IBRANI 6 - Tanou Moonsoi Timugon

¹ Ginio ra, tatango' takau noyo puun ru pangilaan Kristian no am sumingkot poyo ra pangilaan malandom. Pai' takano ruli'-ruli' makiila' poyo ra puun pangilaan, koson tumalikur intor ra baal ra kolondo' onong, mangintopot ri Aki Kapuuno',

² pampariwan, mapabanta' ra kalindu' ra ulu ru ulun, sauk ru kaayagan saguli' ru ulun minatoi am poyo ra pangukuman mantilayun.

³ Singkot takano. Am gitio baalon takau amon ru iowon ri Aki Kapuuno'.

⁴ Itakau musiti' sumingkot, sabap ra ulun ondo' lumugut intor ri Kristus, kalo boo lair makatalikur saguli' Riso. Ilo ti nakatutun noyo ra pambalaan intor ri Aki Kapuuno', am nakaili' ilo no ra taak intor ra suruga' am poyo nakaapu am kinuasa' ilo ru Ambiluo ri Aki Kapuuno'.

⁵ Nakatutun ilo noyo ra ati kulaan kinoonsoi ru bala' ri Aki Kapuuno' am nakaili' ilo noyo ra kuasa' ri Aki Kapuuno' mogondo' ra kuasa' ra Io mamarinta ra tauli no.

⁶ Amon ru nakaili' ilo ngaangai' raginio, bagu liminugut ilo intor ri Kristus, kalo boo lair makatalikur ilo saguli', sabap ragitio koson ayuk ra manalip ilo poyo saguli' ra Anak ri Aki Kapuuno' saboi asabin nilo Io ra saang ru ulun masuang.

⁷ Tana' ondo' monosop ra rasam ondo' masalok rumatu', am mampatuu' boo ra tatanom ru ulun-ulun mantatanom no, tana' raginio niayuk barakaton ri Aki Kapuuno'.

⁸ Kaa' amon ru sakot am kusingan boo patuwon no, tana' no kolondo' onong am ibatin lair ri Aki Kapuuno' koson ra pusoon solobo'.

⁹ Pabukat kau ngai' ondo' tagamin ku, kalo magalabo akai ra lumugut kau koson risilo ondo' kon mai ra raitii' ni. Makapandai akai ra ondo' baalon min mampakito ra akau binayag noyo ri Aki Kapuuno'.

¹⁰ Io mabanis guang am kalo malilianan No ati koson nangandoi kau Riso, monogom kau Riso am nangindangan kau ra ulun Kristian ragili suku' raino.

¹¹ Maayo guang mai ra akau sigagama' mirot pangindangan saboi ra pupus, suku' moowot min lalansanin mini.

¹² Ginio nai ra kalo masaga' akai ra akau sumauk ra ulun matiar, kaa' ra akau tumilu ra ulun bokon ondo' mangintopot ri Aki Kapuuno' am poyo mataan guang. Maa' raginio makaapu kau ra ondo' binantu' ri Aki Kapuuno'.

Bantu' ri Aki Kapuuno' kalo makulau

¹³ Paat ri Aki Kapuuno' nangani' ra bantu' ri Abragam, nagibot Io ra atan ondo' baalon Nano totopot masauk. Kolondo' sangulun pana maayo kuasa' intor Riso, ginio ra inggalan Nano ayuk galama' inalap Nano ra Io nagibot i:

¹⁴ “Barakaton tokou am aniin tokou ra sayat masuang.”

¹⁵ Naginaa ayuk i Abragam ra guang mataan, saboi nakaapu io ra atan ondo' binantu' ri Aki Kapuuno' i riso.

¹⁶ Paat ra ulun magibot, alapon nilo inggalan ru ondo' maayo kuasa' intor risilo, bagu kolondo' boo pantataaman.

¹⁷ Sabap ra maayo guang ri Aki Kapuuno' mampainono' ra ulun bantuin Nano ra kalo kulawon No bantu' Nano, rinuangan No bantu' i ra nagibot Io ra atan ondo' baalon Nano totopot masauk.

¹⁸ Sabap ri Aki Kapuuno' kalo mapandai magabau, bantu' am ibot Nano kalo maalap kakulau. Intor raginio itakau ondo' nakialung Riso, maikang kalansanan takau ra bantu' Nano suguton No.

¹⁹ Koson ra simbatu mampauog ra parau ra kalo maabas, koson niayuk ra kalansanan takau mambaal ritakau kalo minggalur intor ri Aki Kapuuno'. Am koson ra Tingganai imam nakarampus ra tabir ru Intok Matulai Kaga' giu' ra Baloi Tuhan, i Jisus niayuk nakarampus ra suruga'.

²⁰ Io noyo nangukab galing ra ralan mongoi ra giu' koson ra suali ritakau. Io nasauk ra Tingganai Maayo Imam ra mantilayun, koson ra imam Milkisidik ra galing i.