JOSUA 5 - Tanou Moonsoi Timugon

¹ Ngaangai' raja' ru ulun ru Amori tampilon ra kalasaan ru Sungoi Jordan am ngaangai' raja' ru ulun ru Kanaan ra sisil ru nagas Raat Tanga' nokorongog ra kinapua' ru Tuhan Sungoi Jordan saboi ulun ru Israil nakalaup. Raja'-raja' no nalaa' am malawo guang sabap ra ulun ru Israil.

Pansunatan giu' ra Gilgal

² Tuhan pana mindagu boo ri Josua, “Pambaal ra kukula' pais intor ra batu am sunati' ulun ru Israil.”

³ Sinugut ri Josua susuban ru Tuhan am sunati' ulun ru Israil giu' ra intok ininggalanan ra Bulur Sunat.

^4-6 Paat ulun ru Israil nangiruan ra Misir, ngaangai' ungkuyon nilo sinunatan noyo. Kaa' buoi apat ngoopor ngambilor pangkiralanan nilo giu' ra tana' kaagisan, kolondo' sangulun pana ra anak ungkuyon nilo nasunatan. Paat ra pupus ru apat ngoopor ngambilor raginio, ngaangai' ungkuyon ru Israil ondo' sama' umur koson mangayou paat ilo nangiruan ra Misir, minatoi sabap kalo giminagaya' ilo ra Tuhan. Nagibot Tuhan ra kalo pakitonon ilo ra tana' ondo' moonsoi am malabung, ondo' binantu' Nano ra kinamatuaan nilai.

⁷ Anak-anak ungkuyon ru ngaangai' ulun no kalo poyo nasunatan. Ilo anak bagu no noyo ondo' sinunatan ri Josua.

⁸ Kopongo nasunatan, minayan ilo ngaangai' giu' ra pangkiman saboi ilo napali'.

⁹ Indagu Tuhan ri Josua, “Paat ra orou raiti' linulu' ku kauyuan min sabap nasauk ra ulipon giu' ra Misir.” Ginio sabap ra intok no ininggalanan ra Gilgal saboi ra orou raiti'.

¹⁰ Paat ra ulun ru Israil nangkim giu' ra Gilgal giu' ra tana' marata' maar ra bandar Jiriko, nangiantak ilo ra Paska paat ra palunggai', paat orou koopor am apat sila' raginio.

¹¹ Suabon no, koson ra kainsaa' ilo mangakan ra ampos tinanom giu' ra Kanaan: kaunaran sininggala' am ruti' kalo linatakan ra ragi.

¹² Paat raginio manna kalo boo maratu' ra tana' am ulun ru Israil kalo boo mangalap raginio. Intor orou raginio, mangakan ilo ra ampos ru tatanom giu' ra Kanaan.

I Josua am sangulun ungkuyon ondo' makailang

¹³ Paat i Josua soroi maar ra bandar Jiriko, pulali' io nakakito ra sangulun ungkuyon nampaguut ra ilang, minigor ra saang nano. Inggaar i Josua riso am kuati', “Okou ti saujor mai kia kapoam sangulun pantula'?”

¹⁴ Taam ulun no, “Aku sala' ka saujor min am sala' ka pantula'. Aku ti panglima saujor ru Tuhan.” Kubu samba i Josua am indagu, “Ulipon mu aku. Atan kia susuban muno raki'?”

¹⁵ Indagu panglima saujor ru Tuhan, “Paguso' kasut muno, sabap intok binigaran muno matulai.” Paguso' boo ri Josua kasut nano.