JIRIMIA 36 - Tanou Moonsoi Timugon

Binasa' ri Baruk naskhah rinulun giu' ra Baloi ru Tuhan

¹ Paat ra bilor kaapat ra pamarintaan ru Raja' Joyakim anak ungkuyon ru Raja' Josia, koson ra raja' Jiuda, minindagu Tuhan Raki',

² “Alapo' rondo' naskhah rinulun, am tulisi' ra giu' no ngaangai' ondo' rinagu Kuno rirun intor ra Israil am Jiuda, am niayuk ngaangai' bansa'. Tulisi' ngaangai' ondo' pinabala' Kuno rirun intor poyo ra Aku minindagu rirun ra kasaa', paat ri Josia nasauk ra raja' saboi raino.

³ Paat ra mamagun ru Jiuda nokorongog intor ra ngaangai' karaat ondo' porotongon Kuno risilo, maaru' lair langgain nilo mambaal ra malaat. Amon ru ginio poyo, Aku pana mangampun ra kalaatan am tula nilo.”

⁴ Ginio ra piniau ku i Baruk anak ri Niria, am pinabala' ngaangai' ragu ru Tuhan no riso, maa' raginio tulisin no ngaangai' no ra ralalom ru naskhah rinulun no.

⁵ Kopongo raginio inanian ku i Baruk ra susuban ragitio, “Aku ti kalo boo pasubolon ra ralalom Baloi ru Tuhan.

⁶ Kaa' musiti' kou mongoi ra giu' no paat ra ulun mampali. Basaa' suang ru naskhah no ra bolos mosongou, maa' raginio mokorongog ilo ra ngaangai' ondo' rinagu ru Tuhan raki', am ondo' pinabala' ku noyo rirun. Musiti' mu basaan ginio giu' ra intok ru ngaangai' ulun mokorongog, nakaaya' mamagun ru Jiuda ondo' minatong intor ra bandar-bandar nilo.

⁷ Maaru' lair makiasi' ilo ra Tuhan am timinalikur intor ra kalaatan nilo, sabap ra nompololob Tuhan risilo ra sangit am lasu' ru guang Nano.”

⁸ Ginio ra binasa' ri Baruk ragu ru Tuhan no giu' ra ralalom Baloi ru Tuhan topot koson ra nanusuban kuno.

⁹ Paat ra sila' kasiam ralalom bilor kalimo ra pamarintaan ru Raja' Joyakim koson ra raja' ru Jiuda, mamagun nampali maa' raginio iowon ru Tuhan. Ngaangai' ulun ondo' minayan giu' ra Jirusalim nampali am ulun ondo' minatong ra giu' no intor ra bandar-bandar giu' ra Jiuda pana nampali.

¹⁰ Liliwa' ru ngaangai' ulun mangkirongog, i Baruk pana nambasa' boo ra naskhah rinulun ondo' mokoondo' ra ngaangai' ondo' rinagu kuli. Binasa' no ginio giu' ra Baloi ru Tuhan, giu' ra lamin ri Gimarya anak ri Sapan, mamamatik ru pagun. Lamin nano giu' ra liliut tampilon rasawat, mamaar ra Kulobon Garabang Bagu giu' ra Baloi ru Tuhan.

Suang ru naskhah rinulun binasa' ra pagawai-pagawai

¹¹ I Mikaya anak ri Gimarya, akupu ri Sapan, nokorongog ra nambasa' i Baruk ra ragu ru Tuhan intor ra naskhah rinulun no.

¹² Kopongo raginio minongoi i Mikaya ra istana ru raja', giu' ra lamin ru mamamatik ru pagun. Paat raginio ngaangai' ru pagawai istana tatanga' nansusunur. I Ilisama ioginio mamamatik ru pagun, i Dilaya anak ri Simaya, i Ilnatan anak ri Akbor, i Gimarya anak ri Sapan, i Jidikia anak ri Gananya, am ngaangai' pagawai ra bokon soroi ra giu' no.

¹³ Nambala' i Mikaya risilo ra ngaangai' ondo' binasa' ri Baruk ra mamagun.

¹⁴ Pagawai-pagawai no pana nanusub boo ri Jigudi (anak ri Nitania, akupu ri Silimia anak ri Kusyi) maa' raginio nanusub ri Baruk magibit ra naskhah rinulun ondo' binasa' ra mamagun. Inibit ri Baruk naskhah no risilo.

