AYUP 8 - Tanou Moonsoi TimugonBildad 1 Kopongo raginio indagu i Bildad intor ra pagun Sua, 2 “Kula' poyo buoi muno mindagu koon raginio? Koson ra bolos ru angin ayuk ragu-ragu muno. 3 Kalo igondo' i Aki Kapuuno' nampajajou ra katimpakan; kalo igondo' Io kaputat mambaal ra baal ondo' moonsoi. 4 Anak-anak muno maaru' makatula noyo ri Aki Kapuuno', maaya' noyo ra ilo inukum Nano. 5 Kaa' raino saguli' no ri Aki Kapuuno', am pakimasi' no Riso Ondo' Maayo Kaga' Kuasa'. 6 Amon ru totopot mabanis guang muno, matong i Aki Kapuuno' am mangindangan rirun am niayuk tapulion sasambaloi muno koson ra pambalos rirun. 7 Ngaangai' kalangkayaan muno ondo' kalio no kolondo' onong, amon pinogondo' ra atan ondo' maalap muno ra maagu no. 8 Karaa' toojo kapintaran ra galing i; karaa' noyo nailian ru kinamatuaan takali. 9 Kaayagan takau mariwa' kaga' am kolondo' natandaan takau; itakau mansail koson ra babara' giti ra tana' ti. 10 Kaa' musiti' kou ilaan ru ulun mapintar ra galing i; rongogo' noyo ragu-ragu nilo, 11 ‘Galaga tumuu' giu' ra intok makatimug ayuk, am mensiang matuum ayuk giu' ra tana' makatimug. 12 Amon ru lumasak timug, lumonot boo galaga, mataki' poyo intor ra tutuu' ra bokon. Alika, galaga no lakat poyo mamulok kaga' koson tatason am pakayon. 13 Koson niayuk ra ulun ondo' kalo makaulig ri Aki Kapuuno'; kalansanan nilo matatak paat ilo makalilian ri Aki Kapuuno'. 14 Malansan ilo ra banang ondo' malumot, mangintopot ilo ra tambaloi ru lawa'. 15 Mapiot kia bunsut no amon ru saukon ra sandigan? Maikang kia banang amon saukon ra guutan?’ 16 Ulun malaat tumuu' koson ra sakot ragana' ru mato ru orou, koson ra sakot ondo' timinuu' ra titikop ru taman. 17 Bakat nano riminilit ra batu, am liminokot ra moonong batu no. 18 Kaa' kabubul boo sakot no kolondo' ulun nakapandai ra sakot no igondo' soroi ra giu' no. 19 Topot, ginio ayuk kaansukan ra ulun malaat; raino ulun ra bokon ondo' siminuali ra intok nilo. 20 Kaa' i Aki Kapuuno' kalo igondo' nangiruan ra ulun ondo' gumagaya', Kalo igondo' No indangano' ulun malaat. 21 Mompoloso Io rirun makakurit am magilakup ra maansukan, 22 kaa' ulun ondo' masisang rirun tauyuon, am intok ayanan ru ulun malaat pusoon.” |
Hakcipta © Bible Society of Malaysia, 2013.
Bible Society of Malaysia