KAINGKUALAN 38 - Tanou Moonsoi Timugon

Mambaal ra altar intok monolob ra taak simbalui

¹ Pambaal i Bijalil rondo' altar intor ra tataun akasia koson intok monolob ra taak simbalui. Baal ru altar no apat persegi, gawar no 2.2 ngamito, pila' no 2.2 ngamito am sawat no 1.3 ngamito.

² Tampilon ra rasawat ru altar no, pambaal io ra sangau ra kaapat-apat pisuk no pinogondo' ra altar no. Angkupi' no ngaangai' no ra gangsa'.

³ Pambaal io niayuk ra ngaangai' kuliamos ru altar no: Paliuk, sukup, mangkuk, garapu' am intok ru apui. Pambaal io ra ngaangai' kuliamos no intor ra gangsa'.

⁴ Pambaal io ra kekisi intor ra gangsa' am parilito' no ra ragana' ru altar; nalintanga' sawat ru kekisi no intor ra sawat ru altar.

⁵ Pambaal io apat golong ra tataun bandasan ra kaapat-apat pisuk no.

⁶ Pambaal io ra tataun bandasan intor ra tataun akasia am angkupi' no ra gangsa'.

⁷ Pasulungo' no tataun bandasan no ra golong ra karuo-ruo sapapa' ru altar. Pambaal io ra altar intor ra papan am ralalom no makaluang-luang.

Mambaal ra bisin gangsa'

⁸ Pambaal io rondo' bisin am antulan no intor ra saramin gangsa' ondo' tinaakan ru bala ruandu' ondo' mangandoi giu' ra kulobon umpasan ra Kim ru Tuhan.

Insor ra Kim ru Tuhan

⁹ Pambaal i Bijalil ra insor giu' ra liput ru Kim ru Tuhan. Insor no tabir intor ra konoon linon molomos. Tampilon ra rabugus, gawar ru tabir no 44 ngamito,

¹⁰ sinungka' ru ruo ngoopor lugu' gangsa' am ruo ngoopor antulan, am tinakinan ra sangutan am niayuk batang intor ra pirok.

¹¹ Tampilon ra ralayo, binaalan ra insor koson raginio niayuk.

¹² Tampilon ra kalasaan, tabir makagawar 22 ngamito pinatakin; tabir-tabir sinungka' ru mopor lugu' am mopor antulan, am sangutan am batang no intor ra pirok.

¹³ Tampilon ra sirangon, intok umpasan, pila' no 22 ngamito.

^14-15 Ginio ra moonong kiing ru kulobon no, tinakinan ra tabir makagawar 6.6 ngamito, am talu lugu' am talu antulan.

¹⁶ Ngaangai' tabir ra gawar ru insor no binaal intor ra konoon linon molomos.

¹⁷ Antulan ra lugu' binaal intor ra gangsa'. Sangutan, batang am panaub tampilon rasawat ru lugu' no binaal intor ra pirok. Ngaangai' lugu' ru insor no pinatunggul ra batang ru pirok.

¹⁸ Tabir ru kulobon ru insor no binaal intor ra konoon linon molomos ondo' binaal ra konoon bulu makabatik motomou, matanggilung am malia', am niayuk binungaan ra sulaman. Tabir makagawar 9 ngamito am makasawat 2 ngamito, nogondo' ra tabir ru insor.

¹⁹ Tabir ru kulobon no sinungka' ru apat lugu' am apat antulan gangsa'. Sangutan am panaub tampilon rasawat ru lugu' no, am niayuk batang no binaal intor ra pirok.

²⁰ Ngaangai' paku' tataun ru Kim am insor no binaal intor ra gangsa'.

Basi' ondo' pakayon ralalom Kim ru Tuhan

²¹ Gitio noyo suang ru basi' ondo' pakayon ralalom Kim ru Tuhan, intok ru ruo batu pamatikan ondo' tinulisan ra Mopor Ukum no binulian. Suang no binaal maya' ra susuban ri Musa am tinampos ru ulun ru Liwi, ondo' nangandoi ra tiningganai ri Itamar, anak ri Imam Arun.

²² I Bijalil anak ri Uri, akupu ri Gur intor ra bansa' ru Jiuda, nambaal ra ngaangai' ondo' nanusuban ru Tuhan.

²³ Mangindangan riso i Ogoliab, anak ri Agisamak intor ra bansa' ru Dan iono sangulun pangukir, perekabentuk am mambaal ra konoon linon molomos am konoon bulu makabatik motomou, matanggilung am malia'.

²⁴ Ngaangai' mas ondo' patimpokon noyo ra Tuhan ra tayar ru Kim ru Tuhan no ra bagat no 1,000 kilogram, tinimbang maya' ra timbangan ondo' inaru' giu' ra Kim ru Tuhan.

²⁵ Pirok ondo' noowot intor ra panguntaban ru ulun ru Israil, bagat no 3,430 ngakilogram, tinimbang maya' ra timbangan ondo' inaru' giu' ra Kim ru Tuhan.

²⁶ Suang ti nogondo' ra suang ondo' binayaran ru ngaangai' mamagun ondo' nakatulis noyo inggalan ralalom panguntaban no; moonong ulun mambayar ra suang ondo' inaru' giu' ra Baloi Tuhan. Ngaangai' no 603,550 ngaulun ungkuyon ondo' makaumur matuo ra ruo ngoopor ngambilor, ondo' nakatulis noyo inggalan ralalom panguntaban no.

²⁷ Intor ra pirok no, bagat no 3,400 ngakilogram pinakai koson mambaal ra maatus antulan tayar Kim ru Tuhan am tabir no, 34 ngakilogram koson moonong antulan.

²⁸ Intor ra 30 ngakilogram pirok ondo' suwo no, pambaal i Bijalil ra batang-batang, kaitan ru lugu' am panaub tampilon ra rasawat ru lugu'.

²⁹ Gangsa' ondo' patimpokon ra Tuhan bagat no 2,425 ngakilogram.

³⁰ Pakayo' ri Bijalil gangsa' no koson mambaal ra antulan ra kulobon ru Kim ru Tuhan, altar gangsa' am kekisi no, ngaangai' kuliamos ru altar no,

³¹ antulan ru insor ra liput no, am niayuk antulan ru kulobon ru insor, am niayuk ngaangai' paku' tataun ru Kim ru Tuhan, am paku' tataun ru insor ra liput no.