2 SAMUIL 15 - Tanou Moonsoi Timugon

Mangatang i Absalom ra gumuor

¹ Kopongo raginio napatampos i Absalom ra rondo' kuda am kukula' ngainan kuda ra tayar nano, am niayuk ra limo ngoopor ngaulun magalung riso.

² Kaindalaman ri Absalom sumukal ra susuab ti am migor ra kiing ru ralan mamaar ra kulobon garabang ru bandar. Moonong ulun ondo' masaga' mambala' ra baal nano ra raja', piawon am kuatin ri Absalom. Kono, “Akau ti intor ra ati bansa'?” Amon ru taamon ru ulun no, “Intor ra bansa' ragitio kapoam ginio,”

³ mindagu boo i Absalom, “Sumugut ra ukum, motopot kau, kaa' malubat kolondo' uakil ru raja' ondo' masaga' mangkirongog ra raguon muno.”

⁴ Kon poyo ri Absalom, “Amon ru aku ti akim, moonong ulun ondo' mokoondo' ra pansangaran kapoam sikaan matong raki', am matimpok pamakuan kuno.”

⁵ Amon ru mokoondo' ondo' minggaar ri Absalom koson igulatur ra saang nano, pakaangon ri Absalom kalindu', am gumanggol ra ulun no am mangalok riso.

⁶ Binaal ginio ri Absalom ra moonong ulun ru Israil ondo' masaga' mambala' ra baal no ra raja'. Koon raginio noyo i Absalom nangambi' ra guang ru ulun ru Israil.

⁷ Kopongo apat ngambilor, kon ri Absalom ra Raja' Daut, “Ama', iowo' aku mongoi ra Gibron koson manugut ra bantu' kuli ra Tuhan.

⁸ Paat ra aku minayan ra Gisur, giu' ra pagun Siria, nambantu' aku mongoi sambayang ra Tuhan giu' ra Gibron, amon ru magibit Io raki' muli' ra Jirusalim.”

⁹ Taam raja', “Ongoi no am tumoojo.” I Absalom pana minongoi boo ra Gibron.

¹⁰ Kaa' kalo poyo raginio nangator io ra ulun-ulun sinusub ra ngaangai' bansa' ru Israil, am nagibit ra bilin, “Amon ru morongog min bolos ru bujung, golok kano ‘I Absalom nasauk noyo ra raja' giu' ra Gibron!’ ”

¹¹ Suang ruo ngaatus ngaulun intor ra Jirusalim kinimaitan ri Absalom koson mamaya' riso mongoi ra Gibron. Kalo nakapandai ilo ra atan-atan intor ra baal nampakatan no am ilo ngaangai' minaya' ra kalo manantam.

¹² Liliwa' ri Absalom mampataak ra taak simbalui, nangator io niayuk ra ulun sinusub ra bandar Gilo koson mampiau ri Agitopil, sangulun intor ra maminson ra Raja' Daut. Koon raginio noyo baal nampakatan koson manggal ra Raja' Daut lumanja' ikang, am maamaya' ri Absalom lumanja' suang.

Nagiru' Raja' Daut intor ra Jirusalim

¹³ Kopongo raginio sangulun sinusub nambala' ra baal raginio ra Raja' Daut, “Minaya' noyo ulun ru Israil ri Absalom.”

¹⁴ Ginio ra indagu Raja' Daut ra ngaangai' ru pagawai nano ondo' soroi ra Jirusalim, “Musiti' takau magiru' raino niayuk, amon ru masaga' takau makalabus intor ri Absalom! Ribaki' min! Amon ru kalo, mataki' io makasaboi am mampaala ritakau, am niayuk mamatoi ra ngaangai' ulun giu' ra bandar!”

¹⁵ Taam ilo, “Iou, raja' mai. Akai ngaangai' nakatampos mambaal ra atan ayuk kasagaan muno.”

¹⁶ Ginio ra ugar raja' no, binaya' ru ngaangai' sasambaloi nano am pagawai nano, ondo' ak am mopor ngaulun ruandu' parulug nano ondo' tinatang koson mayan ra istana.

¹⁷ Paat ra raja' am ngaangai' maamaya' nano mugar mangiruan ra bandar, uog ilo mamaar ra baloi ondo' pompor toojo.

¹⁸ Ngaangai' pagawai ru raja' minigor ra sapapa' nano paat ra pulalai ru mantamung ra raja' mansail ra saang nano. Suai raginio suang no onom ngaatus ngaulun saujor ondo' minaya' riso intor ra Gat niayuk mansail ra saang nano.

