ဤစာအုပ်သည် ဘုရားသခင်မှ အားသွင်းပေးထားသော စာအုပ်မဟုတ်ပါ။ ၎င်းသည် ခရစ်ယာန်၏ ကာနွန် သို့မဟုတ် ယုဒလူမျိုး၏ တာနာ့ခ်၏ အစိတ်အပိုင်းမဟုတ်ပါ။ သမိုင်းနှင့် သုတေသန ရည်ရွယ်ချက်များအတွက်သာ ပြသထားပါသည်။ အပြည့်စုံသော ရှင်းလင်းချက်ကို ကြည့်ရန် I DANIL AM DEWA BEL AM TAMBUAKAL BABIL 1_1 - Tanou Moonsoi TimugonI Danil am Imam-imam ru Dewa Bel 1 Kopongo Raja’ Astiagis minatoi, pamarintaan nano tinalison ri Koris, ulun ru Pirsia. 2 I Danil iono maminson ra raja’ ondo’ minayan giu’ ra istana am ondo’ urumaton toojo intor ra rangan-rangan nano. 3 Ulun ru Babil mokoondo’ rondo’ sinungkalalaing ondo’ sabiton ri Bel, am koson ra pakuan nano ra moonong orou mangingkual ilo mopor am ruo ngagantang tapung moonsoi kaga’, apat ngoopor ngainan domba am ruo ngaatus ngalito wain. 4 Mangintopot Raja’ Koris ra Bel no dewa, am moonong orou mongoi io samba riso. Kaa’ nagulayun i Danil sumamba ri Aki Kapuuno’ nano galama’. 5 Paat ra sangarawan nangkuot raja’ ri Danil, “Kua rirun kalo sumamba ri Bel?” Taam i Danil, “Sabap ra kalo sumamba aku ra sinungkalalaing binaal ru ulun, kaa’ i Aki Kapuuno’ ondo’ naayag, ondo’ nambaal ra limbowon am tana’ ti am makakuasa’ ra ngaangai’ ondo’ naayag.” 6 Pangkuot raja’, “Ginio ra okou kalo mangintopot ra i Bel noyo i aki kapuuno’ ondo’ naayag? Kalo kia nakakito kou kula’ suang ru akanon am inumon ondo’ koyoon nano ra moonong orou?” 7 Kaa’ nakakurit i Danil am indagu, “Pai’ kasaga’ ruungon, okou raja’. Io ondo’ sabiton ra Dewa Bel no sinungkalalaing ayuk ru tana’ labu’ inangkupan ra tambaga’ ralimbou nano. Kalo igondo’ io mangakan kapoam manginum ra atan pana.” 8-9 Norongog ginio, siminangit kaga’ raja’. Piniau no imam-imam ru dewa Bel. Suang nilo tulu’ ngoopor ngaulun, kalo poyo nakasimpung anak andu’ nilo. Indagu raja’ ra imam-imam no, “Painonoo’ raki’ ra ngaangai’ akanon pinasulung inakan ru Dewa Bel. Amon ru kalo makainono’ min ginio, ukumin kau ra matoi. Kaa’ amon ru maalap, i Danil ukumin ra matoi, sabap ra nagasab ri Dewa Bel.” Nangiou i Danil ra rinagu ru raja’. 10 Raja’ pana nabaya’ ri Danil minongoi ra kuil Bel. 11 Giu’ no indagu imam-imam ra raja’, “Moonsoi mingkual akai maa’ raginio okou raja’ galama’ mampasulung ra akanon giu’ ra rasawat ru mija’ taak simbalui am mampasulung ra wain nano. Mopongo raginio angabin mu kulobon am saapin ra segel ru pamarintaan. 12 Paat ra okou sumaguli’ ra susuab no am makakito ra i Bel kalo makakai’ ra ngaangai’ no, ukumin akai ra matoi. Kaa’ amon makakai’ io ra ngaangai’ no, i Danil musiti’ matoi sabap ra nanguu’ ra kalo motopot intor ramon.” 13 Imam-imam no kalo magalabo sabap ra nambaal ilo ra kulobon nasibuni giu’ ra ragana’ ru mija’ ru taak simbalui. Moonong rondom sumubol ilo ra kuil maya’ ra kulobon raginio am mangai’ ra ngaangai’ akanon pasulungon. 14 Pakaingkual imam-imam no, nampasulung raja’ ra akanon ri Bel. Panusub boo i Danil ra ulun-ulun mangindangan riso magibit ra kaau am patauko’ ra ngaangai’ sulig ru kuil. Raja’ ayuk nakakito risilo nambaal raginio. Kopongo ginio miningkual ilo. Kulobon kinaput am sinaapan ra segel ru pamarintaan, am ugar ilo. 15 Rondom raginio koson ra kaindalaman imam-imam nababaya’ ra anak andu’ nilo siminubol ra ralalom ru kuil minaya’ ra kulobon nakasibuni am nangai’ ra ngaangai’ akanon am wain. 16 Suabon no riminondom raja’ minatong nabaya’ ri Danil. 17 Pangkuot raja’, “Lakat poyo kia moonsoi segel no?” Taam i Danil, “Lakat poyo moonsoi, raja’ kuno.” 18 Kaukabi’ ayuk kulobon, inilayan ru raja’ giu’ ra mija’ ru taak simbalui ondo’ naliung-liung am nompogolok, “Totopot maayo kou, Bel! Kolondo’ pamparuungan ra atan pana rirun!” 19 Kaa’ nakakurit i Danil am nanginggalar ra raja’ sumubol. Kono, “Ilai’ sulig. Nakapandai kou raja’ kia ra babaya’ ru kalayam ri osoi ginio?” 