2 TUNUNG RU BANSA' ISRAIL 31 - Tanou Moonsoi Timugon

Nambaal Raja' Gijkia ra panalimbaguan ra ugama

¹ Kopongo noyo pangiantakan no, ngaangai' ulun ru Israil minongoi ra moonong bandar giu' ra Jiuda. Pinuso nilo batu-batu pangkaraan sinungkalalaing am tatandu'-tatandu' ondo' patimpokon ra Dewi Asyira. Linunsai nilo altar-altar am intok-intok sambaan ra sinungkalalaing. Binaal nilo baal ra nogondo' giu' ra intok-intok ra bokon giu' ra Jiuda, am giu' ra wilayah Binjamin, Ipraim am niayuk Manasi. Kopongo raginio ilo ngaangai' minuli' ra intok ru sigagama'.

² Raja' Gijkia nambaal saguli' ra pulalai ru imam-imam am ulun-ulun ru Liwi. Moonong pulalai inanian ra kandoi ra inaru', nakaaya' kandoi monolob ra taak simbalui koson mapabansuk ra guang ru Tuhan am mampataak ra taak simbalui koson makibarakat ra Tuhan, maya' ralalom ru upacara sambayang giu' ra Baloi ru Tuhan, am mongompor am niayuk maringkuanang giu' ra kukula' intok ra ralalom Baloi ru Tuhan.

³ Intor ra bibiag tinambiag nano galama', Raja' Gijkia nangani' ra bibiag ondo' makapakuan ra tayar ru taak simbalui koson mapabansuk ra guang ru Tuhan ondo' pinataak paat ra moonong susuab ti am mamai' ti, paat ra orou Sabat, Pangiantakan ra Sila' Bagu, am niayuk paat ra pangiantakan-pangiantakan ra bokon ondo' inaru' giu' ra ralalom ru Ukum ru Tuhan.

⁴ Suai raginio, raja' niayuk nanusub ra mamagun ru Jirusalim mangani' ra taak-taak ondo' inaru' ra tayar ru imam-imam am ulun-ulun ru Liwi, maa' raginio ngaangai' ru guang nilo mangkara' ayuk ra susuban ru Ukum ru Tuhan.

⁵ Pakatanou ayuk susuban no, nagibit ulun ru Israil ra taak gandum ondo' moonsoi kaga', wain, umau jaitun, ruu' ru maningot am ampos ra tinanom ra bokon. Nagibit ilo niayuk ra sampiopor intor ra atan ayuk longgom nilo.

⁶ Ngaangai' mamagun ru Jiuda nagibit ra sampiopor intor ra sampanon ru sapi' am domba nilo. Nagibit ilo niayuk ra masuang taak ra bokon, ondo' pinataak ra Tuhan, i Aki Kapuuno' nilo.

⁷ Taak raginio tinalimpuunan inataran paat ra sila' katalu, am narayus naruangan buoi apat ngansila'.

⁸ Paat ra Raja' Gijkia am pagawai-pagawai nakakito ra mapara' boo suang ru taak ondo' tinaakan no, nongompor ilo ra Tuhan am nongompor ra ulun Nano, ulun ru Israil.

⁹ Pangkuot raja' ra imam-imam am ulun-ulun ru Liwi intor ra taak no,

¹⁰ indagu boo Tingganai Maayo Imam Ajaria, papag ri Jadok ra raja', “Intor ra mamagun nagibit ra taak nilo ra Baloi ru Tuhan, akanon ra giu' no naukop, am masuang piboo suwo. Nakaalap akai ra ngaangai' taak ragitio sabap ra Tuhan nambarakat ra ulun Nano.”

¹¹ Sumugut ra susuban ru raja', tinampos nilo intok-intok pambulian giu' ra liliut Baloi ru Tuhan,

¹² am nambuli ra ngaangai' taak am sampiopor giu' ra ralalom ru intok-intok pambulian no. Nampili' ilo ra sangulun Liwi ininggalanan ri Konanya koson manalingapu ra kuliamos no, am boborok nano, i Simii koson mangindangan riso.

¹³ Mopor ngaulun Liwi sinusub mangandoi ra ragana' ru pagalungan nilo: I Jiwil, Ajajya, Nagat, Asail, Jirimot, Jojabad, Iliil, Jismakia, Magat am Binanya. Ngaangai' no pinaugar sumugut ra susuban ru Raja' Gijkia am Tingganai Maayo Imam Ajaria.

¹⁴ I Kori anak ri Jimna, sangulun Liwi ondo' ragili nasauk ra tingganai magalung giu' ra Kulobon Garabang Sirangon Baloi ru Tuhan, pinangandoi mangapu ra taak ondo' pinataak ra Tuhan am niayuk mantatayar raginio.

¹⁵ Giu' ra bandar-bandar ra bokon intok inayanan ru imam, i Kori inindangan toojo ru ulun ru Liwi ragitilo: I Idin, Minyamin, Jisua, Simaya, Amarya am Sikania. Tinayar nilo akanon no ra pinantutuku' ayuk ra gino ngai' ulun ru Liwi sumugut ra kandoi nilo,

¹⁶ am kalo maya' ra bansa'. Ngaangai' ungkuyon ondo' makaumur nasailan talu ngoopor, ondo' makakandoi moonong orou giu' ra Baloi ru Tuhan, niayuk inanian ra tayar ru sigagama' maya' ra kandoi no am pulalai nilo.

¹⁷ Imam-imam pinangandoi sumugut ra bansa', kaa' ulun ru Liwi ondo' makaumur nasailan ruo ngoopor ngambilor pinangandoi sumugut ra pulalai.

¹⁸ Tinulisan inggalan nilo nababaya' ra anak andu' nilo, am ulun ra bokon ondo' pakanon nilo, sabap ra ilo musiti' makatampos ayuk koson mangandoi ra timpokon ra tayar ru Tuhan.

¹⁹ Giu' ra bandar-bandar am giu' ra padang ru sakot ondo' giu' ra liliut ru bandar-bandar no, ondo' inaru' ra tayar ru papag ri Arun, mokoondo' imam ondo' linansanan toojo koson mantayar ra akanon ra ngaangai' ungkuyon intor ra sasambaloi ru imam, am ngaangai' ulun ondo' tinulisan inggalan ralalom bansa' ru Liwi.

²⁰ Giu' ra titikop ru Jiuda, Raja' Gijkia nambaal ra matimpok, ondo' mabanis am niayuk iniou ru Tuhan, i Aki Kapuuno' nano.

²¹ Nakasugut Raja' Gijkia sabap ra ngaangai' ondo' binaal nano koson ra Baloi ru Tuhan kapoam koson gumagaya' ra Ukum ri Musa, pinaugar no ra sototopot ru guang am ra togom ri Aki Kapuuno' nano.