JIRIMIA 2 - Tanou Moonsoi Timugon

Togom ri Aki Kapuuno' ra Israil

¹ Nanusub Tuhan raki'

² mampatanou ra tanou ragitio ra ngaangai' ulun giu' ra Jirusalim, “Mamagun kau ru Israil, nakara' Ku ra mapara' boo gagaya' min paat ra akau lakat poyo mamulok, am mapara' boo gayo ru togom min Raki' paat ra akau nasauk ra ulun inuot ragili. Minaya' kau Raki' nansail ra tana' kaagisan, nansail ra tana' ondo' kolondo' poyo tinanaman.

³ Mamagun kau ru Israil, akau longgom Kuno galama', akau longgom Kuno ondo' tinagaman. Mamparatong Aku ra kapaganan am karaat ra ngaangai' ulun ondo' mampajamar ramuyun. Aku, Tuhan nakaindagu noyo.”

Tula ru kinamatuaan ru bansa' ru Israil

⁴ Rongog no ra bala' ru Tuhan, papag kau ri Jakub, bansa'-bansa' ru Israil.

⁵ Indagu Tuhan, “Atan kia panguwan ru kinamatuaan min Raki'? Kua kia talikur ilo Raki'? Sinamba nilo sinungkalalaing ondo' kolondo' onong, saboi ilo galama' nasauk ra kolondo' onong.

⁶ Kalo mampalio ilo Raki', kabalu' pana binayag Ku ilo intor ra Misir am naningganai risilo nansail ra tana' kaagisan: tana' kolondo' tutuu' am bulur ru agis, tana' mapua' am makalalaa', tana' kolondo' ulun namagun am kolondo' ulun mansail.

⁷ Magibit Aku risilo mongoi ra tana' ondo' malabung koson sumia' ra ampos no am ngaangai' ondo' moonsoi. Kaa' linumo nilo tana' Kuno; jinaka' nilo pagun ondo' pinataak Kuno risilo.

⁸ Kalo nangkuot imam-imam, ‘Ati boo Tuhan?’ Imam-imam Kuno pana kalo nakaulig Raki'. Panguasa'-panguasa' giminuor Raki'; nabi-nabi minindagu ralalom inggalan ru Baal am sinamba sinungkalalaing ondo' kolondo' onong.”

Inanggal ru Tuhan ulun Nano

⁹ Indagu Tuhan, “Ginio boo ra paraguon Ku baal Kuno poyo ra ulun Kuno. Paraguon Ku panguwan ra papag nilo.

¹⁰ Ongoi no ra pulu' Siprus giu' ra tampilon kalasaan, susubo' ulun mongoi ra tampilon sirangon, giu' ra tana' Kidar. Makakito kou ra baal koson ragitio kalo igondo' kasauk.

¹¹ Kolondo' bansa' ra ati pana ondo' nakaili' nangalig ra tuhan nano, kabalu' pana tuhan-tuhan no i aki kapuuno' ondo' kalo motopot. Kaa' ulun Kuno nangalig Raki', i Aki Kapuuno' ondo' nangani' risilo ra intok ondo' matulai, ra rondo' ondo' kalo mambaal ra atan pana.

¹² Sabap raginio, okou limbowon, kogonggon no! pangimuag am maliangan,

¹³ sabap ra ulun Kuno nambaal ra ruo tula: nangiruan ilo Raki', puun ru timug ra mapakaayag ra ulun, am nangkali ilo ra kulam ondo' lawasan am kalo mototop ra timug.”

Kinibit ra kalo gumagaya' ru Israil

¹⁴ “Israil sala' ka ulipon; kalo inanak io koson ra ulipon. Kaa' kua ilowo' io ru pantula' nano?

¹⁵ Pantula' nano mansangal koson ra singa', am nampasauk ra tana' nano kolondo' tutuu' am masiluk; bandar-bandar nangaurus, am kolondo' ulun minayan.

¹⁶ Ulun ru Mimpis am Tapanis namabak ra kuapak nano.

¹⁷ Israil, okou galama' nangkinibit ra baal ragitio nasauk rirun. Nangiruan kou Raki', Tuhan i Aki Kapuuno' muno, paat ra Aku naningganai rirun ralalom pangkiralanan muno.

¹⁸ Atan kia banang muno minongoi ra Misir am nanginum ra timug ru Sungoi Nil? Atan banang muno minongoi ra Asyur am nanginum ra timug ru Sungoi Iprat?

¹⁹ Kalaatan muno galama' ondo' mangukum rirun; maimbolo' kou sabap ra nangiruan Raki'. Makaliman kou ra mapara' boo pait no am sala no nangiruan Raki', Tuhan, i Aki Kapuuno' muno, am kalo boo gumagaya' Raki'. Aku, Tuhan Raja' Ondo' Maayo Kaga' Kuasa' nakaindagu noyo.”

