2 SAMUIL 14 - Tanou Moonsoi Timugon

Pirot ri Joab ra ulian ri Absalom

¹ Nakapandai i Joab ra moondom kaga' Raja' Daut ri Absalom,

² ginio ra panusub io ra ulun magalap ra ruandu' mapintar ondo' minayan giu' ra Tikoa. Paat ra ruandu' no nakasaboi, indagu i Joab riso, “Baalo' ra ilain koson ayuk ra mangulir; pambayang ra bayang mangulir am pai' surayo' abuk. Baalo' koson ra ruandu' ondo' lair noyo mangulir.

³ Mopongo raginio ongoi no uma' ra raja', am raguo' riso atan ondo' rinagu ku rirun.” Nambala' i Joab ra ruandu' no atan ondo' musiti' raguon nano.

⁴ Ongoi ruandu' no uma' ra raja', am kuku' samba am indagu, “Raja' kuno, indangano' aku!”

⁵ Pangkuot raja' no riso, “Atan kitaakon muno?” Taam ruandu' no, “Aku ti napuor ondo' musikin. Ralaki kuli minatoi noyo.

⁶ Mokoondo' aku ra ruo ngaulun anak ungkuyon, am paat ra rondo' orou nansangor ilo giu' ra umo. Sabap ra kolondo' ulun nampatuliar risilo, ondo' sangulun no namatoi ra sangulun no.

⁷ Raino, ngaangai' ru sasambaloi kuno mantula' raki', am mansika' maa' raginio pataakon ku anak kuli ondo' namatoi no risilo. Masaga' ilo mangukum riso ra ukuman matoi sabap ra namatoi io noyo ra pabukat nano. Amon ru pataakon ku anak raginio, aku kolondo' boo anak. Mamuso ilo ra kalansanan kuno ra rondo' no ayuk am kalo manatang ra sangulun anak ungkuyon ra ralaki kuli koson manunggul ra papag nano.”

⁸ Taam raja' no, “Uli' no. Salingapuon ku baal raginio.”

⁹ Kon ru ruandu' no, “Raja' kuno, atan ayuk baalon muno, aku am sasambaloi kuno mansaan ra kinibit no; okou am sasambaloi muno kolondo' sala.”

¹⁰ Taam raja' no, “Amon ru mokoondo' ra ulun ondo' mompololob rirun, ibito' io raki', magu' io kalo boo manguliso rirun.”

¹¹ Kon ru ruandu' no, “Gama' ru makiasi' kou ra Tuhan, i Aki Kapuuno' muno, maa' raginio ulun ondo' mambalos ra pinatayan ru anak kuli kalo mambaal ra kalaatan ondo' maayo poyo ra mamatoi ra anak kuno ondo' sangulun poyo.” Taam Raja' Daut, “Ralalom inggalan ru Tuhan ondo' maayag, anak muno kalo jamarin kabalu' pana ra sanganu pana.”

¹² Ruandu' no pana mindagu boo, “Raja' kuno, iowo' aku mindagu santaun poyo.” Taam raja', “Iou noyo.”

¹³ Kon ru ruandu' no, “Sabap ra ragu muni, nangiou kou noyo ra okou galama' makasala sabap ra kalo nangiou ra anak ungkuyon muno muli' intor ra pamatiran. Kua baalo' mu kasalaan koson raginio ra ulun ri Aki Kapuuno'?

¹⁴ Matoi takau ngaangai'; itakau ti koson ra timug ondo' nasasar ra tana' am kalo maalap boo katimung. I Aki Kapuuno' pana kalo boo mamayag saguli' ra ulun ondo' minatoi, kaa' kalo ra kalo mapiratan mu maa' raginio ulun inimpayan no makauli' poyo.

¹⁵ Minuma' aku rirun sabap ra linolob aku ru ulun. Ginio ra mangkara' aku ra moonsoi mindagu aku rirun am malansan ra iowon kitaakon kutu.

¹⁶ Mangkara' aku ra mangkirongog kou am mamayag raki' intor ra ulun ondo' mirot mamatoi raki' am anak kuno. Kuayan nilo manginggi' ramon intor ra tana' ondo' tinaakan ri Aki Kapuuno' ra ulun Nano.