¹⁹ Paat ra raja' nakakito risilo, indagu io ri Itai, tingganai ru onom ngaatus ngaulun saujor no, “Kua baya' kou niayuk ramon? Moonsoi poyo muli' kou am mayan ra raja' ondo' bagu no. Ulun bansa' ru bokon kou ragiti, ulun nagiru' ondo' maalur intor ra pagun galama'.

²⁰ Kalo poyo nabuoi kou minayan ragiti, am marara' aku ra okou maya' raki' tumanggau. Aku galama' kalo nakapandai ra ati angayan kutu. Uli' no am ibito' niayuk rangan sabansa' muno. Gama' ru motogom Tuhan no rirun am mampagagaya' ramuyun.”

²¹ Kaa' taam i Itai, “Raja' kuno, magibot aku rirun, ralalom inggalan ru Tuhan ondo' naayag ra ati ayuk angayan muno, musiti' aku maya' niayuk, kabalu' pana makauma' ra patayan.”

²² Taam Raja' Daut, “Iou noyo! Ugar no!” Itai pana minugar nabaya' ra ngaangai' ru pulalai nano am sasambaloi nilo.

²³ Ngaangai' ulun nantangi' ra mosongou paat ra ngaangai' minaya' ra Raja' Daut no nangiruan ra istana. Kopongo raginio liminaup raja' ra Sungoi Kidron, sunu' ngaangai' pulalai nano, am ugar sumuku' ra tana' kaagisan.

²⁴ Imam Jadok am Imam Abiatar soroi ra giu' no nababaya' ra ulun ru Liwi ondo' nangkayang ra Kaban Nabantuan ru Tuhan. Kaban Nabantuan no pinatuun, am kalo kinayang ra kalo poyo ngaangai' ulun nanatang ra bandar no.

²⁵ Kopongo raginio kon ru raja' no ri Jadok, “Pasagulio' Kaban Nabantuan no ra bandar. Amon ru maansayan Tuhan no raki', maaru' mangiou io raki' saguli' am makakito ra Kaban Nabantuan no poyo, am niayuk intok ru Kaban Nabantuan no binulian.

²⁶ Kaa' amon ru kalo maansayan Tuhan no raki', maya' ayuk ra atan kasagaan Nano ra inan kutu.”

²⁷ Tungguli' poyo ru raja' ragu nano ri Jadok, “Kimaiti' noyo i Agimaas anak muno am i Jonatan anak ri Abiatar, am saguli' no ra bandar ra mamimio.

²⁸ Liliwa' raginio maginaa aku mamaar ra intok laupan ru sungoi giu' ra tana' kaagisan saboi makaapu ra tanou intor rirun.”

²⁹ I Jadok am i Abiatar pana nagibit ra Kaban Nabantuan siminaguli' ra Jirusalim am ayan ilo ra giu' no.

³⁰ Kalo nangkasut i Daut, am nababaya' ra ngaangai' ulun minaya' riso no, nagaloi ilo ra Bulur Jaitun liliwa' mantangi' am ulu rinundung koson tatandu' mangiluk guang.

³¹ Paat ra Raja' Daut binalaan ra i Agitopil niayuk minaya' gumuor ri Absalom, pakiasi' Raja' Daut, “Iou Tuhan, sulango' bilin ri Agitopil!”

³² Paat ra Raja' Daut nakasaboi ra tampak ru bulur, giu' ra intok sambayangan ra giu' no, umaa' io ru rangan nano ondo' gumagaya', i Gusai ulun ru Arki. Rinilak noyo ri Gusai bayang nano am rasawat ru ulu nano tinaukan ra kaau.

³³ Kon ru Raja' Daut riso, “Amon ru maya' kou raki', kalo makapangindangan kou raki'.

³⁴ Kaa' makapangindangan kou raki' amon ru sumaguli' kou ra bandar. Kopongo raginio ragui' i Absalom ra raino masaga' kou mangandoi ra gumagaya' riso, koson ra okou nangandoi ra ama' nano ragili. Koon raginio noyo ra okou makasulang ra ngaangai' bilin ri Agitopil.

³⁵ Imam Jadok am Imam Abiatar niayuk soroi ra giu' no. Balai' ilo ra ngaangai' ondo' morongog mu giu' ra istana.

³⁶ I Agimaas anak ri Jadok am i Jonatan anak ri Abiatar niayuk maya' ra ama' nilo. Pangator no raki' ra ngaangai' tanou pabalaan galing ri Agimaas am i Jonatan.”

³⁷ Ginio ra i Gusai, rangan ru Raja' Daut siminaguli' ra Jirusalim, nakapaat ri Absalom nakasaboi ra giu' no.