Marara' Israil sumamba ra Tuhan

²⁰ Indagu Tuhan Raja', “Alii ra Israil, intor ragili marara' kou mangandoi ayuk Raki'; marara' kou gumagaya' Raki' kapoam sumamba Raki'. Giu' ra rasawat ru moonong bulur ondo' masawat am giu' ra saau ru moonong puun tataun masansam, sumamba kou ra dewa-dewa ru kalabungan.

²¹ Nantanom Aku rirun koson ra puun ru anggur linili' intor ra unor ondo' moonsoi kaga'. Kaa' ilai' boo, nakulau kou! Nasauk kou ra puun ru anggur lumayau ondo' kolondo' onong.

²² Kabalu' pana mariu' kou ra mansabun ra masuang, kaa' lakat Aku poyo makakito ra itom ru kasalaan muno.

²³ Ati kulaan kia okou mindagu ra kalo majamol kou, am ra okou kalo igondo' samba ra sinungkalalaing Baal? Ilai' ga binaal muno giu' ra limayak; makatula kou ra giu' no. Koson kou ra unta masigo ondo' makipaa', ondo' nagisimbul ra giu' am giti, kalo mororo',

²⁴ am nagisimbul minongoi ra tana' kaagisan ondo' masiluk. Unta ruandu' kalo maalap ra guut paat makipaa'. Unta gawayan ondo' mampaa' riso no kalo pana maguguyum; bulintok mampapaa' masalok matuum unta ruandu'.

²⁵ Alii ra Israil, pai' ilowo' dewa-dewa, mapilatan kou ra kalayam, mapuaan tantalanan muno. Kaa' mindagu kou, ‘Kalo, kalo makasaguli' aku. Motogom aku ra dewa-dewa am masaga' aku maya' risilo.’ ”

Israil totopot ukumin

²⁶ Indagu Tuhan, “Koson ra mantatakou tinauyu' paat rinakop, koon raginio niayuk ra ulun ru Israil tauyuon, makaaya' raja'-raja' am pagawai-pagawai min, imam-imam am nabi-nabi min.

²⁷ Ngaangai' kau tauyuon. Akau no minindagu ra rondo' puun tataun koson ra ama' min am rondo' bulur koson ra ina' min. Baal ragitio masauk sabap ra nangiruan kau Raki' am kalo minatong Raki'. Kaa' paat ra akau makakapaganan, piawon min Aku koson mamayag ramuyun.

²⁸ Ati kia sinungkalalaing dewa ondo' binaal min ni? Paat ra akau makakapaganan, pakibayag kau ra dewa-dewa no, amon ru totopot dewa no masaga'! Okou Jiuda, dewa muno masuang koson ra suang ru bandar mino!

²⁹ Atan kia butokon min? Kua kia anggal kau Raki'?

³⁰ Banangan Ku ayuk mangukum ramuyun, sabap ra marara' kau mangapu ra pangilaan Kuno. Koson ra singa' ondo' tatanga' masangit, koon raginio niayuk ra akau namatoi ra nabi-nabi min.

³¹ Alii ra ulun ru Israil, rongog no ra ragu Kutu. Igondo' Aku kia koson ra tana' kaagisan ramuyun kapoam koson ra tana' ondo' molondom am makalalaa'? Kaa' kua kia indagu kau ra masaga' kau maya' ra kasagaan galama', am marara' boo sumaguli' Raki'?

³² Mokoondo' kia ralaa ondo' makalilian ra limpor nano, kapoam ruandu' uoton ondo' makalilian ra bayang nano? Kaa' ulun Kuno nakalilian Raki' ra nabuoi kaga' – suang ru orou no kalo boo mauntob.

³³ Mapandai kau toojo maguyum ra ralan koson mangambi' ra guang ru ambai. Ruandu' ra malaat toojo pana lakat poyo makaigila' ra kalaatan intor ramuyun!

³⁴ Bayang min natatakan ra raraa' ru ulun musikin am ulun kolondo' sala, sala' ka raraa' ru ulun mantakou ondo' narakop. Kabalu' pana raginio,

³⁵ lakat poyo mindagu kau, ‘Kolondo' sala kuno; maaru' kalo boo sumangit Tuhan raki'.’ Kaa' Aku, Tuhan mangukum ramuyun sabap ra marara' kau mangiou ra tula min.

³⁶ Pinainggana' min kaatangan ru inan sabap minongoi ra dewa ru bansa' bokon. Sindualin kau ru Misir, koson ra akau sinindualan ru Asyur.

³⁷ Nangiruan kau ra Misir ra ulu pinakuku' sabap ra nasindualan am nauyu'. Aku, Tuhan, nangimpai risilo ondo' lansanin min; kolondo' moowot min ra ampos atan pana intor risilo.”