IJRA 9 - Tanou Moonsoi Timugon

Nakaalap i Ijra ra pambalaan intor ra paguatan ru ulun ru Jaudi am ulun bansa' ra bokon

¹ Kopongo ngaangai' no pinaugar, kukula' ngaulun tingganai ru Israil minatong raki'. Nambala' ilo ra mamagun ru Israil, nakaaya' imam-imam am ulun ru Liwi kalo siminuai intor ra bansa'-bansa' ondo' minayan giu' ra liliut nilo, iono bansa' ru Amon, Moab, Misir, Kanaan, Git, Piris, Jibusi am Amori. Nambaal ilo niayuk ra binaal malaat ru bansa'-bansa' raginio.

² Ungkuyon ru Jaudi nagandu' ra ruandu' bansa' ra bokon saboi ulun ondo' i Aki Kapuuno' ayuk tatangan no nasabulan. Tingganai-tingganai am pagawai-pagawai nilo noyo ondo' kasaa' toojo nambaal ra baal raginio.

³ Pokorongog aku ra baal raginio, rinilak ku bayang sabap ra mangiluk toojo guang. Kinaur ku abuk am jangut, am panturung ra guang natutuk.

⁴ Mangiluk kaga' guang kuno am nanturung ra giu' no saboi ra paat koson mampataak ra taak simbalui ra mai' ti. Masuang ulun minatong timung limpu raki'. Ngaangai' ulun no nangalaa' sabap ra lolob ri Aki Kapuuno' ra tula ondo' binaal nilo ondo' minuli' intor ra pamatiran.

⁵ Paat ra taak simbalui ra mamai' no tumalimpuun pataakon, ingkakat aku intor ra intok nanturungan kuno ra mangiluk guang am nambayang ra naririlak, igulatur aku boo am kakato' kalindu' ra Tuhan, i Aki Kapuuno' kuno.

⁶ Indagu aku, “Iou i Aki Kapuuno' kuno, mauyu' aku kaga' tumungar ra saang Muno. Tula mai nansusunu' giu' ra rasawat ru ulu saboi ra limbowon.

⁷ Intor ra bulintok ru kinamatuaan maili saboi raino, akai ulun Muno makatula noyo Rirun. Kinibit ru tula mai no, raja'-raja' am imam-imam mai rinakop ru raja'-raja' bansa' ra bokon. Akai pinatoi, tinakawan am inibit sinauk ra ulun rinakop ra pagun ra bokon. Inasaban akai toojo, saboi orou raiti'.

⁸ Kaa' raino, koson ra sangkinolor, Okou iou Tuhan, i Aki Kapuuno' mai, bagu ayuk pakaasi' ramon am nampalabus ra kukula' ngaulun ra gino ngai' mai intor ra pangulipanan, am niayuk nangani' ramon ra kaayagan ondo' mamimio giti ra intok pinaluntuk ti. Nangani' Kou ramon ra kaayagan ondo' bagu.

⁹ Kalo nangiruan Kou ramon paat ra akai lakat poyo ra pangulipanan. Binaal Mu raja' ru Pirsia naansayan am nangiou ramon maayag am niayuk nambaal saguli' ra Baloi Muno ondo' nalunsai no. Nangani' Kou ramon ra sindungan giu' ra Jiuda am giu' ra Jirusalim.

¹⁰ Kaa' raino, iou Aki Kapuuno', kalupus kasaukan raginio, atan kia makaragu mai? Igondo' poyo inanggal mai susuban Muno

¹¹ ondo' tinaakan ramon ondo' pinabala' galing ra ulipon Muno, nabi-nabi. Nambala' ilo ramon ra tana' ondo' ayanin mai no najamalan noyo, sabap ra mamagun nano nampajamol noyo ra ngaangai' no ra binaal ondo' majamol am malaat.

¹² Nabi-nabi no nambala' ramon ra kalo iowon akai matagandu' ra mamagun toojo kapoam mangindangan risilo masauk ra langkaya' am makakaansayan. Amon ru gumagaya' akai, masauk akai ra maikang am makasia' ra ampos ru tana' no am niayuk makatungkus ginio ra papag mai ra sabubuoi no.

¹³ Raino nangukum Kou ramon sabap ra ngaangai' tula am inanggalan mai ra ukum Muno. Kaa' nakapandai akai iou Aki Kapuuno' mai, ra ukuman Muno mamaan poyo kaga' intor ra ondo' binaal mai; am Okou pana namayag ramon.

¹⁴ Ginio ra, ati kulaan lair akai mompoloso poyo ra susuban Muno, am nagagandu' ra ulun ondo' malaat no? Amon baalon mai ginio, maaru' sumangit Kou am mamuso ramon ra malingon, saboi kolondo' sangulun pana maayag.

¹⁵ Iou Tuhan, i Aki Kapuuno' ru Israil, matimpok Kou kaga'. Kabalu' pana koon raginio, nangiou Kou ramon maayag. Mangiou akai ra tula mai. Kalo maaya' akai matong ra saang Muno.”