2 SAMUIL 3 - Tanou Moonsoi Timugon

¹ Pangayawan ru ulun minaya' ra sasambaloi ru Raja' Saul am ulun minaya' ra sasambaloi ru Raja' Daut narayus nasauk ra nabuoi. Gumaai ikang ru Raja' Daut, kaa' gumaai lawo ru pantula' nano.

Anak-anak ungkuyon ru Raja' Daut

² Gitio noyo onom ngaulun anak ungkuyon ri Raja' Daut ondo' inanak giu' ra Gibron maya' ra pansunuan ru naganakan nilono: I Amnon, ina' nano i Aginoam intor ra Jijriil;

³ i Kiliab, ina' nano i Abigail, napuor ri Nabal intor ra Karmil; i Absalom, ina' nano i Maakga, anak ruandu' ru Raja' Talmai intor ra Gisur;

⁴ i Adonia, ina' nano i Gagit; i Sipatia, ina' nano i Abital;

⁵ am i Jitriam, ina' nano i Igla. Koonom-onom ngaulun anak ungkuyon no inanak giu' ra Gibron.

Naguum i Abnir am i Raja' Daut

⁶ Liliwa' pangayawan narayus nasauk ra ulun minaya' ra Raja' Daut am ulun minaya' ra Raja' Saul, mirot i Abnir koson kuasa' nano gumayo poyo ra gino ngai' ru ulun minaya' ra Raja' Saul.

⁷ Paat ra sangarawan, Raja' Isbosit anak ungkuyon ru Raja' Saul nanguu' ri Abnir riminulug ra ruandu' parulug ru Raja' Saul ondo' makainggalan ri Rijpa anak ri Aya.

⁸ Panguwan raginio nambaal ri Abnir siminangit toojo. Kono, “Indos mu kia ra aku ti nanumbalik ri Saul am minaya' ri Jiuda? Intor ragili gumagaya' aku ra Raja' Saul ama' muno, am pabukat-pabukat nano, am niayuk rangan-rangan nano. Inindangan ku noyo okou intor ra kinala ru Raja' Daut. Kabalu' pana raginio mononsol kou raki' sabap ayuk ru ruandu'!

^9-10 Moonsoi poyo mangindangan aku ra Raja' Daut, sabap ra binantu' noyo ru Tuhan riso koson manalison ra pamarintaan ti intor ra Raja' Saul am papag nano, am Raja' Daut pasaukon ra raja' ru ngaangai' Israil am Jiuda. Polosoon noyo i Aki Kapuuno' no mamatoi raki' amon ru kalo suguton ku bantu' ri Aki Kapuuno' ra Raja' Daut.”

¹¹ Kalo naguta' i Isbosit sabap ra malaa' io kaga' ri Abnir.

¹² Kopongo raginio nangator i Abnir ra ulun sinusub mongoi ri Daut ondo' paat raginio soroi giu' ra Gibron, ondo' nagibit ra bilin, “Osoi kia ondo' mamarinta ra pagun ti? Pambaal ra nabantuan raki', mangindangan aku rirun manguasa' ra ngaangai' bansa' ru Israil.”

¹³ Taam i Raja' Daut, “Moonsoi! Mambaal aku ra nabantuan rirun ondo' rondo' kitaakon: Musiti' ibiton min i Mikgal, anak ruandu' ru Raja' Saul no raki' paat ra okou muma' raki'.”

¹⁴ Nangator niayuk Raja' Daut ra ulun sinusub mongoi ra Raja' Isbosit, ondo' nagibit ra bilin, “Pasagulio' andu' kuli, i Mikgal raki'. Mambayar aku maatus kungkung ru tali' ru ulun ru Palistin koson manangandu' riso.”

¹⁵ Ginio ra nanusub Raja' Isbosit ra ulun sinusub nano nangalap ri Mikgal intor ra ralaki nano, i Paltiil anak ri Lais.

¹⁶ Kaa' sumunu' i Paltiil ri Mikgal liliwa' mantangi'. Paat ra ilo nakasaboi giu' ra bandar Bagurim, indagu i Abnir ri Paltiil, “Sama' noyo, uli' ayuk!” Kopongo raginio minuli' i Paltiil.

¹⁷ Minuma' i Abnir ra tingganai-tingganai ru Israil am indagu risilo, “Nabuoi noyo ra akau moogot koson Raja' Daut masauk ra raja' min.

¹⁸ Gitio noyo kaluagan min. Karaa' noyo ra binantu' noyo ru Tuhan kon raginio, ‘Mamakai Aku ra ulipon Kuno i Daut koson mamayag ra ulun Kuno Israil intor ra ulun ru Palistin am intor ra ngaangai' pantula' ra bokon.’ ”

¹⁹ Minindagu niayuk i Abnir ra bansa' ru Binjamin, am minongoi io ra Gibron koson mambala' ra Raja' Daut ra atan ondo' iniou noyo ru ulun ru Israil am bansa' ru Binjamin.

²⁰ Paat i Abnir nabaya' ra ruo ngoopor ngaulun minaya' riso no muma' ra Raja' Daut giu' ra Gibron, nambaal Raja' Daut ra bunsag risilo.

