

¹ Nanangandu' poyo i Abragam ra sangulun ruandu' ininggalanan ri Kitura.

² Pakaanak i Abragam intor ra andu' raginio i Jimran, Joksan, Midan, Midian, Isbak am i Sua.

³ I Joksan ama' ri Syiba am i Didan. Papag ri Didan iono ulun ru Asyur, Litus am ulun ru Lium.

⁴ Anak ri Midian iono i Ipa, Ipir, Ginok, Abida am i Ildaa. Ngaangai' nilo papag ri Kitura.

⁵ Pinatungkus ri Abragam ngaangai' rapu' nano ri Isak,

⁶ kaa' paat io lakat poyo soroi, nangani' io niayuk ra taak ra anak-anak ungkuyon nano ondo' intor ra andu' nano ra bokon. Susubo' no boo anak-anak ra bokon no manding ra tampilon sirangon ru pagun ru Kanaan, koson minggalur ilo ra anak nano i Isak.

I Abragam minatoi am linobong

^7-8 Matutuo noyo kaga' i Abragam paat minatoi, umur nano 175 ngambilor.

⁹ Anak-anak ungkuyon nano, i Isak am i Ismail nompolobong riso ra Luang Batu Makpila ra umo tampilon sirangon ru Mamri. Galing i tatangan ra umo raginio i Ipron anak ri Jogar, ulun ru Git.

¹⁰ Umo no binali ri Abragam intor ra ulun ru Git no. I Abragam am andu' nali i Sara linobong ra giu' no.

¹¹ Kopongo i Abragam minatoi, barakato' ri Aki Kapuuno' i Isak anak ri Abragam no, ondo' minayan mamaar ra tulubong ondo' sabiton ra “Io Ondo' Maayag Ondo' Magilong Raki'”.

Papag ri Ismail

¹² I Ismail anak ri Abragam am i Agar, ruandu' Misir iono ulipon ri Sara.

¹³ Gitio noyo anak ungkuyon ri Ismail maya' ra itungon ru naganakan risilo. Kasaa' i Nibayot, sunu' i Kidar, Adbiil, Mibsam,

¹⁴ Misyma, Duma, Masa,

¹⁵ Gadad, Tima, Jitur, Napis am i Kidma.

¹⁶ Ginio noyo anak ungkuyon ri Ismail ondo' nasauk ra kinamatuaan ru mopor am ruo ngantayar ru bansa' ri Ismail. Inggalan nilai ti niayuk pinainggalan ra kampung am intok pangkiman.

¹⁷ Umur ri Ismail 137 ngambilor paat minatoi.

¹⁸ Papag ri Ismail minayan ra libung lolot ru Gawila am Asyur, tampilon sirangon ru Misir mongoi ra Asyur. Ilo ti nakapaginggalur intor ra papag ri Abragam ra bokon.

I Isau am i Jakub inanak

¹⁹ Gitio noyo tunung ra anak ungkuyon ri Abragam iono i Isak.

²⁰ Umur ri Isak apat ngoopor ngambilor paat nanangandu' ri Ribika, boborok ri Laban, anak ruandu' ri Bituil, ulun ru Aram intor ra Misopotamia.

²¹ Sabap ra kolondo' anak ri Ribika, pakiasi' boo i Isak ra Tuhan. Pakiasian ri Isak no iniou ru Tuhan saboi i Ribika maapang.

²² Magapir tininai' ri Ribika no, am ra kalo poyo inanak, mangkajol ilo ralalom ru binunakan. Indagu boo i Ribika, “Kua kasauk baal ragitio raki'?” Pakiasi' io koson makitulu' ra Tuhan.

²³ Indagu Tuhan riso, “Mokoondo' ruo bansa' tininai' muno, maganak kou ra ruo bansa' ondo' mantula'; boborok no maikang poyo intor ra maayo no, maayo no makiulipon ra boborok no.”

²⁴ Nasuku' noyo paat paganakan ri Ribika, naganak io ra anak ungkuyon magapir.

²⁵ Anak katuaan malia'-lia' am kungkung nano koson ra sukub makabulu. Ginio ra ininggalanan io ri Isau.

²⁶ Paat ra anak karuo ti miningkual, giminuut kalindu' nano ra tunob ri Isau. Ginio ra inggalani' io ri Jakub. Umur ri Isak onom ngoopor ngambilor paat ilo inanak.

Nantalan i Isau ra longgom nano koson anak katuaan

²⁷ Buayoi noyo karuo ngaulun anak magapir no. Nasauk i Isau ra sangulun moporong mampalula' am masaga' mayan ra limayak kaa' i Jakub makapaliso ra moomor am morondon ayuk ra baloi.

²⁸ Maansayan kaga' i Isak no ri Isau sabap ra masuung io mangakan ra kual ru bibiag ondo' linula' ri Isau no, kaa' maansayan kaga' i Ribika no ri Jakub.

²⁹ Paat ra rondo' orou, nangansak i Jakub ra linusou ru bulatung malia', ratong i Isau intor ra nampalula'. Naitilan io kaga'.

³⁰ Indagu io ri Jakub, “Naitilan aku kaga'. Anii' aku kasanganu ra bulatung malia' no.” (Ginio boo ra io sabiton ri Idom.)

³¹ Taam i Jakub, “Ba, amon ru pataakon mu galing raki' longgom muno koson anak katuaan.”

³² Indagu i Isau, “Ba, Matipatoi aku no ra bitil ti; atan onong raki' longgom raginio?”

³³ Indagu i Jakub, “Pagibot galing ra pataakon mu raki' longgom muno.” Pagibot i Isau am pataako' no longgom nano ri Jakub.

³⁴ Inanian io boo ri Jakub ra sanganu ruti' am sanganu linusou ru bulatung malia'. Akano' am inumo' ri Isau am ingkakat io boo am ugar. Ginio noyo sasaban ri Isau kalo nampalio ra longgom nano koson anak katuaan.