JOSUA 23 - Tanou Moonsoi Timugon

Ragu pantuliaran ri Josua

¹ Nabuoi kalupus raginio, nanaak Tuhan ra kamiaan ra ulun ru Israil; kalo boo jinajou ilo ru pantula' ra liliut nilo. Paat raginio i Josua matutuo noyo kaga'.

² Io pana nanimung ra ngaangai' ulun ru Israil, nakaaya' ngaangai' tuu' lair, ngaangai' tingganai, ngaangai' akim am ngaangai' pagawai, am indagu i Josua, “Raino matutuo aku noyo kaga'.

³ Nakakito kau noyo ra ngaangai' ondo' binaal ru Tuhan i Aki Kapuuno' min ra bansa'-bansa' ragitio ramuyun. Tuhan i Aki Kapuuno' min nangayou noyo ra tayar min.

⁴ Tinayar-tayar ku noyo tana' ru bansa'-bansa' ragitio ra bansa' min koson ra longgom min, iou pana tana' ondo' kalo poyo nagaau am ra tana' ondo' nagaau noyo, tumalimpuun intor ra Sungoi Jordan giu' ra tampilon sirangon saboi ra Raat Tanga' giu' ra tampilon kalasaan.

⁵ Tuhan i Aki Kapuuno' min mangkinibit risilo lumugut am magiru' intor ramuyun paat aku mangayou risilo. Maalap min tana' nilo koson ondo' binantu' ru Tuhan i Aki Kapuuno' min.

⁶ Ginio ra musiti' kau gumagaya' am mambaal ra ngaangai' ondo' tinulisan ralalom Kitab ru Ukum ri Musa. Pai' anggal ra rondo' pana intor ra ukum raginio.

⁷ Koson raginio noyo kalo makalatok kau ra bansa' ondo' lakat poyo soroi ra gino ngai' min; kalo manabit kau ra inggalan ru dewa-dewa nilo am kalo mamakai ra inggalan raginio ra magibot; kalo sumambayang kau kapoam sumamba ra dewa-dewa no.

⁸ Kaa' gagaya' no ra Tuhan koson akau giminagaya' noyo Riso saboi raino.

⁹ Napagiru' Tuhan ra bansa' mangaayo am mangaikang paat akau timinula' risilo; kalo igondo' sangulun pana nakaanggal ramuyun.

¹⁰ Sangulun ramuyun nakapangala ra saribu ngaulun pantula', sabap ra Tuhan i Aki Kapuuno' min nangayou ramuyun koson ra binantu' Nano.

¹¹ Ginio ra musiti' kau totopot motogom ra Tuhan i Aki Kapuuno' min.

¹² Amon ru kalo gumagaya' kau, am kumubayau kau ra ngaangai' bansa' ondo' lakat poyo soroi ra tatanga' min, am naguguot kau risilo,

¹³ maaru' Tuhan i Aki Kapuuno' min kalo napagiru' ra bansa'-bansa' raginio paat akau nangayou risilo. Bansa'-bansa' raginio makalalaa' kaga' ramuyun sabap ra masauk ilo koson ra pamalandak kapoam koson pangambi' ramuyun. Mangkinibit ilo niayuk ramuyun maimbolo' kaga' sabap ra masauk ilo koson ra pitol lalapos ra bakulung min, kapoam koson ra ruui ralalom ru mato min. Marayus kau maimbolo' saboi kolondo' sangulun pana mayan ra tana' ragitio ondo' tinaakan ru Tuhan ramuyun.

¹⁴ Raino nasaboi noyo paat ra aku matoi. Akau sigagama' nakapandai toojo ra Tuhan i Aki Kapuuno' min nanaak noyo ramuyun ra ngaangai' ondo' moonsoi, ondo' binantu' Nano. Moonong bantu' Nano sinugut noyo; kolondo' rondo' pana kalo nasugut Nano.

¹⁵ Kaa' koson ra Io nanugut ra moonong bantu' Nano ramuyun, koson raginio niayuk Io mambaal ra moonong lolob Nano.

¹⁶ Amon ru manggal kau ra nabantuan ondo' nanusuban ru Tuhan i Aki Kapuuno' min koson gagayaan, am amon mangandoi am niayuk sumambayang ra dewa-dewa, sumangit am mangukum Tuhan ramuyun. Sangkinolor ayuk am akau ngai' no maliom intor ra tana' ondo' moonsoi ti, ondo' tinaakan ru Tuhan ramuyun.”