2 RAJA'-RAJA' 9 - Tanou Moonsoi Timugon

Raja' Jigu linantik nasauk ra raja' ru Israil

¹ Paat raginio Nabi Ilisa nampiau ra sangulun intor ra nabi ondo' inila' nano intor ra pulalai ru nabi, am indagu io riso, “Tampos no am ongoi no ra Ramot giu' ra Giliad. Ibito' rarapu' makasuang ra umau jaitun.

² Paat ra okou makasaboi ra giu' no uyumo' i Jigu anak ri Josapat, akupu ri Nimsi. Ibito' io misangulun ra rondo' lamin, makatuliar intor ra rangan-rangan nano.

³ Pasasaro' boo umau jaitun ti ra tampak ru ulu nano am indagu ra, ‘Koon ragitio Tuhan napatanou ra nampalantik Io rirun masauk ra raja' ru Israil.’ Mopongo ginio iruani' intok raginio ra mataki'.”

⁴ Minongoi nabi mamulok no ra Ramot.

⁵ Giu' no natuum no i Jigu am panglima-panglima ru saujor no tatanga' mansusunur. Kono, “Tuan mokoondo' aku ra tanou moonsoi rirun.” Pangkuot i Jigu, “Ra osoi kia papasabayan mu ra tanou no?” Taam io, “Okou.”

⁶ Kopongo raginio minumpos ilo ruo ra rondo' lamin, am pasasaro' ru nabi mamulok no umau jaitun no ra ulu ri Jigu liliwa' mindagu, “Tuhan, i Aki Kapuuno' ru Israil nampatanou ra, ‘Koon ragitio Aku mampalantik rirun masauk ra raja' ru ulun Kuno Israil.

⁷ Potoyon mu sasambaloi ru tuan muno, anak ri Agab no, maa' raginio makapangukum Aku ri Ijibil ondo' namatoi ra nabi-nabi Kuli am ulipon-ulipon Ku ra bokon i.

⁸ Ngaangai' ulun ru sasambaloi ri Agab am papag nano musiti' matoi. Mamatoi Aku ra ngaangai' ungkuyon ru sasambaloi nano, ondo' mamulok am niayuk ondo' matutuo.

⁹ Nogondo' pamakuan Kuno ra sasambaloi nano koson ra sasambaloi ri Jirobiam am Baisa, raja'-raja' ru Israil.

¹⁰ Kalo molobong i Ijibil no. Baangkai nano akanon ru uku' giu' ra Jijriil.’ ” Karagu ginio ngaangai', iruani' ru nabi mamulok no lamin am pagindibok minugar.

¹¹ Saguli' i Jigu ra panglima-panglima ra bokon no. Pangkuot ilo riso, “Atan kia tanou ondo' inibit nani? Kua ratong ulun mantuyang ni rirun?” Pangkuot i Jigu, “Kalo kia nakapandai kau?”

¹² Taam ilo, “Kalo. Pambala' no atan rinagu nani.” Taam io, “Nambala' io raki' ra Tuhan nampatanou, ‘Aku mampalantik rirun masauk ra raja' ru Israil.’ ”

¹³ Paat raginio niayuk, rangan-rangan ri Jigu nampabanta' ra sukub nilo giu' ra tampilon rasawat ru tukar no ri Jigu. Nanamput ilo ra bujung am golok, “I Jigu raja'!”

Raja' Joram, raja' ru Israil pinatoi

^14-15 Kopongo raginio nagagakut Raja' Jigu manggal ra Raja' Joram. Paat raginio soroi Raja' Joram giu' ra Jijriil. Ongoi Raja' Joram ra giu' no koson makibabas ra pilat nano kinibit ru pangayawan giu' ra Ramot manggal ra Raja' Gajail, raja' ru pagun Siria. Indagu Raja' Jigu ra rangan-rangan nano, “Amon ru mangiou kau raki' masauk ra raja', tamungi' min maa' raginio pai' sangulun pana mingkual intor ra Ramot koson mambala' ra baal noopot ti ra mamagun ru Jijriil.”

¹⁶ Sakoi Raja' Jigu ra kurita' kuda nano, am ongoi ra Jijriil. Paat raginio Raja' Joram lakat poyo kalo napali', am Raja' Agajia intor ra Jiuda soroi ra giu' no koson mongoi pagilong ra Raja' Joram.

¹⁷ Sangulun magalung ondo' mangandoi ra manara giu' ra Jijriil nakakito ra Raja' Jigu am ulun-ulun nano matong. Kono, “Nakakito aku ra kukula' ngaulun matong!” Taam Raja' Joram, “Susubo' sangulun saujor mangkuda mongoi pangimumui risilo no ru rangan kapoam pantula'.”

¹⁸ Inggaar saujor no ra Raja' Jigu am indagu riso, “Masaga' Raja' Joram makapandai ra okou matong ti koson ra rangan.” Taam Raja' Jigu, “Ginio sala' ka maatang rirun. Sunu' raki'.” Ulun magalung giu' ra manara no nambala' ra saujor no nakasaboi ra pulalai ru ulun no, kaa' kalio io siminaguli'.

¹⁹ Sangulun saujor ra bokon sinusub minongoi, am nangkuot ra baal ra nogondo' no ra Raja' Jigu. Igondo' poyo timinaam Raja' Jigu ra, “Ginio sala' ka maatang rirun! Sunu' raki'.”

