JIRIMIA 10 - Tanou Moonsoi Timugon

Sumamba ra sinungkalalaing

¹ Ulun kau ru Israil, rongog kano ra tanou ru Tuhan ramuyun.

² Indagu Io, “Pai' baya' ra kaindalaman ru bansa'-bansa' ra bokon; pai' ponontol magilong ra tatandu'-tatandu' ondo' makaimuag giu' ra limbowon, kabalu' pana malaa' bansa'-bansa' ra bokon.

³ Ugama ru bansa'-bansa' raginio kolondo' toojo onong. Mantagar ulun ra sampuun tataun giu' ra kataunan; ukiron boo tataun no ru ulun manukang ra tataun ra kakamot pangukir,

⁴ bungain boo ra mas am pirok. Tataun ondo' inukir no potolorogon ra paku' koson mamiot intor ra maaba'.

⁵ Sinungkalalaing no koson ra inulun-ulun giu' ra umo ru baliburan; sinungkalalaing kalo mindagu; sinungkalalaing musiti' kakaton sabap ra kalo mugar. Pai' kalaa' ra sinungkalalaing; sinungkalalaing kalo mampajamar ramuyun, am kalo mamparatong ra moonsoi ramuyun.”

Sumambayang ra Tuhan

⁶ Iou Tuhan, Okou kolondo' pogondo'; maikang Kou toojo, inggalan Muno matulai am makakuasa'.

⁷ Osoi ondo' marara' mangurumat Rirun, raja' ru ngaangai' bansa'? Okou no totopot urumaton ru ngaangai'. Okou kolondo' pogondo' ra ngaangai' ulun mapintar intor ra bansa'-bansa', kapoam raja'-raja' nilo.

⁸ Ngaangai' ilo gigiison am sasambungon. Atan kia maalap nilo kaigigila' intor ra sinungkalalaing ondo' binaal intor ra tataun?

⁹ Sinungkalalaing nilo inangkupan ra pirok intor ra Sipanyol, am inangkupan ra mas intor ra Upas; ngaangai' no binaal ru ulun manukang. Bayang ru sinungkalalaing intor ra konoon matanggilung ra molondom am matanggilung ra mabubula', binaal ru ilo ondo' mapandai toojo mambaal ra konoon.

¹⁰ Kaa' Okou, Tuhan, i Aki Kapuuno' ondo' motopot, Okou i Aki Kapuuno' ondo' maayag, raja' ondo' mantilayun. Paat ra Okou sumangit, monontol tana' ti, bansa'-bansa' kalo maikang manguma' ra sangit Muno. (

¹¹ Ulun kau, musiti' kau mambala' risilo ra dewa-dewa ondo' kalo namangun ra limbowon am tana' ti pusoon. Dewa-dewa no liomon intor ra tana' ti.)

Rimbai mongompor ri Aki Kapuuno'

¹² Tuhan namangun ra tana' ti ra kuasa' Nano; am ra kuasa' Nano namingkal ra tana' ti am namilar ra limbowon.

¹³ Maya' ra susuban Nano timug giu' ra limbowon mokobolos; Magibit Io ra gaun intor ra pompor ru tana' ti. Mangkinibit Io ra ganit mainbilak ralalom ru rasam, am mangator ra angin intor ra intok pambulian.

¹⁴ Magilong ra ngaangai' no makaliman ulun ra sasambungon ilo am kolondo' karatian. Ulun ondo' nambaal ra sinungkalalaing makaliman ra papalo ayuk sabap ra sinungkalalaing binaal nilo kalo motopot am kalo maminawo.

¹⁵ Sinungkalalaing no kolondo' onong am sotopot no asabin. Ngaangai' no pusoon paat ra Tuhan matong mangukum.

¹⁶ Aki Kapuuno' ri Jakub sala' ka koson ra sinungkalalaing raginio; Io noyo namangun ra ngaangai' no. Nampili' Io ra Israil nasauk ra ulun Nano. Tuhan Ondo' Maayo Kaga' Kuasa' noyo inggalan Nano.

Monontol masingkual giu' ra ralalom pagun

¹⁷ Mamagun kau ru Jirusalim, pinagawangan kau! Ginio ra timungo' kuliamos mino.

¹⁸ Patirin kau ru Tuhan intor ra pagun ti; umokon No akau saboi sangulun pana kolondo' matatang. Gini noyo ragu ru Tuhan.

¹⁹ Pompogolok mamagun ru Jirusalim, “Malandom pilat maiti! Pilat maiti kalo mapali'. Ragili indoson mai ra kaimbalaan ti masaanan mai, kaa' sotopot no kalo.

²⁰ Nalunsai kim mai; kalat-kalat nano ngaangai' naukat. Anak-anak maino ngaangai' minugar; kolondo' boo mambaal saguli' ra kim maino; kolondo' boo mamilik ra konoon ru kim.”

²¹ Taam aku, “Tingganai takano sasambungon. Kalo makitulu' ilo ra Tuhan. Ginio sabap ra itakau kalo nakasugut, am bansa' takano nakapantuliar ra ati-ati.

²² Rongog no! Tanou nakasaboi noyo! Mokoondo' rondo' bansa' giu' ra ralayo mapasingkual ra kajajawan. Saujor nano mapasauk ra bandar-bandar ru Jiuda masiluk am kolondo' mayan, saboi masauk ra intok ayanan ru uku' kataunan.”

²³ Iou Tuhan, makapandai aku ra kolondo' sangulun pana makakuasa' ra kaayagan nano; kolondo' sangulun pana mangaru' ra kiralan ru kaayagan nano.

²⁴ Iou Tuhan, ukumi' noyo ulun Muno; kaa' pai' imboloo' toojo, am pai' akai ukumi' paat ra Okou sumangit, sabap ra maaru' no akai ngaangai' mapuso.

²⁵ Paabuso' noyo sangit Muno ra bansa'-bansa' ondo' kalo sumamba Rirun, am ra ulun ondo' nangimpai Rirun. Pinuso nilo ulun Muno; tinutuk nilo akai lingono' am namuso ra pagun mai.