JISAYA 4 - Tanou Moonsoi Timugon

¹ Bulintok raginio, tulu' ngaulun ruandu' mampaguut ra sangulun ungkuyon am mindagu, “Akanon am inumon matampilanan mai, kaa' polosoo' akai mindagu ra okou ralaki mai, maa' raginio kalo mauyu' akai ra kalo inuot.”

Jirusalim patapulion

² Bulintok no matong amon Tuhan mampatuu' ra moonong tutuu' am puun ru tataun ra pagun ti ra masawat am moonsoi pagilayan. Ngaangai' ulun ru Israil ondo' naayag maansukan am maringkuanang ra ampos ru tana' ru pagun no.

³ Moonong ulun natatang ra Jirusalim, ioginio ulun ondo' pinili' ri Aki Kapuuno' maa' raginio maayag ilo, am piawon ra matulai.

⁴ Ralalom ru kuasa' Nano Tuhan mangakim am mamasau ra bansa' raginio. Pusoon No kasalaan ru Jirusalim am kapasawon no intor ra raraa' ondo' pinasasar ra giu' no.

⁵ Giu' boo ra rasawat ru Bulur Sion am ngaangai' ulun ondo' timinimung ra giu', Tuhan mampatuun ra gaun bulintok matawang am lisun am niayuk apui ondo' masimbula' bulintok molondom. Katulayan ri Aki Kapuuno' manindung am mangampin ra libung ru bandar no.

⁶ Katulayan Nano manindung ra bandar no intor ra lasu' ru orou ra matawang, am mapasauk ra bandar no intok ondo' masindungan intor ra rasam am rosob.