²¹ Kopongo raginio kon ri Abnir ra Raja' Daut, “Iowo' aku mugar koson mangkimait ra ngaangai' ru Israil maa' raginio magamung rirun. Mangapu ilo rirun koson ra raja' am kon raginio mamarinta kou ra titikop pagun, sumugut ra kasagaan muno.” Iniou boo ru Raja' Daut i Abnir mugar am minugar io ra matanda'.

Pinatoi i Abnir

²² Kopongo raginio i Joab mabaya' ra ulun ri Raja' Daut ra bokon, siminaguli' intor ra namulunsaran am nagibit ra masuang kuliamos ginaau, kaa' nakaugar noyo i Abnir intor ra Gibron. Iniou noyo ri Raja' Daut i Abnir mugar am minugar ra matanda'.

²³ Paat i Joab am pulalai nano nakasaboi, binalaan io ra i Abnir minuma' ra Raja' Daut, am iniou no io minugar am niayuk minugar ra matanda'.

²⁴ Ginio ra uma' i Joab ra raja' am indagu, “Kua baalo' mu kon raginio? Minatong i Abnir minuma' rirun. Kua iowo' mu io minugar ayuk?

²⁵ Maaru' nakapandai kou ra rinatangan ri Abnir ni mamparuung ayuk rirun, am koson makapandai ra intok angayan muno, am niayuk ra ngaangai' baalon muno.”

²⁶ Kopongo nangiruan ra Raja' Daut, nanusub i Joab ra ulun sinusub koson mampiau ri Abnir. Sinunu' nilo i Abnir mamaar ra tulubong Sira, am inibit nilo io saguli'. Ngaangai' baal raginio nasauk ra kalo napandayan ri Raja' Daut.

²⁷ Pakasaboi ayuk i Abnir ra Gibron, nangkimait i Joab riso mongoi ra kiing ru kulobon garabang, ilain ayuk masaga' io mindagu riso sangulun. Pulali' ri Joab nonobok ra tinai' ri Abnir saboi io minatoi. Kon raginio noyo i Abnir minatoi ra pinatoi ri Joab koson mansuli' ra namatayan ri Asail, boborok nano.

²⁸ Paat ra Raja' Daut nakapandai ra baal raginio, indagu io, “Nakapandai Tuhan ra mamagun am aku kolondo' sala ra namatayan ri Abnir.

²⁹ Polosoon noyo i Joab am sasambaloi nano ukumin sabap ra binaal nano. Polosoon noyo ralalom ru sasambaloi ri Joab ra papag ka papag masalok mokoondo' ulun ondo' marualan ra maruol mologo, kapoam maimbolo' ra maruol ru kungkung ondo' makalalaa', kapoam ungkuyon ondo' kalo maikang, kapoam ondo' matoi ralalom ru pangayawan kapoam matutusan ra akanon!”

³⁰ Koon raginio noyo i Joab am i Abisai nansuli' ri Abnir sabap ra namatoi io ri Asail, boborok nilai ralalom pangayawan giu' ra Gibion.

Linobong i Abnir

³¹ Kopongo raginio nanusub Raja' Daut ri Joab am ulun-ulun nano namparilak ra bayang nilo, nambayang ra konoon karung am niayuk nanulaboi ri Abnir. Paat ra nampalabangan, Raja' Daut galama' minugar ra tinaulian ru karanda'.

³² Linobong i Abnir giu' ra Gibron, am raja' am niayuk ngaangai' mamagun nanulaboi ra mosongou giu' ra saang ru kalabangan no.

³³ Nanulaboi Raja' Daut ri Abnir ra sinulabit ragitio,

³⁴ “Kua musiti' i Abnir matoi koson ra ulun sasambungon? Kalindu' nano kalo binangkil, kalayam nano kalo rinantai. Minatoi io ra tinobok ru ulun ondo' malaat am mapuka'.” Igondo' poyo ngaangai' mamagun nanulaboi ri Abnir.

³⁵ Nonsongorou ulun nangkinam nanimayo ra Raja' Daut maa' raginio mangakan kasanganu, kaa' nagibot io, “Polosoon noyo i Aki Kapuuno' no mamatoi raki', amon ru mangakan aku ra atan-atan ra kalo poyo mokotolop mato ru orou!”

³⁶ Nokorongog raginio mamagun matasu' guang. Atan ayuk binaal ru raja', nampatasu' ra guang nilo.

³⁷ Paat ra orou raginio ngaangai' mamagun ru Raja' Daut am ngaangai' ulun ru Israil nakarati' ra kalo nakalabit raja' no ra namatayan ri Abnir.

³⁸ Indagu raja' no ra pagawai-pagawai nano, “Kaala' kano ngaangai' ra paat orou raiti' nailusan takau ra sangulun tingganai maatang ra Israil.

³⁹ Kabalu' pana ra aku ti raja' pinili' ri Aki Kapuuno', kaa' paat orou raiti' makaliman aku ra malawo. Anak-anak ri Jiruya no malaat kaga'. Kalo tumaan aku manguasa' risilo. Polosoon noyo Tuhan mangukum ra ulun-ulun malaat no nontopot ra binaal nilono!”