JISAYA 1 - Tanou Moonsoi Timugon

¹ Suang ru buuk ragitio napatanou intor ra Jiuda am Jirusalim ondo' pinabala' ri Aki Kapuuno' no ri Jisaya anak ri Amos, bulintok ra Raja' Ujia, Raja' Jotam, Raja' Agas am Raja' Gijkia namarinta ra Jiuda.

Nansawai i Aki Kapuuno' ra ulun Nano

² Indagu Tuhan, “Alii ra limbowon am tana' ti, rongogo' noyo ragu Kutu! Ngaangai' anak ra pinasukor Kuno giminuor Raki'.

³ Sapi' makaulig ra nomolonggom riso no, am kaladai pana makatanda' ra intok papaakanan riso ru nomolonggom riso no, kaa' ulun Kuno Israil kalo makatutun. Totopot kalo makarati' ilo.”

⁴ Aibui boo ramuyun, alii ra bansa' ra makatula, alii ra ulun ondo' mapuka' am malaat! Tula mino napatibusu ramuyun! Inimpayan min Tuhan, i Aki Kapuuno' ondo' matulai, i Aki Kapuuno' ru Israil am tinatang min Io.

⁵ Kua kia rayusi' min gumuor? Masaga' kau kia ukumin ra maagat poyo no? Alii ra Israil, ulu mino nototop noyo ra pipilat. Guang am pangkaraan mino marualan.

⁶ Intor ra ulu suku' ra pampalar ru kalayam, kolondo' sanganu pana batang ru inan mino moonsoi. Inan mino naliput ra lanit, ruruko, am pipilat, ondo' kalo poyo piniiran kapoam binangkos, kapoam tinapisan ra umau.

⁷ Pagun mino pinuso noyo am bandar-bandar mino nakai' noyo solobo'. Mato mino galama' nakakito, ulun bansa' suai nampagaau ra tana' am ngaangai' no pinuso nilo.

⁸ Jirusalim ayuk natatang. Bandar no pana linibungan am kolondo' lulu' koson ra sulap nakapagayantanga' ra umo ru anggur kapoam pantau ra umo ru baliburan.

⁹ Amon ru Tuhan Ondo' Maayo Kaga' Kuasa' kalo nangiou ra kukula' ulun maayag, Jirusalim no mapuso noyo koson ra Sodom am Gomora ra galing i.

¹⁰ Alii ra Jirusalim, tingganai am ulun muno koson boo ra ulun Sodom am Gomora. Rongogo' noyo ragu ru Tuhan no ramuyun. Guango' min pangilaan ri Aki kapuuno' takano.

¹¹ Indagu Tuhan, “Pai' min karaa' ra maansukan Aku ra taak simbalui ondo' rayusin min pataako' Raki'! Nasuraan Aku noyo ra domba ondo' pinataak mino koson ra taak simbalui koson mapabansuk ra guang Kuno,

¹² Osoi kia nanusub ramuyun magibit ra ngaangai' no bulintok ra akau matong sumamba Raki'? Pai' kano boo kinjang ra liliut ru Baloi Kuno.

¹³ Banangan min ayuk magibit ra taak mino. Jumool painawan kuno makaalok ra kaminyan ondo' solobon mino. Kalo boo matipagilong Aku ra akau mangiantak ra Sila' Bagu, orou Sabat am pantutuuman min ralalom sambayang. Ngaangai' no jinamalan ru tula mino.

¹⁴ Masisang Aku ra pangiantakan min ra Sila' Bagu am orou-orou matulai no, ondo' mapakapagon Raki', am naagui Aku mansaan raginio.

¹⁵ Bulintok ra akau mapatunui ra longon koson makiasi', kalo ilain Takamin. Kabalu' pana masalok kau makiasi', kalo rongogon Ku, sabap ra kalindu' mino masalok mampatoi.

¹⁶ Kapasawo' min inan mino. Langgai' min ngaangai' kalaatan ondo' binaal min ra saang Kuno. Pai' kano boo pambaal ra malaat,

¹⁷ kaa' igigila' kau mambaal ra moonsoi. Pabigoro' noyo katimpakan: am indangano' ulun ra inimbolo', anii' anak ondo' nailusan ra matuo no ra ondo' motopot, sungkaa' noyo baal ru ulun-ulun napuor.”

¹⁸ Indagu Tuhan, “Ibok noyo salasayo' takau baal ragitio. Kabalu' pana mapaang kinalia' min sabap ru tula mino, baguin Takamin saboi akau masauk mapulak koson ra gapas. Kabalu' pana maagat am masuang tula min, akau totopot ampunon Ku.

¹⁹ Amon ru masaga' kau gumagaya' Raki', makasia' kau ra ampos ru tana' mino.

²⁰ Kaa' amon ru manggal kau Raki', maaru' matoi kau. Aku, Tuhan minindagu noyo.”

Bandar ra makatula

²¹ Bandar ra galing i gumagaya', ragino koson boo ra ruandu' mantalan ra inan! Galing i bandar no nososok ra ulun ondo' matimpok am mabanis guang, kaa' ragino ulun mamamatoi ayuk natatang ra giu' no.

²² Alii ra Jirusalim, galing i okou koson ra pirok, kaa' ragino kolondo' boo logo muno. Galing i okou koson ra wain moonsoi, kaa' ragino koson kou ayuk ra timug.

²³ Tingganai muno ulun malaat am pangkubayau ru ulun mantatakou. Masalok ilo mangapu ra tangguang am rasua. Kalo manungka' ilo ra anak nailusan ra matuo kapoam mangkirongog ra pakimasian ru ulun-ulun napuor.

²⁴ Ginio ra, ragino rongogo' noyo Tuhan Ondo' Maayo Kaga' Kuasa', i Aki Kapuuno' ru Israil mindagu, “Pantula' Kuno, balasin Takamin. Akau pana kalo boo mantipagon Raki'.

²⁵ Anggalon Takamin. Atan koson poyo ra ulun mamasau ra basi', koson raginio niayuk pamakuan Kuno ramuyun. Isasin Ku ngaangai' jaki mino.

²⁶ Aniin Takamin ra sangulun tingganai am ulun maminson koson ra galing i ayuk poyo. Bagu no Jirusalim no sabiton ra bandar ondo' matimpok am gumagaya'.”

²⁷ Sabap ra Tuhan no matimpok, bayagon No Jirusalim am moonong ulun ra giu' no tumalikur intor ra tula.

²⁸ Kaa' pusoon No moonong ulun ra makatula am niayuk ulun gumuor Riso no. Potoyon No moonong ulun ondo' mangiruan Riso.

²⁹ Pansagulian guang mino ra akau sumamba ra puun ra tataun am manusub ra dewa-dewa koson magalung am mambarakat ra umo, maa' raginio makapaingkual ra ampos masuang.

³⁰ Masauk kau koson ra puun tataun makalu ondo' raun nano lumonot, am koson ra taman kolondo' timug.

³¹ Koson ra rami nosolob ra baa makaapui, koson raginio niayuk ra ulun-ulun makakuasa' ondo' pusoon ru binaal malaat nilo galama', am kolondo' sangulun pana mopolonggo' ra pamusaan raginio.