AMSAL 28 - Tanou Moonsoi Timugon

¹ Ulun malaat masimbul kabalu' pana kolondo' ulun mangilou risilo, kaa' ulun mabanis guang baani koson ra singa'.

² Amon ru bansa' gumuor, mangunguasa' nano masalok pagalig-galig; amon ru tingganai no mapandai am mapintar, pamarintaan nano maikang am mapanggol.

³ Mangunguasa' ondo' mangimpai ra ulun musikin koson ra rasam maawas ondo' mapakapasa' ra kumoson.

⁴ Osoi-osoi ondo' mampalilian ra ukum, sumaung io ra ulun malaat; osoi-osoi gumagaya' ra ukum, makimantula' io ra ulun malaat.

⁵ Ulun malaat kalo makaulig ra katimpakan; ulun ondo' sumamba ra Tuhan, io no makarati' toojo.

⁶ Moonsoi poyo musikin am mabanis guang ka langkaya' am tumalansiang guang.

⁷ Ulun mamulok ondo' gumagaya' ra ukum io no mapintar. Ulun makimangkubayau ra mangangandus mapakauyu' ra ama' nano.

⁸ Osoi-osoi masauk ra langkaya' ondo' kologoon no bunga' ru ruit am niayuk mamparuung ra ulun bokon, rapu' nano masauk ra longgom ru ulun bokon ondo' makaasi' ra ulun musikin.

⁹ Amon ru kalo gumagaya' kau ra ukum, i Aki kapuuno' pana mataman ra pakiasian muno.

¹⁰ Osoi-osoi mapalayau ra ulun mabanis guang, masulungan ru kalaatan nano galama'. Ulun ra kolondo' sala barakaton saboi maansukan.

¹¹ Ulun langkaya' masalok mamanggo ra io mapintar, kaa' ulun musikin ra mapintar makapandai toojo ra paliso ru ulun langkaya' no.

¹² Amon ru ulun moonsoi masauk ra mangunguasa', ngaangai' ulun maansukan, kaa' amon ru ulun malaat mamarinta, ngaangai' ulun mansibuni.

¹³ Osoi mangali' ra tula nano kolondo' ampos ru kaayagan nano. Osoi mangakun am mangiruan ra tula nano, tagamin ri Aki Kapuuno'.

¹⁴ Pakaansuk noyo ulun ondo' gumagaya' ra Tuhan, kaa' ulun mokotog ulu iono pusoon.

¹⁵ Mangunguasa' ra malaat ondo' mangulipon ra ulun musikin koson ra singa' ondo' mansangal kapoam baawang ondo' mansaam.

¹⁶ Mangunguasa' ra sasambungon no malaat kaga', kaa' mangunguasa' ondo' masisang ra kalo mabanis guang pamarintaan nano mabuoi.

¹⁷ Sangulun mamamatoi pampaguangan nano koson ra ilolowon saboi io matoi. Pai' kinam pangindangan riso.

¹⁸ Ulun mabanis guang bayagon, kaa' ulun ra namparuung iono pusoon ra sangkuliop ayuk.

¹⁹ Ulun magitatanom ra mapirot kaga' makaalap ra masuang akanon, kaa' ulun magitambingai ayuk masauk ra musikin.

²⁰ Ulun mabanis guang barakaton io ru Tuhan, kaa' ulun ondo' mataki' lumangkaya', kalo makalabus io ra ukumin.

²¹ Ulun ra maagat sapapa' iono rondo' baal ra nasala, kaa' mokoondo' niayuk akim mambaal koson raginio koson mangapu ayuk ra rasua kabalu' pana kalo masuang.

²² Ulun makalit mampaguang ra mataki' lumangkaya'. Kalo malimanan no ra kamusikinan mataki' makalumpa' riso.

²³ Ulun mansawai pupus nano urumaton poyo ka ulun mongompor.

²⁴ Osoi mantakou ra matuo nano am guangon no baal koson raginio kolondo' tula, io no nogondo' ayuk ra mantatakou.

²⁵ Paliso ra mangangkum maparatong ra kapaganan. Osoi sumingkayut ra Tuhan iono makakaansukan.

²⁶ Ulun ondo' maya' ra pampaguangan galama' iono ulun sasambungon. Ulun ondo' maya' ra pangilaan ru ulun mapintar iono bayagon.

²⁷ Osoi mataau ra ulun musikin kalo matutusan. Osoi ondo' kalo mampalio ra ulun musikin iono ulason.

²⁸ Amon ru ulun malaat masauk ra mangunguasa', mamagun mansibuni; kaa' amon ru ulun malaat mapuso, ulun matimpok mamarinta poyo ra ati-ati ayuk intok.