20 Taam raja’, “Ginio babaya’ ru kalayam ru ungkuyon, ruandu’ am lalaing-lalaing.” 21 Siminangit io kaga’ am nanusub maa’ raginio imam-imam am anak andu’ nilo rokopon. Ilo pana nanulu’ riso ra kulobon nakasibuni ondo’ bayaan nilo moonong rondom koson mangakan ra akanon pinasulung ondo’ patampakon giu’ ra mija’ ru taak simbalui. 22 Kopongo raginio nanusub raja’ maa’ raginio imam-imam pinatoi. Pinataak ru raja’ i Bel ri Danil ondo’ nanutuk ra sinungkalalaing no am niayuk kuil no. Pinatoi ri Danil tambuakal Babil 23 Mokoondo’ sanginan tambuakal maayo ondo’ sambaan ru ulun Babil. 24 Paat ra sangarawan, indagu raja’ ri Danil, “Kalo maalap mu ra imbuali ra io i aki kapuuno’ ondo’ naayag. Ginio ra samba no riso!” 25 Taam i Danil, “Sambaan ku ayuk Tuhan i Aki Kapuuno’ kuno. Io ayuk i Aki Kapuuno’ ondo’ naayag. 26 Amon ru mangiou kou raja’, tambuakal no potoyon ku ra kalo manangilang kapoam tataun lalamba’.” Indagu raja’, “Iou noyo, iowon ku.” 27 Alapo’ boo ri Danil tiir, lomok am abuk. Ngaangai’ no sinauk no ra kuui-kuui ondo’ mapungol am pinasuu’ ra kabang ru tambuakal. Ngaangai’ no inakan koyoo’ ru tambuakal saboi io liminaput. Indagu boo i Danil, “Ilai’, ginio noyo sambaan ru ulun Babil!” 28 Nokorongog ra baal raginio, ulun-ulun ru Babil siminangit kaga’ am giminuor ra raja’. Golok ilo, “Raja’ nasauk noyo ra ulun ru Jaudi! Pinatoi no noyo imam-imam am nanutuk ri Bel. Raino pinatoi no tambuakal no!” 29 Minuma’ ilo ra raja’ am indagu, “Pataako’ i Danil ramon! Amon ru kalo, akau sambaloi potoyon mai!” 30 Nalimanan ru raja’ ra najajalan io saboi nampataak kalalaat ri Danil risilo. 31 I Danil pana pinatiran ra ralalom luang ru singa’ am tinatang ra giu’ buoi onom ngoorou. 32 Giu’ ra luang no mokoondo’ tulu’ ngainan singa’, am moonong orou singa’-singa’ no pakanon ra ruo baangkai ru ulun am ruo ngainan domba. Kaa’ buoi onom ngoorou no bibiag-bibiag no kalo pinakan ra atan pana maa’ raginio mansaam ri Danil. Binayag i Danil intor ra luang ru singa’ 33 Paat raginio mokoondo’ sangulun nabi giu’ ra pagun Judia ondo’ ininggalanan ri Abakuk. Bagu io ayuk nangansak ra linusou am pinatapung putul-putul ru ruti’ ra ralalom ru mangkuk. Io pana masaga’ mangator ra linusou no ra ulun-ulun ondo’ tatanga’ mangkumos ra gandum giu’ ra umo. 34 Kaa’ giu’ ra tanga’ ralan malaikat ru Tuhan minindagu riso, “Ibito’ akanon no ra Babil am pataako’ ri Danil giu’ ra luang ru singa’.” 35 Taam i Abakuk, “Tuan, kalo igondo’ aku minongoi ra Babil am kalo nakapandai ati luang ru singa’ no.” 36 Malaikat pana nampaguut ra abuk nano am nagibit riso ra Babil minaya’ ra kinapuor ru angin. Kopongo raginio patuuno’ no i Abakuk giu’ ra mamaar ra luang ru singa’. 37 Golok i Abakuk, “Danil, Danil! Gitio akanon ondo’ inataran ru Tuhan rirun. Alapo’!” 38 Nokorongog raginio pakiasi’ i Danil, “Iou Aki Kapuuno’, nangkara’ Kou raki’. Kalo igondo’ Kou pangiruan ra ulun ondo’ motogom rirun.” Io pana miningkakat am nangakan ra akanon no. 39 Paat raginio niayuk i Abakuk inibit ru malaikat ri Aki Kapuuno’ siminaguli’ ra intok nano. 40 Paat orou ra katulu’ minatong raja’ koson manulaboi ri Danil. Pakasaboi io giu’ ra luang am nagilong ra ralalom, ilai’ no i Danil nanturung ra giu’. 41 Golok boo raja’, “Iou Tuhan, i Aki Kapuuno’ ri Danil, totopot maayo Kou! Okou ayuk i Aki Kapuuno’!” 42 Io pana nanusub maa’ raginio i Danil paingkualon intor ra luang, kaa’ ulun-ulun ondo’ masaga’ mamatoi ri Danil, pinapatir no giu’ ra ralalom no. Paat raginio niayuk giu’ ra talupak ru mato ru raja’, sinaam ilo ru singa’-singa’ no. |
Hakcipta © Bible Society of Malaysia, 2013.
Bible Society of Malaysia