AYUP 24 - Tanou Moonsoi Timugon

¹ Kua kia kalo inaru' ri Aki Kapuuno' orou pangakiman, maa' raginio ulun ondo' makaulig Riso mokoowot ra katimpakan?

² Mokoondo' ra ulun mapabanding ra batu balitan koson mapalangka' ra tana'; nantakou ilo ra domba am inaput pinasimpung ra bibiag tinambiag nilo.

³ Ginaau nilo kaladai longgom ru anak nailusan ra matuo, am koson ra jaminan, inalap nilo sapi' gawayan intor ra ruandu' napuor.

⁴ Nongompong kau ra ulun musikin mokoowot ra kuasa' nilo galama', ulun musikin pana nansibuni kalalaat.

⁵ Ginio ra koson ra kaladai masigo, ulun musikin maguyum ra akanon giu' ra tana' kaagisan; giu' no ayuk mokoondo' ra akanon ra anak-anak nilo.

⁶ Manganam ilo kalalaat ra gandum giu' ra umo ru ulun ra bokon am mangkatu' ra kawa' ru anggur giu' ra umo ru ulun malaat.

⁷ Mombolong ilo ra kolondo' bajang paat ra rondom, ra kolondo' rondo' pana koson mampalasu' ra inan.

⁸ Naasa' ilo kaga' sabap ra rasam ondo' riminatu' giu' ra rasawat ru gunung, Nampipisi' ilo ra bulur batu koson sindungan.

⁹ Ulun malaat mangulipon ra anak-anak ondo' nailusan ra ama', am nangalap ra lalagang ru ulun musikin koson ra jaminan.

¹⁰ Ulun musikin miningkual kalalaat ra kolondo' bayang; paat mangkumos ra gandum naitilan ilo.

¹¹ Intor ra kawa' ru jaitun nambaal ilo ra umau, am intor ra kawa' ru anggur, nambaal ilo ra inumon, kaa' ilo galama' pinaason.

¹² Giu' ra bandar morongog tangi' ru ulun ondo' napilatan, am ulun ondo' matipamukat, kaa' kalo rinongog ri Aki Kapuuno' pakiasian nilo.

¹³ Mokoondo' ulun ondo' mangimpai ra sinda, kalo nakaulig ilo am kalo minaya' ra ralan no.

¹⁴ Paat ra maar matawang, ulun mamatoi mingkual mamatoi ra ulun musikin; am paat ra rondom, mingkual ilo mantakou.

¹⁵ Ulun ondo' mansawa' maginaa ra mamai', maa' raginio kalo mauligan, taubin nilo bulos.

¹⁶ Paat ra rondom ulun mantakou manubol ra baloi ru ulun, kaa' paat ra matawang mansibuni ilo am sumili intor ra sinda.

¹⁷ Ra tayar nilo, tampilon ra susuab ti makalalaa', kaa' kalandaman ondo' makalalaa', mampaansuk.”

Jopar

¹⁸ “Ulun malaat inabas ru liur, am tana' ondo' linonggom nilo inulas ri Aki Kapuuno'; kalo boo mangandoi ilo giu' ra umo ru anggur nilo.

¹⁹ Koson ra ais lumiot matiu' ru tampio am mato ru orou, ulun makatula pana lumiot, tolonon ru intok ru ulun minatoi.

²⁰ Ina' nilo galama' nakalilian risilo, am lingguang nangakan ra inan nilo. Inggalan nilo kalo boo karaan; pinuso ilo koson ra puun tataun ondo' naaba'.

²¹ Baal raginio nasauk sabap ra nangimbolo' ilo ra ruandu' napuor, am kalo makaasi' ra ruandu' tabanang.

²² I Aki Kapuuno' am kuasa' Nano, namuso ra ulun mapanggol kaga'; mimbuor ri Aki Kapuuno', matoi boo ulun malaat.

²³ Maaru' i Aki Kapuuno' mompoloso risilo maayag ra moonsoi, kaa' tainuin No ilo ra kalo lalanggain.

²⁴ Sangkinolor ayuk ulun malaat makasugut, am lumiot ra sabubuoi no. Lumonot ilo koson ra sakot, koson ra gandum ondo' lontobon intor ra tanggayan.

²⁵ Maimbuali kia ru osoi ayuk baal raginio? Makaanggal kia osoi pana ra kinotopot ru ragu-ragu kutu?”