AYUP 38 - Tanou Moonsoi Timugon

Taam ru Tuhan ri Ayup

¹ Intor ra ralalom ru bagiu', indagu Tuhan ri Ayup,

² “Osoi kia okou saboi baani pagantangan guang ra kapintaran Kuno ra ragu-ragu ondo' sasambungon am kolondo' onong no?

³ Raino, tampos no muma' Raki', am taamo' pangkuatan-pangkuatan Kutu.

⁴ Soroi kono kia paat ra Aku nambaal ra tana' ti? Amon ru mapandai kou kaga', taam no.

⁵ Osoi kia mangaru' ra kinalangka' ru tana' ti? Osoi kia mampabawar ra tali panuku' koson manuku' raginio? Nakapandai kou kia ra taaman no?

⁶ Atan kia ondo' manungka' ra lugu'-lugu' ru tana' ti? Osoi kia ondo' mampabanta' ra batu pisuk ru tana' ti,

⁷ paat ra butitin-butitin ru susuab ti mababaya' marimbai, am ilo ondo' maayag giu' ra suruga' magilakup maansukan?

⁸ Osoi kia ondo' nampaangob ra kulobon koson mongompong ra raat malangka' paat ra timug tumampulak mingkual intor ra binunakan ru tana'?

⁹ Aku no ondo' nanaub ra raat ra gaun am nangusib riso ra kalandaman.

¹⁰ Inaru' Ku balitan ru raat malangka' am ra kulobon inalor, inampangan Ku ginio.

¹¹ Nambala' Aku riso, ‘Polos ragiti ayuk, am kalo boo kaaluron poyo! Giti noyo kinulun muno ondo' maikang musiti' lumonggo'.’

¹² Okou Ayup, igondo' kia kaayagan muno namparatong ra orou susuab ti, am manusub ra orou tumawang?

¹³ Igondo' kou kia panusub ra orou tumawang manguasa' ra tana' ti am kabulon ulun malaat intor ra intok pansibunian nilo?

¹⁴ Sinda mato ru orou mampakito ra bulur am limayak totopot makito koson ra sap ra tana' lia' am liningkom ra sukub.

¹⁵ Sinda mato ru orou mapaang kaga' ra ulun ondo' mambaal ra kalaatan, am mongompong risilo intor ra mambaal ra kalaatan.

¹⁶ Igondo' kou kia tuun ra puun ru mato ru raat? Igondo' kou kia pantana' giu' ra lonor ru raat?

¹⁷ Igondo' kia osoi pana manulu' ra kulobon garabang kapatayan ramuyun, kulobon ondo' nanili ra intok kapatayan ondo' molondom kaga' no?

¹⁸ Nakapandai kou kia ra kinalangka' ru tana' ti? Taamo' noyo, amon ru makapandai kou ra ngaangai' no.

¹⁹ Nakapandai kou kia ra intor ru sinda? Nakapandai kou kia ra intok ru kalandaman?

²⁰ Maalap mu kia mangaru' ra polos ru kalandaman am sinda, kapoam karuruo no atarin muli' malupus matong?

²¹ Indoson mu ra nakapandai kou ra taam ru ngaangai' no, ilain ayuk koson nakasaang kou paat ra Aku nambaal ra tana' ti; maaru' ra matutuo kono kaga'!

²² Igondo' kou kia ongoi ilong ra gudang-gudang Kuno, intok nambulian Ku ra ais am rasam batu?

²³ Inula' ku ginio koson paat ra kapaganan, koson ra orou pamulunsaran am pangayawan.

²⁴ Igondo' kono kia ongoi ra intok ru mato ru orou sumirang, kapoam minongoi ra intor toojo ru angin sirangon?

²⁵ Osoi kia ondo' mangkali ra parit tayar ru rasam maawas, am manampos ra ralan ra tayar ru tingkalur am ganit?

²⁶ Osoi kia ondo' mamparatu' ra rasam giu' ra intok ondo' kalo ayanin ru ulun?

²⁷ Osoi kia ondo' mamasa' ra tana' ondo' mapua' am kolondo' tutuu', saboi sakot ra giu' no tumuu'?

²⁸ Mokoondo' kia rasam no ra ama' toojo? Osoi kia ondo' naganak ra bolobou?

²⁹ Mokoondo' kia ais no ra ina'? Osoi kia naganak ra bolobou mokotog?

³⁰ Osoi kia ondo' nangulau ra timug nasauk ra batu am nompokotog ra ralimbou ru raat?

³¹ Mabangkos mu kia santimung ra Butitin Kartika, kapoam mamugal ra bangkos ru Butitin Orion?

³² Matingganai mu kia butitin-butitin ra pogonong ru bulintok, am mangaak ra Biduk Maayo am Biduk Boborok?

³³ Nakapandai kou kia ra ukum-ukum giu' ra limbowon, am makapangaru' kou kia raginio ra tana' ti?

³⁴ Magalakan mu kia gaun, am manusub riso mamasa' rirun ra rasam?

³⁵ Amon ru manusub kou ra ganit maa' raginio mararayus kukurilop, matong kia ganit rirun am mindagu, “Iou aku, tuan!”?

³⁶ Osoi kia mambala' ra susuit ibis ra Sungoi Nil mampaliur? Osoi kia ondo' mambala' ra manuk tandaa' ra rumasam?

³⁷ Osoi kia ondo' totopot mapintar koson manguntob ra gaun, am mampalapiat riso saboi rumatu' rasam,

³⁸ rasam ondo' mompokotog ra kaau masauk ra takunul, am tana' masauk ra monsosokot?

³⁹ Makapagasu kou kia ra ondo' akanon ru singa', am mamasug ra anak ru singa',

⁴⁰ paat ra singa' mansibuni giu' ra ralalom ru luang batu, kapoam maginaa ra ondo' saamon giu' ra intok pagupuan nano?

⁴¹ Osoi kia mampakan ra bangkaak maitom paat ra susuit no kakatisuk maguyum ra akanon, paat ra gogol-gogol ru susuit pasapios Raki' makipakan?