¹⁵ Konilo, “Panturung kau, am basaa' naskhah rinulun no ramon.” I Baruk pana nambasa' raginio.

¹⁶ Kopongo raginio, motontong ilo ra rondo' am bokon ra malaa' am indagu ri Baruk, “Musiti' mai pabalaan gitio ra raja'.”

¹⁷ Pangkuot ilo poyo riso, “Raguo', ati kulaan kou nanulis ra ngaangai' ti? I Jirimia kia' nambala' raginio rirun?”

¹⁸ Taam i Baruk, “I Jirimia nambala' ra moonong ragu no raki', am tulisi' ku ra dawat ra naskhah ti.”

¹⁹ Ilo pana mindagu boo riso, “Okou am i Jirimia musiti' mansibuni. Pai' polosoo' osoi pana makapandai ra intok pansibunian min.”

Sinolob ru raja' naskhah rinulun

²⁰ Binulian ru pagawai-pagawai naskhah rinulun no giu' ra ralalom ru lamin ri Ilisama, mamamatik no, ongoi boo pabalaa' ngaangai' no ra raja'.

²¹ Kopongo raginio nanusub raja' ri Jigudi mangalap ra naskhah no intor ra lamin ri Ilisama am binasa' no ra saang ru raja' am niayuk ngaangai' pagawai ondo' miningor giu' ra libung ru raja'.

²² Paat ragili bulintok masimu', am tatanga' raja' manturung giu' ra saang ru nampaangan ra apui giu' ra istana ru bulintok masimu'.

²³ Kopongo i Jigudi nambasa' ra talu kapoam apat ngambaris, lomporo' ru raja' tayar raginio ra rondo' pais boborok am patiri' no ra ralalom ru apui. Binaal ru raja' baal raginio ra rinayus-rayus saboi ra ngaangai' ru naskhah rinulun no sinolob.

²⁴ Kaa' raja' kapoam pagawai-pagawai ondo' nokorongog ra ngaangai' no kalo malaa' kapoam nampakito ra pansagulian guang.

²⁵ Kabalu' pana i Ilnatan, i Dilaya am i Gimarya nakimasi' ra raja' koson kalo solobon naskhah no, kalo linio ilo ru raja'.

²⁶ Raja' pana nanusub boo ra anak nano i Jiragmiil, i Siraya anak ri Ajriil am i Silimia anak ri Abdiil koson mamparakop raki' am niayuk i Baruk, mamamatik kuno, kaa' pinasibuni akai ru Tuhan intor risilo.

Nanulis i Jirimia ra rondo' naskhah rinulun ra bokon

²⁷ Kopongo Raja' Joyakim nonolob ra naskhah rinulun ondo' pinabala' ku ri Baruk, nanusub Tuhan raki'

²⁸ mangalap ra rondo' naskhah ra bokon am nanulis saguli' ra ngaangai' suang ru naskhah rinulun ondo' kasaa' i.

²⁹ Nanusub Tuhan raki' mindagu ra raja', “Sinolob mu noyo naskhah rinulun i, am nangkuot kou kua panulis i Jirimia ra matong raja' ru Babilonia, am mamuso ra pagun ti am mamatoi ra mamagun no am niayuk ngaangai' bibiag ra giu' no.

³⁰ Ginio ra, Aku, Tuhan, minindagu rirun, Raja' Joyakim ra kolondo' sangulun pana intor ra papag muno makapamarinta ra pamarintaan ri Daut. Baangkai muno patirin ra liwar saboi makatuug paat ra matawang am matiu' ru bolobou paat ra rondom.

³¹ Okou ukumin Ku, papag muno, am pagawai-pagawai muno, sabap ra tula min ngaangai'. Kolondo' osoi pana, okou, mamagun ru Jirusalim kapoam Jiuda, ondo' mampalio ra pinakara' Kuno. Ginio ra, porotongon Ku karaat ondo' pinololob Kuno ramuyun ngaangai'.”

³² Kopongo raginio alapo' ku rondo' naskhah rinulun ra bokon am pataako' ri Baruk, mamamatik kuno. Tinulisan no boo ngaangai' ondo' nambalaan kuli. Tinulisan no ngaangai' ondo' nakasuang giu' ra ralalom ru kitab rinulun ondo' kasaa', am niayuk tanou ra bokon koson raginio.