JISAYA 28 - Tanou Moonsoi Timugon

Pampakaraan ra Pamarintaan Ralayo

¹ Aibui boo ra pamarintaan ru Israil! Kinoonsoi nano malaut koson ra sampungu busak ondo' liminonot giu' ra rasawat ru ulu ru ngaangai' tingganai nano ondo' nangagauk. Aibui boo ra bandar ondo' masawat kaga' giu' ra tatanga' ru limayak malabung, kasagain kaga' ru ulun ondo' nakalangan ra nagauk am kalo boo makatutun.

² Ilai' noyo, Tuhan nangator sangulun ondo' maikang am makakuasa', nakatampos mongoi pangayou risilo; sangulun matong koson ra bagiu' mabaya' ra rasam batu, koson ra rasam maawas, am koson ra liur ondo' siminakob ra tana'. Io mapaampas risilo ra tana'.

³ Pangurumatan ra tingganai-tingganai ondo' nagauk no kikinjangin.

⁴ Kuasa' ru tingganai-tingganai ondo' malilimbau no tumalimpuun malulu' am matatak. Pupus nilono koson ra kawa' ru nunuk ondo' maansak ra kalo poyo masuku' bulintok no; makito ayuk ru ulun, kawa' no upuon am akanon.

⁵ Masuku' niayuk bulintok paat ra Tuhan Ondo' Maayo Kaga' Kuasa' masauk koson ra sampungu bunga' ondo' maantak ra ilo ondo' naayag.

⁶ Mangani' Io ra paliso matimpok ra akim-akim, am kinabaani ra ulun ondo' nangampin ra garabang subalan ra bandar intor ra owoyon.

Jisaya am ngaangai' nabi-nabi ru Jiuda ondo' nagauk

⁷ Nabi am imam pana nagauk kaga' saboi kakasumpil ayuk ra mugar. Masuang kaga' ininum nilo ra wain am arak saboi makasaru sabap naubong. Nabi-nabi nangagauk kaga' saboi kalo boo mauligan nilo atan ondo' pinaintalang ri Aki Kapuuno', am ngaangai' imam nangagauk kaga' saboi kalo boo mapatasan nilo kasaukan ondo' pinabala' risilo.

⁸ Mija' nilono nalimpot kaluai' am kolondo' sanganu pana mapasau.

⁹ Mansunur ilo raki'. Konilo, “Indoson no osoi ilaan nano? Osoi kia masaga' ra pambalaan nano? Baal raginio mokoonong ayuk ra lalagang-lalagang ondo' bagu liminonggo' tumiti'!

¹⁰ Masaga' io mangila' ra moonong urup, moonong sulabit, am moonong tayar.”

¹¹ Amon marara' kau mangkirongog raki', i Aki Kapuuno' pana mangator ra ulun bansa' ru bokon ondo' suai ragu am sulabiton no koson mangila' ramuyun.

¹² Tuhan manaak ramuyun ngaangai' ra intok tangusan, kaa' marara' kau mangkirongog Riso.

¹³ Ginio sabap ra Tuhan no mangila' ramuyun ra moonong urup, moonong sulabit am moonong tayar. Makasaru kau bulintok ra akau mugar. Mapilatan kau, jalingon am rokopon.

Batu maatang koson ra Sion

¹⁴ Rongogo' noyo atan pinaragu ru Tuhan, akau magagasab ondo' namarinta ra ulun ru Jirusalim.

¹⁵ Ragu mino masawat, ra nangatang kau kunu' ra nabantuan ra kapatayan am pangiawan ra pagun ru ulun minatoi. Malansan kau ra karaat kalo makalumpa' ramuyun sabap ra lumansan kau ra abau am pamparuungan koson mangampin ra inan mino.

¹⁶ Kaa' gitio noyo ragu ru Tuhan Raja', “Pabantaan Ku batu maatang ondo' mologo am mokotog ra Sion; rondo' batu mokologo ra makabatik ragitio, ‘Osoi-osoi mangintopot am mirot, ilo kalo jumuung ayuk pakiala.’

¹⁷ Katimpakan saukon Ku ra tali panunuku', am kabanisan ru guang saukon Ku ra tali unting.” Nansalinut abau ondo' masauk ra kalansanan mino malulun ru rasam batu, am sindungan mino pusoon ru liur maayo.

¹⁸ Nabantuan mino ra kapatayan am nangiawan mino ra pagun ru ulun minatoi linugut sagulio'. Kalaan kau bulintok karaat lumumpa' ramuyun.

¹⁹ Moonong susuab ti karaat lumumpa' ramuyun, am orou rondom akau mansaan raginio. Monontol kau malaa' bulintok ra akau makarati' ra tanou ri Aki Kapuuno'.

²⁰ Koson kau ra ulun kuminam pombolong ra rasawat ru katil ondo' mariwa' kaga', ondo' bajang no malilis koson kusiban.

²¹ Tuhan tumirong giu' ra gunung Pirajim am giu' ra Limayak Gibion koson binaal No ra galing i. Paugaron No kasagaan Nano kabalu' pana pagilayan no saasala' ayuk. Paugaron No kandoi Nano ondo' makaimuag no.

²² Guango' min pansawayan Kutu! Amon kalo guangon min, mapagon poyo akau lumabus. Norongog ku noyo namatasan ru Tuhan Raja' Ondo' Maayo Kaga' Kuasa' koson mamuso ra titikop pagun.

Kapintaran ri Aki kapuuno'

²³ Rongogo' noyo rinagu kutu am guango' noyo bilin kutu.

²⁴ Mangngandoi ra umo kalo makatibusu mamparadu' am manangkul ra tana' koson tanamin.

²⁵ Mopongo mamparadu' am manangkul, palabukon no unor ru jintan maitom kapoam jintan mapulak. Mantanom io ra gandum am barli pantutuluson, am giu' ra igig ru umo nano nantanom ra tatanom ra bokon.

²⁶ Makapandai io mambaal ra kandoi nano, sabap ri Aki Kapuuno' nangila' riso.

²⁷ Kalo mamakai io ra tutu maagat koson manutu ra jintan maitom kapoam jintan mapulak. Kaa', mamakai io ra tutu mamaan am maaya'.

²⁸ Kalo agikon no gandum suku' matutuk, am mapandai io mamakai ra kurita' kuda koson mangagik ra gandum am kalo matutuk.

²⁹ Ngaangai' kapintaran raginio intor ra Tuhan Ondo' Maayo' Kaga' Kuasa'. Ngaangai' inatang ri Aki Kapuuno' mapintar am masalok makaampos.