2 TUNUNG RU BANSA' ISRAIL 4 - Tanou Moonsoi Timugon

Kuliamos ra Baloi ru Tuhan

¹ Nanusub Raja' Salomo ra ulun mambaal rondo' altar gangsa' gayo no 9 ngamito am sawat no 4.5 ngamito.

² Nambaal io niayuk rondo' tangki' mapungol intor ra gangsa'; landom no 2.2 ngamito, garis ru tatanga' no 4.4 ngamito, am liput no 13.2 ngamito.

³ Tampilon ra liwar ra liput ru tangki' no binungaan ra ruo ngambaris gambar ru sapi' gawayan ondo' binaal nababaya' ra tangki' no.

⁴ Tangki' no pinabanta' giu' rasawat ru bakulung ru mopor am ruo ngainan sapi' gawayan ondo' binaal intor ra gangsa', ondo' pinatingkuang ra liwar: talu pinatingkuang ra ralayo, talu pinatingkuang ra kalasaan, talu pinatingkuang ra rabugus, am talu pinatingkuang ra sirangon.

⁵ Kapal ra kiing ru tangki' no 75 ngamilimito. Kiing ru tangki' no koson ra kiing ru sangkir ondo' makubok ra nakaingkual koson ra busak ru bunga'. Tangki' no masuangan ra timug ra kinasuang no 60,000 ngalito.

⁶ Nambaal ilo niayuk ra mopor bisin: limo koson pinabanta' ra tampilon rabugus ra Baloi ru Tuhan, limo poyo pinabanta' tampilon ralayo. Bisin-bisin no pinakai koson mambagu' ra tinata' ra bibiag ondo' solobon koson ra taak simbalui. Timug ralalom ru tangki' maayo no pakayon ru imam-imam koson mambagu' ra inan.

^7-8 Nambaal ilo mopor tampakan ra lampung mas sumugut ra bakaal ondo' inaru' noyo am mopor mija', am pinabanta' ngaangai' no ra ralalom ru lamin maatang ra Baloi ru Tuhan: limo tampakan ra lampung am limo mija' tampilon ra pamiris, am limo tampakan ra lampung am limo mija' tampilon ra kait. Nambaal ilo niayuk ra maatus mangkuk mas.

⁹ Nambaal ilo rondo' liliut giu' ra tampilon ralalom tayar ru imam-imam, am rondo' tampilon ra liwar. Angob ra kulobon-kulobon no lolot ru ruo liliut no inangkupan ra gangsa'.

¹⁰ Tangki' no pinabanta' mamaar ra pisuk tampilon rabugus sirangon ra Baloi ru Tuhan.

^11-16 Nambaal niayuk i Guram ra pagangan, susuuk am mangkuk. Pinongo no nambaal ra ngaangai' kuliamos ondo' binantu' nano ra Raja' Salomo koson ra Baloi ru Tuhan: 2 ngantaun lugu' 2 ngantaun ulu ru lugu' binaal koson ra mangkuk ondo' pinabanta' giu' ra rasawat ru lugu'-lugu' no Rantai pinangkikiting ra moonong ulu ru lugu' 400 kawa' ru dalima' intor ra gangsa' ondo' sinauk ra ruo ngambaris pinaliput ra rantai pinangkikiting ra moonong ulu ru lugu' 10 kurita' bundukon ru kuda 10 bisin 1 tangki' 12 ngainan sapi' gawayan intor ra gangsa' koson panungka' ra tangki' Pagangan-pagangan, susuuk-susuuk am garapu'-garapu'. I Guram, ulun manukang ra matuyu' no, nambaal ra ngaangai' kuliamos no intor ra gangsa' ondo' inisasan toojo koson pakayon giu' ra Baloi ru Tuhan, koson ra ondo' nanusuban ru Raja' Salomo.

¹⁷ Nanusub raja' ra ulun mambaal ra ngaangai' kuliamos no giu' ra pangansakan ra logam lolot ru Sukot am Jirida, giu' ra Limayak Jordan.

¹⁸ Kuliamos-kuliamos raginio ondo' binaal masuang kaga', saboi kolondo' osoi pana makapangaru' ra bagat ru gangsa' ondo' pinakai no.

¹⁹ Nanusub niayuk Raja' Salomo ra ulun mambaal ra kuliamos mas ra Baloi ru Tuhan: altar am mija' ru ruti' ondo' pataakon ri Aki Kapuuno';

²⁰ tampakan-tampakan ru lampung am lampung-lampung intor ra mas kopoyo toojo, ondo' sikitin giu' ra saang ru Lamin Matulai Kaga', sumugut ra atan ondo' inaru';

²¹ pinamunga' koson ra busak, lampung, sumpit,

²² kuliamos koson mamasau ra sumbu' ru lampung, mangkuk, pinggan koson pamulian ra kaminyan, am intok ru baa. Ngaangai' kuliamos raginio binaal intor ra mas kopoyo. Angob ra kulobon-kulobon ra liwar ra Baloi ru Tuhan am angob ra kulobon-kulobon mongoi ra Lamin Matulai Kaga' inangkupan ra mas.