DANIL 10 - Tanou Moonsoi Timugon

Pinaintalang ri Danil giu' ra igig ru Sungoi Tigris

¹ Paat ra bilor katalu ra pamarintaan ru Raja' Koris koson ra raja' Pirsia, rondo' tanou ondo' pinasaboi ri Danil ondo' niayuk piawon ri Biltsajar. Tanou raginio motopot kaa' mapagon kaga' maratian. Tanou raginio pinabala' ri Danil ralalom rondo' pinaintalang.

² Bulintok raginio tatanga' aku mangulir buoi talu ngaminggu'.

³ Buoi ru ginio, kalo nangakan aku ra akanon maamis kapoam kual; kalo nanginum aku ra wain kapoam nansurai ra abuk.

⁴ Paat ra orou karuo ngoopor am apat ra sila' kasaa' bilor raginio, minigor aku giu' ra igig ru Sungoi Tigris ondo' maayo no.

⁵ Tungar aku am nakakito ra sangulun ondo' nambayang ra bayang linon am abot ondo' binaal intor ra mas kopoyo.

⁶ Inan nano kukuliat koson ra intan; bulos nano mapaang koson ra paang ru ganit, am mato nano bibilak koson ra apui. Kalindu' am kalayam nano manguliat koson ra tambaga' ondo' bagu inisasan, am bolos nano koson ra ngonsol ru ulun masuang.

⁷ Aku sangulun ayuk ondo' nakakito ra pinaintalang no. Ulun ondo' nababaya' raki' kalo nakakito ra atan-atan pana, kaa' nalaa' ilo. Nagiru' ilo am nansibuni.

⁸ Tinatang aku sangulun, am magilong ra pinaintalang ondo' makaimuag no. Kalo boo maikang aku, am bulos kuno mabula' kaga'.

⁹ Pokorongog aku ra bolos nano, naratu' aku nakalaub ra tana' am nalausan.

¹⁰ Kopongo raginio mokoondo' kalindu' ondo' nampaguut raki' am nangindangan raki' siminukal liliwa' mangikang toojo ra atur am kalindu'.

¹¹ Kon ru malaikat no raki', “Okou Danil, motogom i Aki Kapuuno' rirun. Sukal no am rongogo' toojo ragu kuti. Sinusub aku mongoi rirun.” Karagu no ginio, sukal aku, am lakat poyo monontol.

¹² Kono poyo, “Okou Danil, pai' kalaa'. Norongog noyo ri Aki Kapuuno' pakiasian muno intor ra orou kasaa' muno namatas koson minggana' inan koson mokoowot ra pangaratian. Minatong aku koson ra taam ru pakiasian muno.

¹³ Malaikat manindung ra pamarintaan ru Pirsia minanggal raki' buoi ruo ngoopor am rondo' ngoorou. Kopongo raginio, i Maikol, rondo' intor ra tingganai ru malaikat, minatong nangindangan raki', sabap ra pinatatang aku sangulun giu' ra Pirsia.

¹⁴ Raino matong aku koson mambaal rirun makarati' ra baal ondo' masauk ra bansa' muno. Pinaintalang no intor ra baal ru orou matong.”

¹⁵ Bulintok ra io mindagu ra baal raginio, pinakuku' ku bulos. Kalo nakaindagu aku.

¹⁶ Malaikat ondo' baal nano koson ra ulun no pana nampatutui boo ra kalindu' nano am nangambong ra bibil kuno. Indagu aku riso, “Tuan, pinaintalang ti nampalawo kaga' raki', saboi kalo lumonggo'-longgo' aku monontol.

¹⁷ Aku koson ra sangulun ulipon ondo' muma' ra tuan nano. Ati kulaan kia aku makaindagu rirun? Kalo boo maikang aku am ampusan aku.”

¹⁸ Igondo' poyo io nangambong raki' am malimanan ku maikang poyo.

¹⁹ Kono, “Motogom i Aki Kapuuno' rirun. Ginio ra pai' kalaa' am pai' pagalabo intor ra atan-atan pana.” Karagu no ginio, giminaai ikang kuno. Indagu aku boo, “Tuan, indagu no. Pinaikang mu aku.”

^20-21 Kono poyo, “Nakapandai kou kia kua ratong aku rirun? Aku minatong koson mambala' ra suang ru Kitab Motopot rirun. Raino musiti' aku muli' am manggal ra malaikat manindung ru Pirsia. Mopongo raginio malaikat manindung ru Junani poyo sumalula', am kolondo' osoi pana mangindangan raki' ondo' ak am i Maikol, malaikat manindung ru Israil.