²⁰ Igondo' poyo ulun magalung no nambala' ra saujor no nakasaboi ra pulalai ru ulun no, kaa' kalio io siminaguli'. Kono poyo, “Tingganai ru pulalai no nampaugar ra kurita' kuda nano koson ra ulun mantuyang, koson io ri Jigu!”

²¹ Kon ru Raja' Joram, “Paatango' kurita' kuda kuno.” Pakaatang kurita' kuda nano, io am Raja' Agajia minongoi nabaya' ra kurita' kuda ru sigagama' koson muma' ra Raja' Jigu. Nakatuum ilo ra Raja' Jigu giu' ra umo ragili longgom ri Nabot.

²² Pangkuot Raja' Joram ra Raja' Jigu, “Okou matong ti koson ra rangan kia?” Kon ru Raja' Jigu, “Sala' ka lair koson ra rangan buoi ragiti lakat poyo masauk ragiti ilimu' sihir am sumamba ra sinungkalalaing ondo' pinuunan ri Ijibil, ina' muno raja'?”

²³ “Pamparuungan!” Golok ru Raja' Joram ra Raja' Agajia, liliwa' nampalisang ra kurita' kuda nano am pagiru' intor ra giu' no.

²⁴ Kaa' alapo' ri Raja' Jigu busur nano, am kinai' no ikang namanah ra Raja' Joram intor ra bakulung. Anak panah no nakatujok ra pusu' ru Raja' Joram am karatu' io am patoi giu' ra ralalom ru kurita' kuda nano.

²⁵ Kon ru Raja' Jigu ri Bidkar, pagawai saujor nano, “Alapo' baangkai no am patiri' giu' ra tana' longgom ri Nabot no. Karaa' paat okou am aku nangura' ra kuda giu' ra tinaulian ru Raja' Agab, ama' ru Raja' Joram ragili, nakaindagu Tuhan koon raginio koson manggal ra Raja' Agab,

²⁶ ‘Rondom i nakakito Aku ra namatayan ri Nabot am anak-anak nano. Raino bantuon Ku ra mangukum Aku rirun ragiti, ra tana' ragitio niayuk.’ Ginio ra alapo' baangkai ru Raja' Joram, am patiri' ra tana' ondo' ragili longgom ri Nabot, maa' raginio masugut ukuman ri Aki Kapuuno' no riso.”

Raja' Agajia, raja' ru Jiuda pinatoi

²⁷ Nakakito Raja' Agajia ra atan ondo' nasauk no. Ginio ra pagiru' io ra kurita' kuda nano minongoi ra tampilon ru bandar Bit-Gagan. Nangilou Raja' Jigu ra Raja' Agajia. “Potoyo' raja' raginio niayuk!” nanusub Raja' Jigu ra ulun nano. Namanah ilo ra Raja' Agajia ra io tatanga' nagiru' ra kurita' kuda nano ralalom pangkiralanan mongoi ra Gur, mamaar ra bandar Jibliam. Kaa' Raja' Agajia nakapagiru' saboi ra Migido am patoi ra giu' no.

²⁸ Pagawai-pagawai ru Raja' Agajia nagibit ra baangkai nano siminaguli' ra Jirusalim ra rondo' kurita' kuda am linobong io giu' ra kalabangan ru raja' giu' ra Bandar Daut.

²⁹ Raja' Agajia nasauk ra raja' ru Jiuda ra bilor koopor am rondo' ru pamarintaan ru Raja' Joram anak ungkuyon ru Raja' Agab giu' ra Israil.

Raja' ruandu' Ijibil pinatoi

³⁰ Kopongo raginio nakasaboi Raja' Jigu giu' ra Jijriil. Paat ri Ijibil nokorongog ra atan ondo' nasauk no, saiti' no bingkolot ru mato nano, am busaki' abuk nano, am pagilong ra ragana' intor ra gigimpalan ru istana.

³¹ Paat ra Raja' Jigu nansail giu' ra kulobon garabang, golok i Ijibil, “Okou Jimri, mamatoi! Kua ongoi kou ragiti?”

³² Pantingaa' Raja' Jigu am indagu, “Mokoondo' kia osoi-osoi ondo' sumaung raki'?” Mokoondo' ruo kapoam talu ngaulun pagawai ru istana nagilong ra ragana' intor ra rondo' gigimpalan.

³³ Raja' Jigu pana mindagu risilo, “Papatiro' ruandu' no ra ragana'!” Ilo pana nampapatir ra ruandu' no ra ragana' saboi raraa' nano nakatakis ra timbok am ra kukula' ngainan kuda ra giu' no. Jinanjang ru Raja' Jigu no baangkai ri Ijibil ra kuda am kurita' kuda nano,

³⁴ am umpos ra istana am pangakan. Kopongo raginio kon ru Raja' Jigu, “Nausung ruandu' no. Kabalu' pana koson raginio, lobongo' baangkai nano sabap ra io no anak ruandu' ru raja'.”

³⁵ Kaa' ulun ondo' mongoi pompolobong ra baangkai ri Ijibil no kalo nakatuum ra atan-atan pana ondo' ayuk am kuapak am bungul-bungul ru kalayam am niayuk kalindu' nano.

³⁶ Paat ra ilo nambala' ra baal raginio ra Raja' Jigu, kono, “Baal ragitio nasauk koson ra rinagu noyo ru Tuhan pinabala' galing ra ulipon Nano i Ilia, ‘Uku' mangakan ra baangkai ri Ijibil giu' ra Jijriil.

³⁷ Suwo-suwo ru baangkai nano makulipatak koson ra ampangara' ru bibiag, saboi kalo boo mauligan.’ ”