AMSAL 21 - Tanou Moonsoi Timugon

¹ Pangkaraan ru raja' Tuhan noyo manguasa' koson ra Io nangaru' ra tulukan ru sungoi.

² Pangkaraan ru ulun nansalinut binaal nilono moonsoi; kaa' karaa' noyo, mapandayan ru Tuhan suang ru guang ru ulun.

³ Binaal ra moonsoi am matimpok mapabansuk ra guang ru Tuhan ka taak simbalui ra pataakon.

⁴ Ulun malaat makatula sabap ra kinuasa' ru limbau ru guang am mamanggo.

⁵ Inatangan ru ulun marajin makaampos ra lumuab-luab kaa' pamatasan ra maajag-ajag mangkinibit ra kalubatan.

⁶ Kinalangkayaan ra naalap intor ra ralan kalo mabanis guang, sala' ka ayuk kalo mantilayun kaa' maaru' magibit ra kapatayan.

⁷ Ulun malaat kalo masaga' mambaal ra baal matimpok; kalaatan nilono makapatoi risilo galama'.

⁸ Ulun ondo' makasala makaaya' ra ralan pagigisuk; ulun ra moonsoi maya' ra ralan mabanis.

⁹ Moonsoi poyo mayan ra pinuusan ru baloi ka mayan ra ralalom ru baloi masimpung ra andu' ondo' magail ayuk makimansangor.

¹⁰ Ulun malaat guangon nilono kalaatan ayuk; kalo makaasi' ilo ra osoi-osoi ayuk pana.

¹¹ Ukuman ra ulun ondo' magusun ra tinaulian masauk ra pangilaan ru ulun sasambungon. Ulun mapintar mokoowot ra katutunan bulintok ilaan.

¹² I Aki Kapuuno' Ondo' Maayo Kaga' Kuasa' makapandai ra atan nasauk ra baloi ru ulun malaat am ukumin No ilo suku' mapuso.

¹³ Ulun ra kalo masaga' mangkirongog ra laa ru ulun musikin, kalo lioon bulintok ra io galama' makiindangan.

¹⁴ Tangguang ra pinataak ralalom kalinuos ra ulun sumangit, mapakasalui ra guang nano.

¹⁵ Bulintok katimpakan paugaron, ulun moonsoi maansukan, kaa' ulun malaat malaa'.

¹⁶ Ulun ra kalo maya' ra ralan kaayagan ra mataau, maaru' sumuku' ra patayan.

¹⁷ Ulun ondo' magitambingai am mainum-inum am niayuk mangakan ra akanon malanging kalo lumangkaya'.

¹⁸ Ulun malaat makatutun ra imbolo' pinalumpa' nilo ra ulun moonsoi.

¹⁹ Moonsoi poyo mayan ra kaagisan ka mayan masimpung ra andu' ondo' masaga' makimansangor am masasangit.

²⁰ Ulun mapintar magulayun langkaya', kaa' ulun sasambungon anduson no rapu' nilono.

²¹ Ulun mabanis guang am moonsoi guang makaumur maawar. Urumaton io am matimpok pamakuan nilo riso.

²² Ulun mapintar makagaau ra bandar ondo' inalungan ru saujor-saujor ra maikang, am lunsayon nilo timbok ru bandar ondo' masauk ra kalansanan nilo.

²³ Ilalain ra mindagu maa' raginio kalo malumpa' ru kapaganan.

²⁴ Ulun malilimbau am minsawat guang, masaga' mapakaruol ra guang am kolondo' guguang.

²⁵ Ulun matiar kalo masaga' mangandoi; potoyon io ru gogoton nano.

²⁶ Karaan nano kasagaan nano ayuk; kaa' ulun gumagaya' ri Aki Kapuuno' makapanaak saboi malabaan.

²⁷ Masisang Tuhan no ra taak simbalui ru ulun malaat, mulu' poyo amon ru taak simbalui ra pataakon no mokoondo' kuayan ra malaat.

²⁸ Paraguon ru ulun maabau-abau kalo maintopot, kaa' paraguon ru ulun ondo' maintopot no apuon.

²⁹ Ulun mabanis guang malansan ra inan nilo galama', kaa' ulun malaat magakal ayuk.

³⁰ Kapintaran, katasikan am kapandayan ru ulun kolondo' onong amon ru Tuhan kalo masaga' ritakau.

³¹ Potomposon nilo kuda koson mongoi pangayou, kaa' Tuhan mangaru' ra mamanang.