¹⁷ Mangintopot aku ra bantu' muno jamin ru pamayagan kuno sabap ra okou koson ra malaikat ri Aki Kapuuno', ondo' makapandai ra atan ondo' moonsoi am atan ondo' malaat. Gama' ru Tuhan, i Aki Kapuuno' muno mabaya' rirun!”.

¹⁸ Taam raja', “Masaga' aku mangkuot rondo' rirun, am taamo' ra motopot.” Taam ruandu' no, “Indagu no.”

¹⁹ Kon ru raja', “Sinusub kou kia ri Joab?” Taam ruandu' no, “Magibot aku sabap ra okou kalo noyo makapagiliu aku intor ra pangkuatan muno. Motopot ra i Joab nambala' noyo ra atan musiti' kuno baalon am raguon.

²⁰ Kaa' nambaal io raginio koson manalasai ra baal raginio ra moonsoi. Okou mapintar koson ra malaikat ri Aki Kapuuno' saboi makapandai ra ngaangai' ondo' masauk.”

²¹ Kopongo raginio pampiau raja' no ri Joab am indagu riso, “Gogoton muno suguton ku. Ongoi no uma' ri Absalom am ibito' io saguli'.”

²² Igugulatur i Joab ra saang ru Raja' Daut, am indagu, “Gama' ru i Aki Kapuuno' mambarakat rirun! Raino nakapandai aku ra maansayan kou raki' sabap ra nangiou kou noyo ra kitaakon kuno.”

²³ Ongoi i Joab ra Gisur koson mangkimait ri Absalom sumaguli' ra Jirusalim.

²⁴ Kaa' kalo nangiou raja' no ri Absalom mayan ra istana. Kon ru raja', “Marara' aku magilong riso.” Ginio ra narampus i Absalom minuli' ra baloi nano galama' am kalo minuma' ra raja'.

I Absalom pinandumis ra Raja' Daut

²⁵ Inompor i Absalom koson ra ulun ondo' maindon kaga' ra titikop ru Israil. Kolondo' sangulun pana ondo' maindon poyo intor riso. Intor ra pampalar ru kalayam saboi ra pompor ru abuk nano, kolondo' pipilat nano.

²⁶ Abuk nano masampung kaga', am musiti' io mopolompor igondo' sambilor sabap ra malimanan no maagat kaga'. Abuk ondo' linompor no bagat no nasailan intor ra ruo ngakilogram sumugut ra timbangan ru raja'.

²⁷ Mokoondo' i Absalom ra talu ngaulun anak ungkuyon am sangulun anak ruandu' ondo' mantalur kaga', makainggalan ri Tamar.

²⁸ Minayan i Absalom ra Jirusalim buoi ruo ngambilor, kaa' kalo niayuk poyo minuma' ra raja'.

²⁹ Ginio ra paat ra rondo' orou pampiau i Absalom ri Joab koson manusub riso muma' ra raja', kaa' marara' i Joab matong. Pampiau i Absalom riso igondo' poyo, kaa' marara' niayuk i Joab matong.

³⁰ Kopongo raginio indagu i Absalom ra ulipon-ulipon nano, “Ilai' min, umo ri Joab ondo' tinanaman ra barli nansapapa' ra umo kuno. Solobo' min umo no.” Ilo pana minongoi ponolob ra umo no.

³¹ Ratong i Joab ra baloi ri Absalom am pangkuot, “Kua solobo' ru ulipon-ulipon muno umo kuno?”

³² Taam i Absalom, “Sabap ra marara' kou matong paat ra aku mampiau. Masaga' aku mompoongoi rirun uma' ra raja' am mampasaboi ra pangkuatan kutu, ‘Atan onong kuno nangiruan ra Gisur am saguli' ragiti? Moonsoi poyo minayan aku ra giu' ayuk.’ ” Kon poyo ri Absalom, “Piroto' noyo koson makauma' aku ra raja', am amon ru aku ti lakat poyo karaan ra makasala, nakatampos aku no ukumin ra matoi.”

³³ Kopongo raginio minuma' i Joab ra Raja' Daut am nampasaboi ra ragu-ragu ri Absalom. Kopongo raginio pampiau raja' ri Absalom, am ratong i Absalom igugulatur ra saang ru raja'. Nanguma' raja' no riso ra alok.